މަތިވެރި އެސޯސިއޭޝަން ފޯރ ރެކްރިއޭޝަން އެންޑް ސްޕޯޓްސް (މާރންސް) އެކަޑަމީ ހުޅުވައި ދެއްވުމަށް އަލީ އަޝްފާގް (ދަގަނޑޭ)ގެ އިތުރުން ރާއްޖޭގެ ހުނަރުވެރި އެތުލީޓުންގެ ޓީމެއް މަތިވެރިއަށް ދިއުމަށް ހަމަޖެހިއްޖެއެވެ.

ހުނަރުވެރި ފުޓުބޯޅަ ކުޅުންތެރިން އުފެއްދުމާއި، ސަރަހައްދީ ފެންވަރުގެ ފުޓުބޯޅަ ކުޅުންތެރިންގެ ޖީލެއް ބިނާ ކުރުމަށް، މާރންސްގެ ފަރާތުން ފެށުމަށް ހަމަޖެހިފައިވާ އެކަޑަމީ ރަސްމީކޮށް އިފްތިތާޙްކުރުމަށް ހަމަޖެހިފައިވަނީ ހޮނިހިރު ދުވަހު ހަވީރު މަތިވެރި ފުޓްސަލް ދަނޑުގައި ބާއްވާ ރަސްމިއްޔާތެއްގައެވެ.

މާރންސް ސްޕޯޓްސް އެކަޑަމީ ހުޅުވައިދެއްވުމަށް ރާޢްޖޭގެ އެއް ނަމްބަރު ފުޓުބޯޅަ ކުޅުންތެރިޔާ އަލީ އަޝްފާގު ހުކުރު ދުވަހު މަތިވެރިއަށް ގޮސްފައިވާއިރު، މި ރަސްމިއްޔާތުގައި ޝަރަފްވެރި މެހެމާނެއްގެ ގޮތުން ބައިވެރިވެވަޑައިގަންނަވާނީ، ރާއްޖެއަށް 2008 ވަނަ އަހަރު ސާފް ޗެމްޕިއަންޝިޕް ކާމިޔާބުކޮށްދިން ގައުމީ ޓީމުގެ ކެޕްޓަން އައްސަދު އަބްދުލްޣަނީ އެވެ. މީގެ އިތުރުން ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުއާއި މަޝްހޫރު ލަވަ ކިޔުންތެރިޔާ އިބްރާޙިމް ޝަލަބީ އަދި އިބްރާޙިމް ވަހީދު (ބޮޑުބެ) ވެސް މި ރަސްމިއްޔާތުގައި ބައިވެރިވާނެއެވެ.

ހޮނިހިރު ދުވަހު ފެށުމަށް ހަމަޖެހިފައިވާ މާރންސް ސްޕޯޓްސް އެކަޑަމީގައި ކުދިން ބައިވެރިވުމަށް މިހާރުވެސް ބެލެނިވެރިން އެދެމުން އަންނަކަން ފާހަގަކުރައްވާ ރާއްޖެއެމްވީއަށް މައުލޫމާތު ދެއްވަމުން މާރންސް ޖަމިއްޔާގެ ރައީސް އިސްމާއިލް ނަސީމް ވިދާޅުވީ، ވީހާވެސް ގިނަ ކުދިންނަށް ފުރުސަތު ދިނުމަކީ އެ ޖަމިއްޔާގެ އެންމެ ބޮޑު ބޭނުން ކަމަށާއި، އަދި ރަނގަޅު ކުޅުންތެރިންތަކެއް އެރަށުން އުފަންވެގެން ދިއުމަކީވެސް މި މަސައްކަތުގެ މައިގަނޑު މަޤްސަދު ކަމަށެވެ.

އެކަޑަމީ ހުޅުވުމަށް ކުރަމުންދާ މަސައްކަތާ ގުޅޭގޮތުން އިސްމާއިލް ނަސީމް ވިދާޅުވީ، އެކަޑަމީ ރަސްމީކޮށް ފެށުމަށް ކުރަމުންދާ މަސައްކަތުގައި ރަށުގެ ރައްޔިތުންގެ ފަރާތުންނާއި، ރަށުގައި މިހާރުވެސް ހިންގަމުންދާ އެކި ޖަމިއްޔާތަކުގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަމަށެވެ. މީގެ އިތުރުން ޖަމިއްޔާގެ ހުރިހާ މެންބަރުންނާއި އެ މެންބަރުންގެ އާއިލާގެ ފަރާތުން ވަރަށް ބޮޑު އެއްބާރުލުމެއް ލިބެމުންދާކަންވެސް އޭނާ ފާހަގަކުރެއްވިއެވެ.

މާރންސް ސްޕޯޓްސް އެކަޑަމީ ހޮނިހިރު ދުވަހު ފެށުމަށް ހަމަޖެހިފައިވާއިރު، މާރންސްގެ ރަސްމީ ލަވަ ވެސް ހޮނިހިރު ދުވަހުގެ ރަސްމިއްޔާތުގައި ލޯންޗު ކުރުން އޮންނާނެވެ. މި ލަވަ ތައްޔާރުކޮށްފައިވަނީ ރާއްޖޭގެ އެއް ނަމްބަރު ރެޕް މިއުޒިކް ބޭންޑް ސިމްބޮލިކްސް ރެކޯޑްސްއެވެ.