ސަސް ބަލިކޮށް އީގަލްސްއިން ޔޫތު ޗެމްޕިއަންޝިޕް ކާމިޔާބުކޮށްފި

ސުޕަ ޔުނައިޓެޑް ސްޕޯޓްސް (ސަސް) ބަލިކޮށް ކްލަބް އީގަލްސްއިން އެފްއޭއެމް ޔޫތު ޗެމްޕިއަންޝިޕް ކާމިޔާބުކޮށްފިއެވެ.

ފ. ނިލަންދޫ ޓާފް ދަނޑުގައި އާދީއްތަ ދުވަހުގެ ހަވީރު ކުޅުނު މި މެޗު އީގަލްސްއިން ކާމިޔާބުކުރީ 1-0 ގެ ނަތީޖާއަކުންނެވެ.

މެޗުގެ ވަރަށް ކުރީކޮޅު ސަސްގެ ލަޔާން ހުސައިންއަށް ވަނީ ލަނޑު ޖަހަން ހުސް ފުރުސަތެއް ލިބިނު ނަމަވެސް އީގަލްސްގެ ކީޕަރު ޝައިހާން އަލީ ވަނީ ލަޔާން ފޮނުވާލުމުގެ ކުރިން ދިފާއުކޮށްފައެވެ. އޭގެ ފަހުން މެޗުގެ 12 ވަނަ މިނެޓުގައި އީގަލްސްގެ އިތުބާރު ފޯވާޑް ޒައިން ޒަފަރު ހިލޭ ޖެހުމަކުން ފޮނުވާލި ބޯޅަ ސަސްގެ ކީޕަރު ޔޫސުފް މީސަމް އަބްދުﷲ ވަނީ ދިފާއުކޮށްފައެވެ.

މެޗުގެ 23 ވަނަ މިނެޓުގައި ޒައިން ވަނީ ލަނޑު ޖަހާ އީގަލްސްއަށް ލީޑު ނަގައިދީފައެވެ. މިއީ އަބާން މުޙައްމަދު އަލީގެ އެހީތެރިކަމާއެކު ޒައިން ކާމިޔާބުކުރި ލަނޑެކެވެ. މި ލަނޑަށްފަހު ވެސް ޒައިންއަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

ދެވަނަ ހާފުގައި ވެސް އީގަލްސްއިން ސަސްގެ ހާފަށް ބާރުބޮޑުކުރިއިރު، ދެވަނަ ހާފު ފަށައިގެން ހަތަރުވަނަ މިނެޓުގައި އީގަލްސްގެ ކެޕްޓަން ހުމައިދު ހުސައިން ފޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށެވެ. އޭގެ ފަހުން ބަދަލުކުޅުންތެރިއެއްގެ ގޮތުގައި ކުޅެން އެރި މުޙައްމަދު ރިޝަންއަށް ލަނޑު ޖަހަން ހުސް ފުރުސަތެއް ލިބުނު ނަމަވެސް ސަސްގެ އަޙްމަދު އައިހަމް މޫސާ ވަނީ އޭނާ ހަމަލާއެއް ފޮނުވާލުމުގެ ކުރިން ހުއްޓުވައިފައެވެ.

މެޗުގެ 66 ވަނަ މިނެޓުގައި އީގަލްސްގެ ޒައިން ޒަފަރު އޭރިއާ ތެރެއިން މުޅިން ހުސްކޮށްލާފައި މުޙައްމަދު ރިޝާންއަށް ދިން ބޯޅަ އޭނާ ފޮނުވާލި ނަމަވެސް ސަސްގެ ޑިފެންޑަރު އަލީ ޒާލިފް ވަނީ ރިޝާން ފޮނުވާލި ހަމަލާ ހުއްޓުވައިފައެވެ. އޭގެ ފަހުން މެޗުގެ 77 ވަނަ މިނެޓުގައި އީގަލްސްގެ މާހީ އިބްރާހީމް މުބައްސިރު މުޅިން ހުސްކޮށް ހުރެ ފޮނުވާލި ހަމަލާ ގޯލު ރޮނގުމަތިން ސަސްގެ އައިހަމް ވަނީ ދިފާއުކޮށްފައެވެ.

މެޗު ނިމެން ކައިރިވެފައިވަނިކޮށް ސަސްގެ އިސްއާފް މުޙައްމަދު ފިރާގް ފޮނުވާލި ހަމަލާ އީގަލްސްގެ ކީޕަރު ޝައިހާން އަލީ ވަނީ ދިފާއުކޮށްފައެވެ.

އީގަލްސްއިން މި މުބާރާތް ނިންމާލައިފައި ވަނީ ބައިކޮޅަށް ލަނޑެއް ނުވަދެއެވެ. އެންމެ ފަހުން 2019 ވަނަ އަހަރު ކުޅުނު ޔޫތު ޗެމްޕިއަންޝިޕް ވެސް ކާމިޔާބުކޮށްފައިވަނީ އީގަލްސްއިންނެވެ. އެކަމަކު އެފަހަރުގެ މުބާރާތް ބާއްވާފައިވަނީ 21 އަހަރުން ދަށުގެ ކުޅުންތެރިންނަށެވެ.