"މިހާރު ނުހެދި ހުރި ރަށްތަކުގެ 50 އިންސައްތަ ނިންމަންވެސް 900 މިލިއަން ޑޮލަރު ބޭނުންވާނެ"
ރަށްތައް ތަރައްޤީ ކުރުމަށް ބޭނުންވާ އިންވެސްޓްމަންޓުތައް ހޯދުމަށް ގިނަ މަސައްކަތްތަކެއް ސަރުކާރުން ރާވަމުންދޭ
ޓޫރިޒަމް މިނިސްޓަރ ޑރ އަބްދުﷲ މައުސޫމް މަޖިލީހަށް ވަޑައިގެން މައުލޫމާތު ދެއްވަނީ
ފަތުރުވެރިކަމުގެ ބޭނުމަށް ދޫކޮށް ނުހެދި ހުރި ރަށްތަކުގެ 50 އިންސައްތަ މަސައްކަތް ނިންމަންވެސް މަދުވެގެން 900 މިލިއަން ޑޮލަރު ބޭނުންވާނެކަމަށް ޓޫރިޒަމް މިނިސްޓަރ ޑރ އަބްދުﷲ މައުސޫމު ވިދާޅުވެއްޖެއެވެ.
ހޯމަ ދުވަހުގެ މަޖިލިސް ޖަލްސާއަށް ވަޑައިގެން ކާށިދޫ ދާއިރާގެ މެމްބަރު އަބްދުﷲ ޖާބިރު ކުރެއްވި ސުވާލަަކަށް ޖަވާބު ދެއްވަމުންނެވެ. އެގޮތުން މެމްބަރު ޖާބިރު ކުރެއްވި ސުވާލުގައި ވަނީ ފަތުރުވެރިކަމުން އެހާ ބޮޑު ނަފާއެއް ލިބިގެންދާއިރު، ރަށްރަށް ނުހެދި ހުންނަ އަސްލު ސަބަބަކީ ކޮބައިތޯ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން މިނިސްޓަރ މައުސޫމު ވިދާޅުވީ، މެމްބަރު ޖާބިރު ފާހަގަކުރެއްވި ނުކުތާއަކީ އަލިއަޅުވާލަންޖެހޭ މުހިއްމު މައުޟޫއެއް ކަމަށެވެ. އެގޮތުން މިހާރު ނުހެދި ހުރި ރަށްތަކުގެ 50 އިންސައްތަ މަސައްކަތް ނިންމުމަށްވެސް އެންމެ މަދުވެގެން 900 މިލިއަން ޑޮލަރު ބޭނުންވާނެކަން ފާހަގަ ކުރައްވައި މިނިސްޓަރ ވިދާޅުވީ، އެ ފައިސާ ރާއްޖެއަށް ހޯދާނެ ގޮތްތަކެއް ހޯދަން ޖެހޭކަމަށެވެ. އެގޮތުން ޤާނޫނުތަކަށް ބަދަލު ގެނެސްގެންވެސް އެކަމަށް މަގުފަހި ކުރެވޭނެ ގޮތްތައް ހޯދަންޖެހޭކަން މިނިސްޓަރ ފާހަގަ ކުރެއްވިއެވެ.
މިނިސްޓަރ ވިދާޅުވީ، ރައީސް އިބްރާހިމް މުޙައްމަދު ސޯލިޙުގެ ފަތުރުވެރިކަމުގެ ސިޔާސަތު ބައްޓަންވެފައި އޮތީ މީހުން ދިރިއުޅޭ ހުރިހާ ރަށަކަށްވެސް ފަތުރުވެރިކަމުގެ މަންފާ ހޯދައިދިނުމަށް ކަމަށެވެ. އެކަމަށް މަގުފަހި ކުރުވުމަށްޓަކައި ރާއްޖޭގެ އިޤްތިސާދީ ފުދުންތެރިކަން އިތުރުކޮށް، އެ މިންވަރަށް ރާއްޖޭގެ ފުދުންތެރިކަންވެސް ފުޅާވާންޖެހޭކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، ރަށްތައް ތަރައްޤީ ކުރުމަށް ބޭނުންވާ އިންވެސްޓްމަންޓުތައް ހޯދުމަށް ގިނަ މަސައްކަތްތަކެއް ސަރުކާރުން ރާވަމުންދާ ކަމަށެވެ. ފާއިތުވި ދުވަސްތަކުގައިވެސް އެކަމަށްޓަކައި މުހިއްމު ވެބިނަރތައް ބޭއްވިފައިވާކަން މިނިސްޓަރުގެ ވާހަކަފުޅުގައި ފާހަގަ ކުރެއްވިއެވެ.
ރައީސް ޔާމީންގެ ސަރުކާރުން ފަތުރުވެރިކަން ކުރުމަށް ގާތްގަނޑަކަށް 160 ރަށް މާކެޓަށް ނެރެފައިވާއިރު، އެ ރަށްތަށް މާކެޓަށް ނެރުމަށް ކުއްޔަށް ދޫކޮށްފައިވާ ފަރާތަށް ނުކުޅެދިފައިވާ ކަމަށް ރައީސް ސޯލިޙު ވަނީ އެމަނިކުފާނުގެ ކެމްޕޭން ދުވަސްވަރު ވިދާޅުވެފައެވެ. އެގޮތުން ފަތުރުވެރިކަމަކީމުޅި ރާއްޖޭގެ އެކި ސަރަހައްދުތަކުގައި ފެތުރެންޖެހޭ ކަމެއްކަން ރައީސް ސޯލިޙު ވަނީ ފާހަގަކުރަށްވާފައެވެ. އަދި އެ ރަށްތަށް މާކެޓަށް ނެރުމަށް ފައިސާގެ ލޯނުތަށް ލިބޭނެ ގޮތަށް ފަހިކޮށްދެއްވާނެ ކަމަށް އޭރުވެސް ރައީސް ވަނީ ވިދާޅުވެފައެވެ.
