މޭރީގެ މަރު: މާވިން ޝަރީއަތް ނިމެންދެން ބަންދު ކުރުމަށް އަމުރު ކޮށްފި
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
މޭރީގެ މަރުގެ މައްސަލައިގައި ދައުލަތުން ދައުވާކުރަނީ މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުލަތުންދައުވާކުރަނީމޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށެވެ. އެގޮތުން މި މައްސަލައިގައި 20 ޖެނުއަރީ 2022 ވަނަ ދުވަހުގެ ހެނދުނު ކުރިއަށް ދިޔަ އަޑުއެހުމުގައި ވަނީ ދައުވާ ލިބޭމާވިންގެމައްސަލަ ވަކިން ކުރިއަށް ގެންގޮސްފައެވެ. އަދި މާވިންއަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދީ، އޭނާ 30 ދުވަހަށް ބަންދު ކުރުމަށް ނިންމައި އެ އަޑުއެހުން ވަނީ ނިންމާލާފައެވެ.
އެ ދުވަހުގެ އަޑުއެހުމުގައި މައްސަލަ ބައްލަވާ ގާޒީ ހުސައިން ފާއިޒު ރަޝާދު ވަނީ ވަކީލަކު އައްޔަނު ކުރެވުމުން ބަންދު މުރާޖައާ އަޑުއެހުމެއް ބާއްވަވާނެ ކަމަށް ވިދާޅުވެފައެވެ.
ބުރާސްފަތި ދުވަހުގެ އަޑުއެހުމުގައި ދައުލަތުން ވަނީ މާވިން ޝަރީއަތް ނިމެންދެން ބަންދު ކުރުމަށް އެދިލައްވާފައެވެ. އެގޮތުން އޭނާ ޝަރީއަތް ނިމެންދެން ބަންދު ކުރުމަށް ނިންމުމުގައި ބަލަންޖެހޭ ޝަރުތުތައް ފުރިހަމަވާކަމަށް ދައުލަތުގެ ވަކީލާ ވިދާޅުވިއެވެ.
އެކަމާ ގުޅިގެން ދިފާއީ ވަކީލު ވަނީ މާވިންއާއި ބައްދަލު ކުރެއްވުމަށް ބޮޑެތި ގޮންޖެހުންތަކާއި ހުރަސްތަކެއް ހުރިކަން ފާހަގަ ކުރައްވައި، އޭނާ މިހާރު ބަންދުކޮށްފައިވަނީ ޤާނޫނާ އެއްގޮތަށް ނޫންކަމަށް ވިދާޅުވެފައެވެ. އެކަމުގެ ސަބަބުން އެ ފަރާތްތަކުގެ ވަރަށް ގިނަ ޙައްޤުތައް ގެއްލިގެންދާކަން ވަކީލު ފާހަގަ ކުރެއްވިއެވެ. ޤާނޫނުގައި ބަޔާންކޮށްފައިވާ ގޮތަށް ޖަލަށް ބަދަލުނުކޮށް، ފުލުހުންގެ ކަސްޓޯޑިއަލްއެއްގައި ބަހައްޓާފައިވާތީ އެކަމުގެ ކަންބޮޑުވުންވެސް ވަކީލު ވަނީ ހިއްސާ ކުރައްވާފައެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި މާވިންއަށް ވާހަކަ ދެއްކުމުގެ ފުރުސަތު ދިނުމުން އޭނާވެސް ވަނީ ދޫނިދޫ ކަސްޓޯޑިއަލްގެ ބަދަލުގައި ޖަލަށް ބަދަލުކޮށްދިނުމަށް އެދިފައެވެ. އެގޮތުން ކަސްޓޯޑިއަލްގައި ހުންނަތާ 85ށް ވުރެ ގިނަ ދުވަސްވެފައިވާކަމަށް އެ ދުވަހު އޭނާ ބުނެފައިވެއެވެ. ބުރާސްފަތި ދުވަހުގެ އަޑުއެހުމުގައިވެސް އޭނާއަށް ވާހަކަ ދެއްކުމުގެ ފުރުސަތު ދީފައިވެއެވެ. އޭނާ ވަނީ ވަކީލާ ބައްދަލުނުވާކަން ފާހަގަކޮށް، އެ ފުރުސަތު ބޭނުންވާކަމަށް ބުނެފައެވެ.
އަދި ސިއްޙީ މައްސަލަތަކެއް ހުރިކަންވެސް އޭނާ ފާހަގަކުރިއެވެ. އެގޮތުން ހިރުގަނޑުން ލޭ އައުމުގެ މައްސަލަ ދިމާވާކަން އޭނާ ފާހަގަކުރިއެވެ.
މި މައްސަލައިގައި ދެފަރާތުން ދައްކާފައިވާ ވާހަކަތަކަށް ރިއާޔަތް ކުރައްވައި މައްސަލަ ބައްލަވާ ގާޒީ ހުސައިން ފާއިޒު ރަޝާދު ވަނީ އޭނާ ޝަރީއަތް ނިމެންދެން ބަންދު ކުރުމަށް އަމުރު ކުރައްވާފައެވެ. އަދި 15 ދުވަސްތެރޭ އޭނާ ރިމާންޑު ޖަލަކަށް ބަދަލު ކުރުމަށްވެސް ގާޒީ ވަނީ އަމުރު ކުރައްވާފައެވެ.
