ޕެންޝަން އޮފީހުގެ ބޯޑުގައި ޕްރައިވެޓް ސެކްޓަރ ތަމްސީލުކުރާ މެންބަރުންގެ ގޮތުގައި ދެ ބޭފުޅަކު އައްޔަން ކުރައްވައިފިއެވެ.

މި ދެބޭފުޅުންނަކީ މޯޓެޒާ ކެޕިޓަލްގެ މެނޭޖިންގ ޑައިރެކްޓަރ މުހައްމަދު ޣާލީ މުރުތަލާއާއި އޮޕްޓިމޯ އެލްއެލްޕީގެ މެނޭޖިންގ ޕާރޓްނަރ އަބްދުލް މަޖީދު އަލީ އެވެ. ޣާލީ މުރުތަލާއަކީ ހޮސްޕިޓަލިޓީ އަދި ރިއަލް އެސްޓޭޓް އިންވެސްޓްމަންޓްގެ ދާއިރާގައި 15 އަހަރަށް ވުރެ ދިގު މުއްދަތުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އަބްދުލް މަޖީދަކީ އެސްއެމްއީ ފައިނޭންސާއި، އޮޑިޓިންގ އަދި ގަވަނަންސް ދާއިރާގެ ތަޖުރިބާ ލިބިވަޑައިގެންފައިވާ ބޭފުޅެކެވެ.

މި ދެބޭފުޅުން ބޯޑަށް އައްޔަންކުރައްވާފައިވަނީ 10 ފެބްރުވަރީ 2022ން ފެށިގެން ކުރިޔަށް އޮތް 3 އަހަރުގެ މުއްދަތަށެވެ.

ޕެންޝަން އޮފީހުގެ ބޯޑަކީ 8 މެންބަރުންގެ މައްޗަށް އެކުލެވޭ ބޯޑެކެވެ. ބޯޑުގައި ހިމެނެނީ ޗެއަރޕަރސަންއާއި, ޕަބްލިކް ސެކްޓަރ ތަމްސީލްކުރާ 3 މެންބަރުންނާއި ޕްރައިވެޓް ސެކްޓަރ ތަމްސީލްކުރާ 4 މެންބަރުންނެވެ.

ޕެންޝަން އޮފީހުގެ ބޯޑުގައި ޕްރައިވެޓް ސެކްޓަރ ތަމްސީލުކުރާ މެންބަރުންގެ ގޮތުގައި އައްޔަންކުރަނީ މަގާމަށް ކުރިމަތިލާ ފަރާތްތަކުގެ ތެރެއިން, މެންބަރުން ހޮވުމަށް އެކުލަވާލެވޭ ސިލެކްޝަން ކޮމިޓީއަކުން އިވެލުއޭޓްކޮށް ޝޯޓްލިސްޓްކުރާ ނަންތަކުގެ ތެރެއިން ރައީސުލްޖުމްހޫރިއްޔާ އައްޔަން ކުރައްވާ ފަރާތްތަކެވެ. ބޯޑު މެންބަރުން ހޮވުމަށް އެކުލަވާލެވޭ ސިލެކްޝަން ކޮމިޓީގައި ހިމެނެނީ, ސިވިލް ސަރވިސް ކޮމިޝަނާއި, މިނިސްޓްރީ އޮފް ފައިނޭންސް, އަދި އެއިރެއްގައި ސޯޝަލް ސެކިއުރިޓީއާބެހޭ ކަންކަން ބެލެހެއްޓުމުގެ ޒިންމާ އަދާކުރާ, މިނިސްޓްރީން ކަނޑައަޅުއްވާ ފަރާތްތަކެވެ. މިކޮމިޓީން ޝޯޓްލިސްޓްކުރާ ފަރާތްތަކުގެ ކިބައިގައި, ގާނޫނުގައި ކަނޑައެޅިފައިވާ ޝަރުތުތައް ހަމަވާކަން ކަށަވަރުކުރުމަށް އެފަރާތްތަކުގެ ނަންތައް ކެޕިޓަލް މާރކެޓް ޑިވެލޮޕްމަންޓް އޮތޯރިޓީއަށް ފޮނުވާނެއެވެ.