ދޮގު މާލީ ބަޔާން ހުށަހަޅައިފިނަމަ 500،000 ރުފިޔާއިން ޖޫރިމަނާ ކުރެވޭ ގޮތަށް ބިލެއް ހުށަހަޅައިފި
ޖެނުއަރީ މަހުގެ 12 ވަނަ ދުވަހު ރައްޔިތުންގެ މަޖިލީހަށް ހުށަހެޅި މި ބިލުގެ ފުރަތަމަ ކިޔުން އިއްވީ އަންގާރަ ދުވަހުގެ
އީވާ އަބްދުﷲ - ރައްޔިތުންގެ މަޖިލީހުގެ ނައިބު ރައީސް
މާލީ ބަޔާން ހުށަހެޅުމަށް ގާނޫނުއަސާސީގައި ލާޒިމްކޮށްފައިވާ މީހުންގެ މާލީ ބަޔާނުގައި ތެދު ނޫން މައުލޫމާތު ހިމެނޭނަމަ ފަސް ލައްކަ ރުފިޔާއިން ޖޫރިމަނާ ކުރުމާއި ޖަލަށް ލެވޭ ގޮތަށް ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
ސަރުކާރުގެ ފަރާތުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހެޅުއްވި މި ބިލަކީ، މާލީ އަދި އެހެނިހެން މަޞްލަޙަތުތައް ހާމަކުރުމުގެ ބިލެވެ. ބިލުގައިވާ ގޮތުން ދޮގު މާލީ ބަޔާން ހުށަހަޅައިފިނަމަ ފަސް ލައްކަ ރުފިޔާއިން ޖޫރިމަނާކޮށް 2 އަހަރަށް އެމީހަކު ޖަލަށް ލެވޭނެއެވެ.
ބިލު ހުށަހެޅުމުގެ މަގްސަދަކީ، މާލީ ބަޔާން ހުށަހަޅަންޖެހޭ މީހުންނާއި، ދައުލަތުގެ މަގާމުތައް އަދާކުރާ މީހުންގެ މަލީ އަދި އެހެނިގެން މަސްލަހަތު ހާމަކުރުމުގެ ނިޒާމު ހަރުދަނާ ކުރުމާއެކު ދެފުށް ފެންނަ ގޮތަކަށް މާލީ ބަޔާން ހުށަހެޅުމުގައި އަމަލުކުރަންޖެހޭ އުސޫލްތަކާއި މިންގަޑުތައް ކަނޑައެޅުމެވެ.
ބިލުގައިވާ ގޮތުން މާލީ ބަޔާންތަކުގެ ސައްޚަކަން ކަށަވަރުކުރާ މުއައްސަސާއަކުން އަންގާ އެންގުމަކާއި ޚިލާފުވެއްޖެނަމަ މައްސަލައިގެ ކުޑަ ބޮޑު މިނަށް ބަލައި އެއްލައްކަ ރުފިޔާއިން ޖޫރިމަނާ ކުރެވޭނެއެވެ. އަދި އެކަން ތަކުރާރުކުރާ ކޮންމެ ފަހަރަކު ގިނަވެގެން ފަސް ލައްކަ ރުފިޔާއިން ޖޫރިމަނާ ކުރެވޭނެއެވެެ.
ސުންގަޑީގެ ކުރިން މާލީ ބަޔާން ހުށަނައަޅައިފިނަމަ ލަސްވި މުއްދަތަށް ބަލައި އެއްލައްކަ ރުފިޔާއިން ޖޫރިމަނާކުރެވޭނެއެެވެ. އަދި އެކަން ތަކުރާރުކުރާ ކޮންމެ ފަހަރަކު ގިނަވެގެން ފަސް ލައްކަ ރުފިޔާއިން ޖޫރިމަނާ ކުރެވޭނެއެވެެ.
ދޮގު މާލީ ބަޔާން ހުށަހަޅައިފިނަމަ ގިނަވެގެން ފަސް ލައްކަ ރުފިޔާއިން ޖޫރިމަނާކޮށް 2 އަހަރަށް ޖަލަށް ލެވޭނެ ކަމަށް ބިލުގައިވެއެވެ. އަދި އެމީހަކު ހުރި މަގާމަކުން ވަކިކޮށް ތަހުގީގު ކުރެވޭނެ ކަމަށްވެސް ބިލުގައި ބަޔާން ކޮށްފައިވެއެވެ.
ގާނޫނުގައި ބަޔާންކޮށްފައިވާ ގޮތަށް ޚިލާފަށް ސިއްރު ޝަކުވާއަކާ ގުޅޭ މައްސަލައެއް އާއްމުކޮށް، ބަޔާނެއް ނައްތާލައިފިނަމަ އެއް އަހަރު ދުވަހުގެ ޖަލު ހުކުމަކާއެކު ގިނަވެގެން އެއްލައްކަ ރުފިޔާއިން ޖޫރިމަނާ ކުރެވޭނެއެވެ.
މި ގާނޫނުގެ ދަށުން ކުށެއްގެ ދައުވާކޮށް ޝަރީއަތަށް ހުށަހަޅާ މައްސަލަތައް ގިނަވެގެން 60 ދުވަހުގެ ތެރޭގައ ބަލައި ހުކުމް ކުރަންވާނެ ކަމަށްވެސް ބިލުގައި ބުނެފައިވެއެވެ.
ޖެނުއަރީ މަހުގެ 12 ވަނަ ދުވަހު ރައްޔިތުންގެ މަޖިލީހަށް ހުށަހެޅި މި ބިލުގެ ފުރަތަމަ ކިޔުން އިއްވީ އަންގާރަ ދުވަހުގެ ޖަލްސާގައެވެ.
މާލީ ބަޔާން ހުށަހެޅުމުގައި އަމަލުކުރަން ޖެހޭނެ އުސޫލުތައްބިލުގައި ވަރަށް ތަފްސީލުކޮށް ހިމަނާފައިވާއިރު، އެކަމުގައި އެކިއެކި ޒިންމާތައް އަދާކުރާނެ އިދާރާތަކުގެ މަސްއޫލިއްޔަތުތައް ބަޔާންކޮށްފައިވެއެވެ.
