ދިމާވި ޓެކްނިކަލް މައްސަލައަކާ ގުޅިގެން، ޕާކިންގ ސްލޮޓްތަކަށް ކުރިމަތިލުމުގެ ފުރުސަތު ބަންދުކޮށްފި
ޕާކިންގ ޒޯންތަކަށް ކުރިމަތިލުމުގެ ފުރުސަތު އަލުން ހުޅުވާލާފައިވަނީ ބުދަ ދުވަހު
ފިނޭންސް މިނިސްޓްރީއާ އިންވެގެން އޮންނަ ޕާކިންގ ޒޯން
މާލެ ސިޓީ ކައުންސިލުން މާލޭގައި ތަރައްގީކޮށްފައިވާ 211 ޕާކިންގ ސްލޮޓަށް އެދި ހުށަހެޅުމަށް ގާއިމްކޮށްފައިވާ ލިންކަށް ދިމާވި ޓެކްނިކަލް މައްސަލައަކާގުޅިގެން ޕާކިންގ ސްލޮޓްތަކަށް ކުރިމަތިލުމުގެ ފުރުސަތު ބަންދުކޮށްފިއެވެ.
މި 211 ޕާކިންގ ސްލޮޓަށް ކުރިމަތިލުމުގެ ފުރުސަތު ބުދަ ދުވަހު މާލެ ސިޓީ ކައުންސިލުން ވަނީ ހުޅުވާލާފައެވެ. އެހެންނަމަވެސް ޕާކިންގ ޒޯނަށް ކުރިމަތިލުމަށް ހުޅުވާލާފައިވާ ލިންކަށް ދިމާވި ޓެކްނިކަލް މައްސަލައަކާއި ގުޅިގެން ޕާކިންގ ސްލޮޓްތަކަށް ކުރިމަތިލުމަށް ކަނޑައެޅިފައިވާ ލިންކު ވަގުތީގޮތުން ވަނީ ބަންދުކޮށްފައެވެ. މާލެ ސިޓީ ކައުންސިލުން ބުނީ ލިންކަށް ދިމާވެފައިވާ މައްސަލަ ވީހާވެސް އަވަހަކަށް ހައްލުކޮށް ބުރާސްފަތި ދުވަހު ރަސްމީ ގަޑީގައި ހުޅުވާލާނެކަމަށް މާލެ ސިޓީ ކައުންސިލުން ބުނެފައިވެއެވެ.
މި 211 ޕާކިންގ ސްލޮޓަށް ކުރިމަތިލުމުގެ ފުރުސަތު މާލެ ސިޓީ ކައުންސިލުން ވަނީ މީގެ ކުރިންވެސް ހުޅުވާލާފައެވެ. އަދި ގުރު ނެގުންވެސް ކުރިއަށްގެންގޮސްފައިވާއިރު، ޕާކިންގ ސްލޮޓްތަކުގެ ގުރުލުން ކުރިއަށް ދިޔަ ގޮތާމެދު ވަރަށް ގިނަ ބަޔެއްގެ ހިތުގައި ވަނީ ސުވާލު އުފެދިފައެވެ. ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަ ނުޖެހުންތަކެއް ވަނީ އުފެދިފައެވެ.
އެހެންކަމުން މި މައްސަލަ އޭސީސީއަށް ވެސް ހުށަހަޅާފައިވެއެވެ. އޭސީސީން, އަލުން ގުރުއަތު ނެގުމަށް އެންގުމާއެކު، ފަހުންވެސް ގުރުއަތު ނެގުން ތާވަލު ކުރިއެވެ. ނަމަވެސް އިދާރީ މަސައްކަތެއް ނުނިމިގެން ގުރުއަތު ނެގުން ކެންސަލް ކުރުމަށްފަހު, ގުރުއަތު ނެގުން އޮތް ދުވަހު މި އިއުލާނު ވަނީ ބާތިލުކޮށްފައެވެ.
މި ޕާކިން ސްލޮޓްތަކަށް އަލުން ކުރިމަތިލުމަށް ހުޅުވާލާނެ ތާރީޚު ސިޓީ ކައުންސިލުން އާންމުކޮށްފައިވާއިރު، ބުދަ ދުވަހުން ފެށިގެން, އެކަމަށް ގާއިމުކުރެވިފައިވާ އޮންލައިން ޕޯޓަލް މެދުވެރިކޮށް މި ސްލޮޓްތަކަށް ކުރިމަތިލެވިގެންދާނެ ކަމަށް ސިޓީ ކައުންސިލުން ބުނެފައިވެއެވެ.
މި ޕާކިންގ ސްލޮޓްތަކަކީ މަހު ފީގެ ގޮތުގައި އަގު ނަގާގޮތަށް ކުއްޔަށް ދޫކުރެވޭ ސްލޮޓްތަކެކެވެ. މި ސްލޮޓްތަކުގެ ތެރޭގައި ޕްރައިވެޓް ކާރުތަކަށާއި، މާލޭގައި ދުއްވާ ޓެކްސީތައް އަދި 3.5 ޓަނުގެ ޕިކަޕްތަކަށް ޚާއްސަ ސްލޮޓްތައް ހިމެނެއެވެ. މިހާރު ގާއިމު ކުރެވިފައިވާ ޕާކިންގ ސްލޮޓުތަކުގެ ތެރެއިން %25 ޚާއްސަކުރެވިފައި ވަނީ މާލޭގައި ދުއްވާ ޓެކްސީތަކަށެވެ. ކޮންމެ ފަރުދަކަށްވެސް ތަފާތު ތިން ސަރަހައްދަކުން ޖާގައަށް އެޕްލައި ކުރެވޭނެއެވެ. މި ހުޅުވާލެވޭ ފުރުސަތުތަކުގެ ތެރޭގައި ގަރާޖުގެ ގޮތުގައި ސްލޮޓް ރެޖިސްޓްރީ ކުރުން ނުހިމެނެއެވެ.
މީގެ ކުރިން މި ސްލޮޓްތަކަށް ހުޅުވާލާފައިވާއިރު 211 ސްލޮޓަށް 969 މީހަކު ކުރިމަތިލާފައިވެއެވެ. މި ސްލޮޓްތަކަށް ކުރިމަތިލި ކޮންމެ މީހަކަށް ވެސް ސްލިޕެއް ހަވާލުކުރި ކަމަށް މާލޭ ސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުން ކޮށްފައިވަނީ މި ސްލިޕް ނަންބަރުތައް ކަމަށް ވެސް އެ ކައުންސިލުން ވަނީ ބުނެފައެވެ.
ބައެއް މީހުންނަށް ސްލިޕް ދޫކުރިއިރު ފޯމް ނަންބަރު ކައުންސިލުގެ ފަރާތުން ޖަހާފައި ނެތް މައްސަލަ ވެސް ވަނީ ފެންމަތިވެފައެވެ. އަދި މިފަދަ ގިނަ ސްލިޕްތަކެއް ވަނީ ސޯޝަލް މީޑިއާގައި ދައުރުވެފައެވެ. މިކަމާގުޅިގެން މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ, ނަންބަރުތައް ނެތް ސްލިޕް ހުރެދާނެ ކަމަށެވެ.
