ފުލުހުން އައްޑޫސިޓީގައި ސްޕީޑް ގަން ބޭނުން ކުރަން ފަށައިފި
ސްޕީޑް ގަން ގެ އެހީގައި ބާރަށް ދުއްވާ ފަރާތްތައް ފަސޭހައިން ދެނެގަނެވޭ
ފުލުހުން އައްޑޫގައި ހިންގާ ޚާއްސަ އޮޕަރޭޝަންގެ ތެރެއިން މީހަކު ހުއްޓުވައި ސުވާލު ކުރަނީ
ބާރު ސްޕީޑްގައި ދުއްވާ ފަރާތްތައް ދެނެގަތުމަށް ބޭނުންކުރާ ސްޕީޑް ގަން އައްޑޫގައި ބޭނުން ކުރަން ފަށައިފިއެވެ.
ބުދަ ދުވަހުގެ ހެނދުނު މިޚިދުމަތް ފެށީ ހިތަދޫ ބޮޑުމަގުގެ ސިޓީ ސެންޓްރަލް ކައިރީގައެވެ.
އައްޑޫ ސިޓީގެ މަގުތަކަކީ އަމާންތަނަކަށް ހެދުމުގެ ގޮތުން ފެބްރުއަރީ މަހުގެ ކުރީކޮޅުންފެށިގެން ފުލުހުން ގެންދަވަނީ ޚާއްސަ އޮޕަރޭޝަނެއް ހިންގަމުންނެވެ. އައްޑޫގެ ގުޅިފައިވާ އަވަށްތަކުގައި ކުރިއަށްދާ މި އޮޕަރޭޝަނާއެކު ބާރު ސްޕީޑްގައި ދުއްވާ ފަރާތްތަކާއި ނުރައްކާތެރިކޮށް ދުއްވާ އުޅަނދުތައް ފާހަގަކުރެވިފައިވާކަމަށް ފުލުހުންވަނީ ހާމަކޮށްފައެވެ.
ބުދަ ދުވަހުން ފެށިގެން ސްޕީޑް ގަން ބޭނުން ކުރަނީ މިކަންކަން އިތުރަށް މޮނިޓަރކޮށް ބެލުމަށްޓަކައިކަމަށް ފުލުހުން ވިދާޅުވެއެވެ.
މަގުމަތީގައި ހިނގާ ގިނަ އެކްސިޑެންޓްތައް ހިނގާފައިވަނީ ބާރު ސްޕީޑްގައި ދުއްވުމުންނާއި ނުރައްކާތެރިކޮށް ދުއްވުމުންކަން ފާހަގަކުރައްވަމުން ޕޮލިސް އިންސްޕެކްޓަރ އާމިނަތު ރަޝީދު ވިދާޅުވީ މިހާރު ޢަމަލު ކުރަމުންދާ ގާނޫނުން ބާރު ލިބިގެން އެފަދަ ކުށް ކުރާ ފަރާތްތަކަށް ހަރުކަށި ފިޔަވަޅު ތަންފީޒު ކުރެވެމުން އަންނަ ކަމަށާއި އެހެންކަމުން މިކަމަށް ޢާއްމުން ހޭލުންތެރި ވުމަށް އިލްތިމާސް ކުރައްވާ ކަމަށެވެ.
ބާރު ސްޕީޑްގައި ދުއްވުމުގެ ސަބަބުން އަޅާ ގާނޫނީ ފިޔަވަޅު އޮންނަނީ ފުރަތަމަ ފަހަރަށް އެގޮތަށް ދުއްވުމުން 500 ރުފިޔާއިން ޖޫރިމަނާ ކުރުމަށެވެ. އެ ކުށް ތަކުރާރުކޮށްފިނަމަ 48 ގަޑި އިރަށް ލައިސެންސް ހިފެހެއްޓުމަށްފަހު 750 ރުފިޔާއިން ޖޫރިމަނާ ކުރެވެއެވެ. އަދި 3 ވަނަ ފަހަރު ކުށަށް އަރައިގަތުމުން އެދުއްވި އުޅަނދެއް 15 ދުވަހަށް ޓޯ ކުރުމަށް ފަހު 1000 ރުފިޔާއިން ޖޫރިމަނާ ކުރެވެއެވެ.
ނުރައްކާތެރި ދުއްވުންތަކަކީ މަގުމަތީގައި އެހެން މީހުންނަށް އުނދަގޫ ވާގޮތަށް ޒިގްޒެކްކޮށް ދުއްވުމާއި މަސްތުގެ ޙާލުގައި ހުރެގެން ދުއްވުމާއި މަޑުކުރަން ޖެހޭ ގޯޅި ނުވަތަ ބަންޕަރަށް މަޑު ނުކޮށް ދުއްވުމާއި ބެލުމެއް ނެތި އޯވަޓޭކް ކުރުންފަދަ ކަންކަމެވެ. ނުރައްކާތެރިކޮށް ދުއްވައިފިއްޔާ އެއުޅަނދެއް 30 ދުވަހަށް ޓޯ ކުރެވެއެވެ.
އައްޑޫގައި އަލަށް ބޭނުންކުރަން ފެށި ސްޕީޑް ގަން އަކީ، ބާރު ސްޕީޑުގައި ދުއްވާ އުޅަނދާއި އުޅަނދު ދުއްވަން އިންނަ މީހާގެ ފޮޓޯ، ނަގައި ވަގުތުން ވީޑިއޯ ރެކޯޑްކުރެވޭ ނިޒާމެކެވެ. އަދި އުޅަނދުގެ ރަޖިސްޓްރީ ނަންބަރު ރެކޯޑްކުރެވި، އުޅަނދު ދުއްވި ސްޕީޑާއި ދުރުމިން ވަގުތުން އަންގައިދެއެވެ. ފުލުހުން ބޭނުން ކުރާ ސްޕީޑް ގަން އިން 320 ކިލޯ މީޓަރު ބާރުމިނުގައި ދުއްވާ އުޅަނދުތައްވެސް މަދު ސިކުންތުކޮޅެއްގެ ތެރޭގައި ރެކޯޑްކޮށް، ރެކޯޑްތައް ރައްކާކުރެވެއެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން ޓްރެފިކް ފުލުހުން ކުރިއަށް ގެންދާ އެކިއެކި އޮޕަރޭޝަންތަކުގައި، ބާރު ސްޕީޑްގައި ދުއްވާ ފަރާތްތައް ދެނެގަތުމަށް ސްޕީޑް ގަން ދަނީ ބޭނުން ކުރެވެމުންނެވެ. އައްޑޫސިޓީއަކީ މަގުމަތީގެ ހިތާމަވެރި ޙާދިސާތައް ގިނައިން ހިނގާ ސިޓީއަކަށްވެފައި މިކަން ޙައްލު ކުރުމަށްޓަކައި ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން އައްޑޫސިޓީ ކައުންސިލާއި މޯލްޑިވްސް ޕޮލިސް ސާވިސް ގުޅިގެންވެސް ހަރުދަނާ މަސައްކަތްތަކެއް ފެށުމަށް މިހަފްތާގެ ތެރޭވެސް ވަނީ ބައްދަލުވުންތައް ބާއްވާފައެވެ.
