އުރީދޫ ދިވެހި ޕްރިމިއާ ލީގުގައި ސުޕަ ޔުނައިޓެޑް ސްޕޯޓްސް (ސަސް) ބަލިކޮށް ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން މޮޅަކާއެކު ލީގު ފަށައިފިއެވެ.

ގައުމީ ފުޓުބޯޅަ ދަނޑުގައި ބުރާސްފަތި ދުވަހު ހަވީރު ކުޅުު މެޗު މާޒިޔާއިން ކާމިޔާބުކުރީ 1-0 ގެ ނަތީޖާއަކުންނެވެ.

މިއީ މާޒިޔާއާ އަލަށް ހަވާލުވި ސާބިއާގެ ކޯޗު މަޔޮޑްރަގް ޖެސިކްގެ އިރުޝާދުގެ ދަށުން އެ ޓީމުން ކުޅުނު ފުރަތަމަ މެޗެވެ.

މެޗުގެ ފުރަތަމަ ހާފު ފަށައިގެން ދެ ޓީމަށް ވެސް ގޯލަށް ނުރައްކާކޮށް ނުރައްކާތެރި ހަމަލާއެއް އުފެއްދިފައިނުވާއިރު، މެޗުގެ 30 ވަނަ މިނެޓުގައި މާޒިޔާގެ އިބްރާހީމް އައިސަމް އަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އޭގެ ފަހުން ސަސްގެ މުޙައްމަދު ސަހާއު (ބޭލް) އޭރިއާ ބޭރުން ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ. އޭގެ ފަހުން ހަމްޒާ މުޙައްމަދު (ހަމްޕު) ފޮނުވާލި ހަމަލާ ސަސްގެ ކީޕަރު މުޙައްމަދު ޝަފީއު (ޗެކް) ވަނީ ދިފާއުކޮށްފައެވެ.

މެޗުގެ ފުރަތަމަ ހާފު ނިމެން ކައިރިވެފައިވަނިކޮށް މާޒިޔާއިން ވަނީ ސަސްގެ ގޯލަށް ފުލުފުލުގައި ހަމަލާތައް ފޮނުވާލާފައެވެ. އެގޮތުން ކޮނޭލިއަސް ސްޓެވާޓް އާއި ނަމަންޔާ ފޮނުވާލި ހަމަލާތަކުގެ ހުރަހަކަށްވީ ސަސްގެ ކީޕަރު ޗެކްއެވެ.

މި މެޗުގެ ދެވަނަ ހާފުގައި މާޒިޔާއިން ކުޅެން ފެށީ ދާދި ފަހުން އެ ޓީމާ ގުޅުނު ކުރިން ސްޕެނިޝް ލީގު ކުޅެފައިވާ ސްޕެއިންގެ މިޑްފިލްޑަރު ޓަނާ ކުޅެން އަރުވައިފައެވެ. މި ހާފުގައިވެސް މާޒިޔާއިން ވަނީ ސަސްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މި ހާފުގެ ކުރީކޮޅު އައިސަމްއަށް ވަނީ ލަނޑު ޖަހަން ހުސްފުރުސަތެއް ލިބި ބޭކާރުވެފައެވެ.

މާޒިޔާ މެޗުން މޮޅުވީ މެޗުގެ 78 ވަނަ މިނެޓުގައި ސްޓެވާޓް ކާމިޔާބުކޮށްދިން ލަނޑުންނެވެ. މި ލަނޑު އޭނާ ޖެހީ ހަމްޕުގެ އެހީތެރިކަމާއެކުގައެވެ.

އުރީދޫ ދިވެހި ޕްރިމިއާ ލީގުގައި ބުރާސްފަތި ދުވަހުގެރޭ ވެސް މެޗެއް ކުޅޭނެއެވެ. މި މެޗުގައި ކުޅޭނީ ކުލަބް އީގަލްސް އާއި ޓީސީ ސްޕޯޓްސް ކުލަބެވެ.