ޖޭއެސްސީގެ މެމްބަރުންގެ 5 އަހަރުގެ މުއްދަތު 3 އަހަރަށް ބަދަލު ކުރެއްވުމަށް ތޯރިޤު ހުށައަޅުއްވައިފި
އިންސާފު ގާއިމުކުރުމުގެ ބާރަށް ލިބިދޭ މިނިވަންކަމާ މުސްތަގިއްލު ކަމަށް ހުރަސް އެޅެމުންދާކަމަށް ވިދާޅުވި
މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް (ޓޮމް)
ޖޭއެސްސީގެ މެމްބަރުންގެ 5 އަހަރުގެ މުއްދަތު 3 އަހަރަށް ބަދަލު ކުރެއްވުމަށް މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް (ޓޮމް) ހުށައަޅުއްވައިފިއެވެ.
ޖޭއެސްސީ އެކުލަވާލާފައިވާ ގޮތް ބަދަލުކުރުމަށް ހުށައެޅުއްވި މި ބިލުގައި ވަނީ މިހާރު ޖޭއެސްސީ އެކުލަވާލާފައިވާ ގޮތުން ގާނޫނު އަސާސީގެ ހަވަނަ ބާބުން އިންސާފު ގާއިމުކުރުމުގެ ބާރަށް ލިބިދޭ މިނިވަންކަމާ މުސްތަގިއްލު ކަމަށް ހުރަސް އެޅެމުންދާކަމަށް ބަޔާން ކުރައްވާފައެވެ. މި ބިލު ކުރިންވެސް މަޖިލީހަށް ހުށައެޅުއްވިއެވެ. ނަމަވެސް ބިލު ބަލައިނުގަތުމަށް އޭރު މަޖިލީހުގެ އަޢުލަބިއްޔަތުން ވަނީ ފާސްކޮށްފައެވެ.
މި ބިލުގައި ބަޔާންކޮށްފައިވަނީ ޖޭއެސްސީ އެކުލަވާލުމުގައި ގާނޫނު ހެދުމުގެ ބާރާއި، ވެރިކަން ހިންގުމުގެ ބާރުގެ ފަރާތުން ތަމްސީލުކުރާ ފަރާތްތަކަކީ ސިޔާސީ ފަރާތްތަކަށް ވުމުގެ ސަބަބުން، އެފަރާތްތަކުން ބައިވެރިވެގެން އެ ކޮމިޝަނުން ބަލާ މައްސަލަތަކުގަޔާއި އަދި ނިންމާ ނިންމުންތަކުގައި ސިޔާސީ ނުރަނގަޅު ނުފޫޒާއި ބާރު އެކުލެވިގެންދާ ކަމަށެވެ.
ތޯރިޤު ހުށައެޅުއްވި ބިލުގައި ވަނީ ޖޭއެސްސީއަށް މެމްބަރުން އިންތިޚާބު ކޮށްގެން ހޮވުމަށް ފެންނަކަމަށް ބަޔާން ކުރައްވާފައެވެ. އެގޮތުން އިސްލާހުގައި ވަނީ ރައްޔިތުންގެ މަޖިލީހުގެ ރައީސްއާއި މަޖިލީހުގެ މެމްބަރާއި ސީއެސްސީގެ ރައީސްގެ އިތުރުން ބަންޑާރަ ނައިބު އެ ކޮމިޝަނުން އުނިކުރުމަށެވެ. އޭގެ ބަދަލުގައި ހުށައަޅުއްވާފައިވަނީ އުއްތަމަ ފަނޑިޔާރާއި ފަނޑިޔާރުންގެ ތެރެއިން ޝަރަފުވެރިކަމާއެކު މުސްކުޅިކޮށްފައިވާ ފަނޑިޔާރުންގެ ތެރެއިން އިންތިހާބު ކުރާ ފަނޑިޔާރަކާއި ގާނޫނީ ވަކީލުންގެ ތެރެއިން އިންތިހާބު ކުރެވޭ އަންހެން ވަކީލެއްގެ އިތުރުން ރާއްޖޭގެ ޔުނިވަރސިޓީތަކުގައި އިސްލާމީ ޝަރީއަތުގެ އިލްމު ކިޔަވާދޭ ދާރިސުންގެ ތެރެއިން އިންތިހާބު ކުރާ ދާރިސެއް ކޮމިޝަނުގައި ތިއްބަވާ ގޮތަށް ހިމެނުމަށެވެ.
އަދި ޖޭއެސްސީގެ މެމްބަރުންގެ 5 އަހަރުގެ މުއްދަތު 3 އަހަރަށް ބަދަލު ކުރެއްވުމަށްވެސް ވަނީ ހުށައަޅުއްވާފައެވެ. އަދި ވިދިވިދިގެން އެއްވެސް މީހަކަށް ޖޭއެސްސީގެ މެމްބަރެއްގެ ގޮތުގައި ނުހުރެވޭގޮތަށް ވަނީ ހުށައަޅުއްވާފައެވެ.
ޖޭއެސްސީގައި ތިއްބަވަނީ ރައްޔިތުންގެ މަޖިލީހުގެ ރައީސް އާއި މަޖިލީހުގެ މެންބަރަކާއި ބަންޑާރަ ނައިބު އާއި ރައީސް އައްޔަން ކުރައްވާ ބޭފުޅެކެވެ. ދެން އެ ކޮމިޝަންގައި ތިއްބަވާނީ ރައްޔިތުންގެ މަޖިލީހުން ކަނޑައަޅާ އާންމުންގެ މެމްބަރާކާއި، ސިވިލް ސާވިސް ކޮމިޝަންގެ ރައީސްއާއި، ސުޕްރީމް ކޯޓުގެ ފަނޑިޔާރަކާއި، ހައި ކޯޓުގެ ފަނޑިޔާރަކާއި، ދަށު ކޯޓުތަކުން ފަނޑިޔާރަކާއި، ގާނޫނީ ވަކީލުންގެ ތެރެއިން އިންތިހާބު ކުރެވޭ ގާނޫނީ ވަކީލެކެވެ.
