ކޮވިޑުގެ އައު ވޭރިއެންޓުތަކެއް ފެނި، އައު ވެކްސިންވެސް ބޭނުންވެދާނެ!

ކޮވިޑު-19 އަކީ މުޅި ދުނިޔެއަށް ސިހުން ގެނުވި ބަލިމަޑުކަމެކެވެ. މި ބަލިމަޑުކަން ދުނިޔޭގެ އެތައް ބިލިއަން ބަޔަކު ތަހައްމަލުކޮށްފައި ވާއިރު، މި ބަލީގައި ފަސް މިލިއަނަށްވުރެ ގިނަ މީހުން ވަނީ ދުނިޔެ ދޫކޮށްފައެވެ. މީގެ ސަބަބުން އަސަރު ކުރަނީ ހަމައެކަނި އިންސާނުންގެ ސިއްހަތަކަށް ނޫނެވެ. ދިރިއުޅުމަށްޓަކައި ކުރާ ހުރިހާ މަސައްކަތަކަށްވެސްމެއެވެ. މި ބަލިމަޑުކަމާއެކު މުޅި ދުނިޔޭގެ އިޤްތިޞާދު ގާތްގަނޑަކަށް އެއްކޮށް ހުއްޓިފައި އޮތް ވަގުތެއްވެސް އައެވެ.

ނަމަވެސް މުޅި ދުނިޔެ އެކީގައި ކުރި މަސައްކަތުން މި ބަލިމަޑުކަމަށް ކޮންމެވެސް ކަހަލަ ތަސައްލީއެއް ލިބުނެވެ. އެކަމަކު މާގިނަ ދުވަހެއް ނުވެއެވެ. އަނެއްކާވެސް މިބަލީގެ އައު ވޭރިއެންޓެއް ފެނުނީއެވެ. އެފަހަރު ޑެލްޓާ ކިޔާ ވޭރިއެންޓެެކެވެ. ފެތުރޭ މިންވަރު އަވަސް ނުވި ނަމަވެސް ބަލީގެ ނުރައްކާ ބޮޑެވެ. އަނެއްކާވެސް ގިނަ ގައުމުތަކެއްގެ ބޯޑަރު ބަންދުކުރީއެވެ. ލޮކްޑައުންއަކަށް ދާންޖެހުނީއެވެ. ދިރިއުޅުމަށްޓަކައި ކުރަމުން އައި މަސައްކަތްތައްވެސް ހުއްޓުމަކަށް އައީއެވެ.

އެހާ ހިސާބުންވެސް ހިތްވަރު އެލުވާނުލާ އެންމެން އަތުގުޅާލައިގެން މަސައްކަތްކުރީ މި ވަބާއިން ސަލާމަތްވުމަށެވެ. ލިބުނު ގެއްލުންތަކުން އަރައިގަނެ އަނެއްކާވެސް ފާގަތި ދިރިއުޅުމެއް އާރާސްތުކުރުމަށެވެ. މިކަމަށްޓަކާއި ވަރަށް ގިނަ މަސައްކަތްތަކެއް ކުރަން ޖެހުނެވެ. ވެކްސިން ޖެހުމާއި އާންމުން ވެކްސިނަށް ހޭލުންތެރިކުރުމެވެ. ގައިދުރުކަން ބަހައްޓާ މާސްކުއެޅުމެވެ. މީގެ އިތުރުންވެސް ސިއްހީ މާހިރުން ދެއްވާ ލަފާތަކަށް އަމަލުކުރުމެވެ.

ޑެލްޓާ ވޭރިއެންޓުން އަރައިގެންތާ މާ ގިނަ ދުވަހެއް ނުވަނީސް އަނެއްކާވެސް ކޮވިޑުގެ އިތުރު ރާޅާކާއި ކުރިމަތިލާން ޖެހުނެވެ. މިފަހަރު އޮމިކްރޯން ކިޔާ ވޭރިއެންޓެކެވެ. ފަސޭހަ ކަމާއެކު ފެތުރޭ މި ވޭރިއެންޓު އަނެއްކާވެސް މުޅި ދުނިޔެއަށް ސިހުން ގެނުވިއެވެ. މި ވޭރިއެންޓުގެ އިތުރު ސަބް ވޭރިއެންޓުތައްވެސް އުފެދުނެވެ. ނަމަވެސް މިފަހަރު ޑެލްޓާ ވޭރިއެންޓްހާ ބާރުގަދައެއް ނޫނެވެ. ނުރައްކާ ކުޑައެވެ.

