އިޖްތިމާއީ ބޯހިޔާވަހިކަމުގެ ދަށުން ދޫކުރާ މުޅި ތަން އެއްކޮށް ކުއްޔަށް ދޫނުކުރެވޭނެ: ގަވާއިދު
18 ފެބުރުއަރީ 2022 | ހުކުރު 02:14ކުއްޔަށް ދެވޭނީ އެ މަޝްރޫޢު ހިންގި އިދާރާއިން ކަނޑައަޅައިފައިވާ އުސޫލުތަކުގެ ދަށުން އެ އިދާރާއެއްގެ ހުއްދަ ލިބިގެން
ދިއްދޫގައި އަޅާފައިވާ ހައުސިން ޔުނިޓް
އިޖުތިމާޢީ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ފުލެޓްތަކާއި، ރޯހައުސްތަކާއި، ގޯތި ފަދަ ތަންތަން، މުޅިތަން އެއްކޮށް ކުއްޔަކަށް ނުދެވޭނެކަމަށް ބަޔާންކޮށް ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ރޯހައުސްތަކާއި ފުލެޓުތައް ފަދަ ތަންތަން ކުއްޔަށް ދިނުމުގައި ޢަމަލުކުރާނެ ޚާއްޞަ އުސޫލުތަކާ ބެހޭ ގަވާއިދު ގެޒެޓްކޮށްފިއެވެ.
މި ގަވާއިދުގެ މަގުސަދަކީ، ދިރިއުޅުމަށް ޓަކައި ގޯތިގެދޮރު ކުއްޔަށް ދިނުމުގައި ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ރޯހައުސްތަކާއި ފުލެޓުތައް ފަދަ ތަންތަން ކުއްޔަށް ދިނުމުގައި ޢަމަލުކުރާނެ ޚާއްޞަ އުސޫލުތަކެއް ބަޔާންކޮށް އާންމުކުރުމެވެ.
މިގަވާއިދުގައި ބޯހިޔާވަހިކަމުގެ މަޝްރޫޢުގެ ދަށުން ދޫކޮށްފައިވާ ތަންތަން ކުއްޔަށްދެވޭނެ ގޮތްތައް ވަނީ ބަޔާންކޮށްފައެވެ. އެގޮތުން އިޖުތިމާޢީ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ފުލެޓުތަކާއި، ރޯހައުސްތަކާއި، ގޯތި ފަދަ ތަންތަން ކުއްޔަށް ދެވޭނީ، އެ މަޝްރޫޢު ހިންގި އިދާރާއިން ކަނޑައަޅައިފައިވާ އުސޫލުތަކުގެ ދަށުން އެ އިދާރާއެއްގެ ހުއްދަ ލިބިގެންކަމަށް ގަވާއިދުގައި ބުނެފައިވެއެވެ. އަދި އެފަދަ ތަންތަން މުޅިތަން އެއްކޮށް ކުއްޔަށް ނުދެވޭނެކަމަށް ވަނީ ބަޔާންކޮށްފައެވެ.
ނަމަވެސް ތަނުގެ މިލްކުވެރިކަން، ތަން ދޫކުރެވުނު ފަރާތުގެ ނަމަށް ބަދަލުވެ ރަޖިސްޓަރީކުރެވިފައި ވާނަމަ، އެ ތަން އެއްކޮށް ކުއްޔަށް ދޫކުރުމުގެ ހުއްދަ ދިނުމަށާއި، ގަވާދުގައި ބުނެފައިވާ މުއްދަތަށްވުރެ އިތުރަށް ކުއްޔަށް ދޫކުރުމުގެ ހުއްދަ ދިނުމަށް ގަވާއިދު ހުރަހެއް ނާޅާއެވެ.
ގަވާއިދުގައި ބުނެފައިވަނީ މި ގަވާއިދަށް ޢަމަލުކުރަން ފަށާއިރު އަދި ޤާނޫނަށް ޢަމަލުކުރަން ފެށިފަހުން، އިޖުތިމާޢީ ބޯހިޔާވަހިކަމުގެ މަޝްރޫޢެއްގެ ދަށުން ދޫކޮށްފައިވާ ފުލެޓުތަކާއި، ރޯހައުސްތަކާއި، ގޯތި ފަދަ ތަންތަނުގެ ތެރެއިން އެއްކޮށް ކުއްޔަށް ދޫކޮށްފައިވާ ތަންތަން ކުއްޔަށް ދިނުމަށް ދޫކޮށްފައިވާ ހުއްދަތައް ބާތިލުވާނެކަމަށެވެ.
ބޯހިޔާވަހިކަމުގެ މަޝްރޫޢުގެ ދަށުން ދޫކޮށްފައިވާ ތަނެއް ނުވަތަ ތަނަކުން ބައެއް ކުއްޔަށްދިނުމަށް ހުއްދައަށް އެދި ހުށަހަޅަންޖެހޭ ލިޔެކިޔުމާއި، އެ ބޯހިޔާވަހިކަމެއްގެ ކަންކަން ހިންގި އިދާރާއަކުން ކުއްޔަށް ދިނުމަށް އިޢުތިރާޟު ނުކުރާކަން ބަޔާންކޮށް ދޫކޮށްފައިވާ ލިޔުން ހުށަހަޅަންވާނެއެވެ. އަދި ކުއްޔަށް ދިނުމަށް އެދެވޭނީ، އިޖުތިމާޢީ ބޯހިޔާވަހިކަމުގެ މަޝްރޫޢުތަކުގެ ދަށުން ބޯހިޔާވަހިކަން ލިބިފައިވާ ފަރާތަށެވެ.
އިޖުތިމާއީ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ތަންތަން އެންމެ ގިނަވެގެން ކުއްޔަށްދެވޭނީ 5 އަހަރުގެ މުއްދަތަށެވެ.
ބޯހިޔާވަހިކަމުގެ މަޝްރޫޢަކުން ލިބިފައިވާ ބޯހިޔާވަހިކަމެއް ނުވަތަ ބޯހިޔާވަހިކަމެއްގެ ބައެއް، މި ގަވާއިދާއި ޚިލާފަށް ނުވަތަ ޤާނޫނާއި ޤާނޫނުގެ ދަށުން ހަދައިފައިވާ ގަވާއިދުތަކާއި ޚިލާފަށް ކުއްޔަށް ދީފައިވާ މައްސަލައެއް ކައުންސިލަކަށް ރިޕޯޓުކޮށްފިނަމަ، ނުވަތަ އެފަދަ ކަމެއް ކައުންސިލަށް ފާހަގަކުރެވިއްޖެނަމަ، ބޯހިޔާވަހިކަމުގެ މަޝްރޫޢު ހިންގި އިދާރާއަށް، ކައުންސިލުން އެކަން އަންގަންވާނެއެވެ.
މިގަވާއިދަށް އަމަލުކުރަން ފަށާނީ ގެޒެޓްގައި ޝާއިއުކުރާ ދުވަހުން ފެށިގެންނެވެ.
