ޤާނޫނާއި ޚިލާފަށް ގެދޮރު ކުއްޔަށް ދީފިނަމަ ކޮންމެ މީހަކަށްވެސް ޝަކުވާ ހުށަހެޅޭނެ

ގެދޮރު ކުއްޔަށް ދިނުމުގައި ޤާނޫނާއި ޚިލާފަށް އަމަލުކުރާނަމަ ކޮންމެ މީހަކަށްވެސް ޝަކުވާ ހުށަހެޅޭނެކަމަށް ބަޔާންކޮށް މިކަމާއި ގުޅޭ ގަވާއިދު އާންމުކޮށްފިއެވެ.

ގެދޮރު ކުއްޔަށް ދިނުމުގައި ޤާނޫނާ ޚިލާފުވާ ކަންތައްތަކާއި ގުޅޭގޮތުން ޝަކުވާ ހުށަހެޅުމާއި ބެހޭ ޤާނޫނު ގެޒެޓުގައި ޝާއިއުކޮށްފައި ވާއިރު، މިއީ ޤާނޫނު ނަންބަރު 2021/21 (ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ޤާނޫނު) ގެ 40 ވަނަ މާއްދާއާއި 41 ވަނަ މާއްދާއަށް ރިޢާޔަތްކޮށް، އެ ޤާނޫނުގެ 49 ވަނަ މާއްދާގެ (ހ) ގެ ދެވަނަ ނަންބަރުގެ ދަށުން އެކުލަވައިލައިފައިވާ ގަވާއިދެކެވެ.

މި ގަވާއިދުގައިވާ ގޮތުން ދިރިއުޅުމަށްޓަކައި ގޯތިގެދޮރު ކުއްޔަށް ދިނުމާއި ބެހޭ ޤާނޫނުގެ ދަށުން ވެވޭ ކުލީގެ އެއްބަސްވުމަކާ ގުޅިގެން ނުވަތަ ކުއްޔަށްދޭ ތަނަކާ ގުޅިގެން ނުވަތަ ކުލީގެ މުޢާމަލާތަކާ ގުޅޭ އެނޫންވެސް ކަމަކާ ގުޅިގެން، ކުއްޔަށްދޭ ފަރާތާއި ކުއްޔަށްހިފާ ފަރާތަށް ޝަކުވާ ހުށަހެޅިދާނެއެވެ. އަދި ގަވާއިދުތަކާ ޚިލާފަށް ތަން ކުއްޔަށް ދީފައިވާނަމަ، ނުވަތަ ކުއްޔަށްދޭ ފަރާތުން ނުވަތަ ކުއްޔަށްހިފާ ފަރާތުން އެ ޤާނޫނާއި އެ ގަވާއިދުތަކާ ޚިލާފަށް އަމަލުކުރާނަމަ، އެކަމުގެ މައުލޫމާތު ލިބިފައިވާ ކޮންމެ މީހަކަށް ކައުންސިލަށް ޝަކުވާ ހުށަހެޅިދާނެކަމަށްވެސް މި ގަވާއިދުގައިވެއެވެ.

މި ގަވާއިދުގެ 3 ވަނަ މާއްދާގައި ބަޔާންކޮށްފައިވާ ކަންކަމާ ގުޅޭގޮތުން ކައުންސިލަށް ޝަކުވާ ހުށަހަޅަން ބޭނުންވާ ފަރާތްތަކުން ޝަކުވާ ހުށަހެޅޭނީ ސިޓީއަކުން، ނުވަތަ ލިޔުމަކުން، ނުވަތަ އީމެއިލްގެ ޒަރިއްޔާއިން، ނުވަތަ ކައުންސިލުން ޝަކުވާ ހުށަހެޅުމަށް އެހެން ގޮތެއް ހަމަޖައްސައިދީފައިވާނަމަ، އެ ގޮތެއްގެ މަތީންނެވެ. ޝަކުވާ އާއި ގުޅޭގޮތުން ކައުންސިލުން ގޮތެއް ނިންމުމުގެ ކުރިން އެ ޝަކުވާ އަނބުރާ ގެންދިއުމަށް ޝަކުވާ ހުށަހެޅި ފަރާތުން ބޭނުންވާނަމަ، ވީހާވެސް އަވަހަށް ލިޔުމުން، ނުވަތަ އީމެއިލްގެ ޛަރީޢާއިން، ނުވަތަ މިނޫންވެސް ގޮތަކަށް ކައުންސިލަށް އެކަން އަންގަންވާނެއެވެ.

ދިރިއުޅުމުގެ ބޭނުމަށް ގޯތިގެދޮރު ކުއްޔަށް ދިނުމާ ގުޅޭގޮތުން ކައުންސިލަށް ޝަކުވާއެއް ލިބިއްޖެނަމަ، އެ ޝަކުވާ ހުށަ ހެޅި މީހާއަށް ނުވަތަ ފަރާތަކަށް އެކަން ސިޓީއަކުން ނުވަތަ އީމެއިލްގެ ޛަރީޢާއިން އަންގަންވާނެއެވެ. ކައުންސިލަށް ހުށަހެޅޭ ޝަކުވާތައް ބެލުމަށް ކައުންސިލްތަކުގެ މެންބަރުންނާއި މުވައްޒަފުންގެ އަދަދަށް ރިއާޔަތްކޮށް، މަދުވެގެން ތިން މެންބަރުންގެ މައްޗަށް އެކުލެވޭ ކޮމެޓީއެއް ކައުންސިލުގައި އޮންނަންވާނެއެވެ. މި ގަވާއިދަށް އަމަލު ކުރަން ފަށާތާ ފަނަރަ ދުވަހުގެ ތެރޭގައި މި ކޮމިޓީ އެކުލަވައިލަންޖެހޭނެއެވެ.

މި ކޮމެޓީއަކީ ސިޓީއެއްގައި ނަމަ މޭޔަރު އެކުލަވައިލާ ކޮމެޓީއެކެވެ. އަދި ރަށެއްގައި ނަމަ، ރަށު ކައުންސިލުގެ ރައީސް އެކުލަވައިލާ ކޮމެޓީއެކެވެ. ކޮމެޓީގެ މެންބަރަކު އިސްތިޢުފާ ދީފިނަމަ، ގިނަވެގެން ތިން ދުވަހުގެ ތެރޭގައި، ބަދަލުގައި މެންބަރަކު އައްޔަނު ކުރަންވާނެއެވެ.

މި ގަވާއިދަށް އަމަލުކުރަން ފަށާފައިވަނީ މިމަހުގެ 18 ވަނަ ދުވަހުން ފެށިގެންނެވެ.