މަޝްވަރާއަކީ ވަކިގޮތަކަށް ކަންކަން ނިންމުން ކަމަށް ދެކުމަކީ ގޯހެއް – މައުސޫމް
ރާއްޖެއަކީ ތިމާވެއްޓާއި ރައްޓެހި ފަތުރުވެރިކަމެއް ކުރާ ގައުމެއް
ޓޫރިޒަމް މިނިސްޓަރ ޑރ އަބްދުﷲ މައުސޫމް މަޖިލީހަށް ވަޑައިގެން މައުލޫމާތު ދެއްވަނީ
ދުރު ރާސްތާއަށް ޕްލޭންކޮށްގެން މަޝްވަރާ ކުރުމަކީ ވަކިގޮތަކަށް ކަންކަން ނިންމުން ކަމަށް ދެކުމަކީ ގޯހެއް ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމް މިހެން ވިދާޅުވީ ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވަޒީރުންނާއި ސުވާލުކުރުމުގެ ބައިގައި، މަހިބަދޫ ދާއިރާގެ މެންބަރު ކުރި ސުވާލަށް ޖަވާބު ދެއްވަމުންނެވެ.
މަހިބަދޫ ދާއިރާގެ މެންބަރު ތޯރިގު ކުރެއްވި ސުވާލަކީ 21 ޑިސެމްބަރ 2021 ވަނަ ދުވަހު އަތޮޅު ކައުންސިލަށް ފޮނުވާފައިވާ ސިޓީގައި ވަނީ 8 ފަޅެއް ޓުއަރިޒަމްގެ ބޭނުމަށް ދުކުރުމަށް ފެންނަ ކަމަށެވެ. މި ސިޔާސަތުގެ ދަށުން އަރިއަތޮޅުގައި ޓުއަރިޒަމް ތަރައްގީކުރުމަށް ފަޅުރަށެއް ނުވެސް ނެތް ކަމަށާއި، ރާއްޖޭގެ އެތައް ރަށެއް ތަރައްގީ ނުވެ ހުއްޓާ އަނެއްކާ އަރިއަތޮޅުން ފަޅުތަކެއް ދޫކުރުމަށް މީހުން ދިރިއުޅޭނެ ފަޅެއް ވެސް ނުބާއްވާ ނިންމަނީ ކޮން ސިޔާސަތަކުންތޯ ސުވާލު ކުރެއްވިއެވެ.
އަދި ރައީސް އިބްރާހިމް މުހައްމަދު ސޯލިހުގެ އަދި ރައްޔިތުންގެ މަޖިލީހުގެ އިންތިހާބުގެ ދުވަސްވަރު ވެސް ވައުދުފުޅަކީ އދ. މަހިބަދޫ ރައްޔިތުންނާއި ކުބުރުދޫ ރައްޔިތުންނަށް މާފަރު ފަޅޭ ކިޔުނު ފަޅު ތަރައްގީކޮށް އެތަނުގައި ދިރިއުޅެވޭނެ ގޮތް ހެއްދެވުން ކަމަށާއި، ރައީސުލްޖުމްހޫރިއްޔާގެ ސިޔާސަތާއި މިނިސްޓަރުގެ ސިޔާސަތާވެސް ތަފާތު ކަމަށެވެ. އަދި މީގެ އިތުރުން ހަންޏާމީދޫ އިހްތިސާސްތެރޭގައި ހިމެނޭ ދެ ފަޅެއް ވެސް ޓުއަރިޒަމްގެ ބޭނުމަށް ވިއްކާލުމަށް މިނިސްޓަރ ތައްޔާރުވެވަޑައިގަންނަވަމުންދާ ކަމަށް މެންބަރު ތޯރިގުގެ ސުވާލުގައި ވިދާޅުވިއެވެ.
މެންބަރުގެ ސުވާލަށް ޖަވާބުދެއްވަމުން މިނިސްޓަރ ވިދާޅުވީ ދިވެހިރާއްޖޭގެ ޓުއަރިޒަމްއަށް 50 އަހަރު ފުރުން ފާހަގަކުރުން ފެށިގެން ކުރިއަށްދާ ކަމަށާއި، އޮކްޓޯބަރ 3 ވާނީ ޓުއަރިޒަމްއަށް 50 އަހަރު ފުރޭ ދުވަހަށް ކަމަށެވެ. ރާއްޖޭގެ ޓުއަރިޒަމް ދުނިޔޭގެ ބައިނަލްއަގުވާމީ ތަފާތު އެވޯޑްތައް ހޯދާފައިވާ އިރު، ތިމާވެއްޓާއި ރައްޓެހި ތިމާވެށީގެ މާހިރުން ގަބޫލުކުރާ ސިޔާސަތުތަކެއް އެކަށައެޅި އެގޮތަށް ކަންތައްތައް ކުރެވެމުންދާ މަންޒިލެއްގެ ގޮތުގައި ފާހަގަކުރެވިފައި ކަމަށެވެ. ހާއްސަ ގޮތެއްގައި މުޅި ދުނިޔޭގެ ސުރުހީތަކަށް އަރަމުންދާ ފްލޯޓިންގ ސިޓީ ހޮޓާ ވެގެންދާނީ ރާއްޖެ އެހެން މިނަކަށް ގެންދާނެ މަސައްކަތަކަށް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޓުއަރިޒަމްގެ ކާމިޔާބީއަށް ބަލާއިރު، އެންމެ ބޮޑު ކާމިޔާބީއެއް އޮންނަނީ ދުރު ރާސްތާ ޕްލޭނަށް ކަމަށެވެ. އަދި ވަކިން ހާއްސަކޮށް ޓުއަރިޒަމް މިނިސްޓްރީން ގަބޫލުކުރާ ގޮތުގައި ލާމަރުކަޒީ ގާނޫނުގެ ދަށުން ކައުންސިލްތަކަށް ދީފައިވާ ބާރާއި އިހްތިޔާރު ޒިންމާ އެއީ ހަމައެކަނި ގަނޑެއްގައި ލިޔެވިފައިވާ އެއްޗެއް ނޫން ކަމަށެވެ.
މިނިސްޓަރ ވިދާޅުވީ އެފަދަ މަޝްވަރާއަށް އަހާފައި އެމީހުން ބުނާ ކޮންމެ ކަމެއް ސަރުކާރުން ނުކުރެވިދާނެ ކަމަށާއި ސަރުކާރުން މުޅި ދައުލަތަށް ވިސްނަން ޖެހޭ ކަމަށެވެ. ލާމަރުކަޒީ ގާނޫނުން ދޭ ބާރު އަތޮޅު ކައުންސިލަށް ދޭން ބޭނުންވާ އިރު، އަތޮޅު ކައުންސިލަށް ފޮނުވި ސިޓީއަކީ ދުރު ރާސްތާ ޕްލޭންގައި ބޭނުންވާ ކަންތައް ކަމުން އެ ވާހަކަ އައްސަވާފައިވާ ކަމަށެވެ. މިނިސްޓަރ ވިދާޅުވީ އއ އަދި އދ އަތޮޅަކީ ފަތުރުވެރިކަމުގެ މުހިންމު މަންޒިލެއް ކަމަށެވެ.
