ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސްކަމަށް އާސިމަށް ރުހުން ދީފި
ކޮމިޓީގައި ތިއްބެވި 11 މެމްބަރުންގެ ތެރެއިން 10 މެމްބަރުންވަނީ އާސިމަށް ރުހުންދޭން ފެންނަ ކަމަށް ވޯޓުދެއްވާފައި
އެސްއޯއީ ކޮމިޓީގެ ބައދަލުވުމެއްގެ ތެރެއިން
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސަކަށް އައްޔަން ކޮށްފައިވާ ގ.މެޒަރިން، އާސިމް މުހައްމަދަށް ކޮމިޓީން ރުހުންދީފިއެވެ.
ރުހުން ހޯއްދެވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި މައްސަލަ ދިރާސަކުރީ ސްޓޭޓް އޯންޑް އެންޓަރޕްރައިޒަސް ކޮމިޓީންނެވެ. އެ ކޮމިޓީގައި އަންގާރަ ދުވަހު އޮތް ބައްދަލުވުމުގައިވަނީ އާސިމާއި އިންޓަރވިއު ކުރައްވާފައެވެ. އެއަށްފަހު ކޮމިޓީގައި ތިއްބެވި 11 މެމްބަރުންގެ ތެރެއިން 10 މެމްބަރުންވަނީ އާސިމަށް ރުހުންދޭން ފެންނަ ކަމަށް ވޯޓުދެއްވާފައެވެ.
ޕްރައިވެޓައިޒޭޝަން ބޯޑުގެ ރައީސްކަމަށް އާސިމް އައްޔަންކުރައްވާފައިވަނީ މިދިޔަ ޑިސެމްބަރު މަހުގެ 15 ވަނަ ދުވަހުއެވެ. ކުރިން އާސިމް ހުންނެވީ އެ ބޯޑުގެ ނާއިބު ރައީސް ކަމުގެ މަގާމުގައެވެ.
ޕްރައިވެޓައިޒޭޝަން ބޯޑުގައި އާސިމްގެ އިތުރުން ދެން ތިއްބެވި މެންބަރުންނަކީ އައިޝަތު ޝާޒްލީ އާއި، އަލީ ޝަފީއު އާއި، އަހްމަދު ޝަރީފް ޔޫސުފް އާއި، ރުޝާހާ އަހަމްދު ޝަރީފްގެ އިތުރުން އަލީ ސުޖާއުއެވެ.
ކޮމިޓީއަށް މި މައްސަަލަ ފޮނުއްވިކަން އިއުލާން ކުރައްވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ދައުލަތުގެ ކުންފުނިތައް ޕްރައިވެޓައިޒް ކޮށްގެން 771 މިލިއަން ރުފިޔާ ހޯދުމަށް ދައުލަތުގެ މިއަހަރު ބަޖެޓުގައި ހިމަނާފައިވާ ކަމަށެވެ.
