ޕެސްޓިސައިޑް އެކުލެވޭތީ "ސްޓާރސް" ބްރޭންޑުގެ ސްޕްރިންގ އަނިއަން ބޭނުން ނުކުރުމަށް އަންގައިފި
އެއީ މިސްރުގެ އުފެއްދުމެއް
ސްޓާރސް ބްރޭންޑުގެ ސްޕްރިންއަނިއަން
ރާއްޖެ އެތެރެކޮށްފައިވާ "ސްޓާރސް" ބްރޭންޑުގެ ސްޕްރިންގ އަނިއަން އިން "ޕެސްޓިސައިޑް" ފެނިފައިވާކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ. ސްޕްރިންގ އަނިއަން އަކީ ފިޔާގަހުގެ ބާވަތެކެވެ.
ޕެސްޓިސައިޑަކީ ގަސްތަކަށް ނުރައްކާކުރުވާ ކުދި ސޫފިތައް މެރުމަށް ބޭނުންކުރާ ބޭހެވެ. އެމްއެފްޑީއޭއިން ބުނީ ޕެސްޓިސައިޑުން ތަޣައްޔަރުވެފައިވާ އުފެއްދުމެއް ކަމުގައިވާ ސްޓާރސް ބްރޭންޑުގެ ސްޕްރިންގ އަނިއަން ރާއްޖެއަށް އެތެރެވެފައިވާ ކަމަށް ޔޫރަޕުގެ ރެޕިޑް އެލާޓް ސިސްޓަމް ފޮރ ފުޑް އެންޑް ފީޑުން އަންގާފައިވާކަމަށެވެ.
މިއީ މިސްރުގެ އުފެއްދުމެއް ކަމަށާއި، މި އުފެއްދުން ހޯލްސޭލް ކޮށްފައި ވަނީ ނެދަރލެންޑްސްގެ ކުންފުންޏެއް ކަމުގައިވާ ގްލޯބަލް ގްރީން ޓީމުން ކަމަށް އެމްއެފްޑީއޭއިން ބުނެފައިވެއެވެ. އެމްއެފްޑީއޭއިން ބުނީ މި އެލާޓާއި ގުޅިގެން މިއުފެއްދުމުގެ ސަބަބުން ކާބޯތަކެތީގެ ރައްކާތެރިކަމަށް އޮތް ޔަގީންކަމުގެ މިންވަރު ދެނެގަތުމުގެ މަސައްކަތް އެ އޮތޯރިޓީން ކުރަމުންދާކަމަށެވެ.
އެހެންކަމުން އެ އޮތޯރިޓީން ވަކި ގޮތެއް އަންގަންދެން މިސްރުގެ ސްޓާރސް ބްރޭންޑުގެ ސްޕްރިންގ އަނިއަން ނުވަތަ ކުދި ފިޔާ އަދި ފިޔާ ގަސް ނުވިއްކުމަށާއި، ބޭނުން ނުކުރުމަށް ވަނީ އަންގާފައެވެ.