އޮމިކްރޯން ވޭރިއެންޓުސް ސަލާމަތް ނުވެވިގެން އުޅެނިކޮށް އިތުރު ވޭރިއެންޓެއްގެ ވާހަކަ މިހާރު މިވަނީ އަޑުއިވިފައެވެ. އެމެރިކާގެ ޕެންސިލްވޭނިއާ ސްޓޭޓް ޔުނިވަރސިޓީ ސައިންޓިސްޓުންގެ ދިރާސާއަކުން ދައްކާ ގޮތުގައި މިފަހަރު ކުރިމަތިވެދާނެ ކަމަށް ބެލެވެނީ ކޮވިޑުގެ އިތުރު ރާޅާކާއެއް ނޫނެވެ. ކޮވިޑުގެ ސުނާމީއަކާއެވެ.

އެމެރިކާގެ މި ސައިންޓިސްޓުން ނިއުޔޯކުގެ ސްޓާޓެން އައިލެންޑްގައި 131 ފުއްލާއެއްގެ ސާމްޕަލް ނަގައިގެން ހެދި މި ދިރާސާއިން ދައްކާ ގޮތުގައި، އެންޓިބޮޑީސް އުފައްދަނީ މީގެ ތެރެއިން އެންމެ 15 އިންސައްތަ ފުއްލާއެވެ. އަދި މީގެ ކުރިން ކޮވިޑު ޖެހިފައިވާ ޖަނަވާރުތަކަށްވެސް އަލުން ކޮވިޑު ޖެހޭކަމަށް މި ދިރާސާއިން ދައްކައެވެ.

މި ދިރާސާއާއި ގުޅިގެން ޕެން ސްޓޭޓް ވެޓެރިނަރީ މައިކްރޯބަޔޮލޮޖިސްޓް ސުރެޝް ކުޗިޕުޑީ ވިދާޅުވާ ގޮތުގައި ޖަނަވާރުންގެ ތެރޭގައި މި ބަލި ގިނަވާ ވަރަކަށް އިންސާނުންނަށް މި ބަލި ޖެހުމުގެ ފުރުސަތު ބޮޑެވެ. އަދި މީގެ ސަބަބުން އިތުރު ވޭރިއެންޓުތަކެއް އުފެދުމުގެ ފުރުސަތުވެސް ބޮޑުވެގެންދާކަމަށް ސުރޭޝް ވިދާޅުވިއެވެ. މީގެ އިތުރުން މި ވައިރަސް އެއްކޮށް މިއުޓޭޓްވުމާއެކު މި ބަލި ނައްތާލުމަށް ޖަހާ ވެކްސިންގެ ބާރުވެސް ކެނޑިގެންދާނެ ކަމަށް ވިދާޅުވިއެވެ. ސުރޭޝް ވިދާޅުވީ އޭރުން މިހާރު ބޭނުންކުރާ ވެކްސިންތަކުގެ ބޭނުންކެނޑި، އިތުރު ވެކްސިންތަކެއް އުފައްދަންވެސް ޖެހިދާނެކަމަށެވެ.

ދުނިޔޭގައި ފުރަތަމަ ފަހަރަށް ފުއްލާއަކަށް ކޮވިޑު ޖެހިގެން ރިޕޯޓުކޮށްފައިވަނީ މިދިޔަ އަހަރުގެ އޯގަސްޓު މަހުއެވެ. އެމެރިކާއިން ބުނާ ގޮތުގައި މި ބަލި ޖެހިފައިވަނީ އޮހިއޯގައި އުޅުނު ފުއްލާއަކަށެވެ. ޔޫއެސްޑީއޭއިން މީގެ ކުރިން ރިޕޯޓުކޮށްފައިވާ ގޮތުގައި ކުއްތާ، ބުޅާ، މިނިކާވަގު، ސިންގާ، ސްނޯ ލެޕާޑް އަދި ގޮރިއްލާ ފަދަ ޖަނަވާރުތަކަށްވެސް ވަނީ ކޮވިޑު ޖެހިފައެވެ.