އަނިޔާގެ ސަބަބުން ބެންޒެމާއަށް ޕީއެސްޖީ މެޗު ނުކުޅެވިދާނެ

ރެއާލް މެޑްރިޑަށް ކުޅެމުން އަންނަ ފްރާންސްގެ އިތުބާރު ފޯވާޑް ކަރިމް ބެންޒެމާގެ ފަލަ މަސްގަނޑަށް ލިބުނު އަނިޔާގެ ސަބަބުން މި ހަފްތާގައި ޗެމްޕިއަންސް ލީގުގެ ދެވަނަ ބުރުގައި ޕީއެސްޖީއާ ދެކޮޅަށް ކުޅޭ މެޗު އޭނާއަށް ނުކުޅެވިދާނެ ކަމަށް ރިޕޯޓްތައް ބުނެފިއެވެ.

އުމުރުން 34 އަހަރުގެ ބެންޒެމާގެ ފަލަ މަސްގަނޑަށް އަނިޔާވީ މިދިޔަ މަހު ސްޕެނިޝް ލީގުގައި އެލްޗޭއާ ދެކޮޅަށް ރެއާލުން ކުޅުނު މެޗުގެ ތެރެއިންނެވެ. އޭގެ ފަހުން ރެއާލުން ކުޅުނު މެޗުތަކުގައި ބެންޒެމާ ފެނިފައެއް ނުވެއެވެ. އެގޮތުން ސްޕެނިޝް ކަޕުގައި އެތުލެޓިކް ބިލްބާއޯ އަތުން ރެއާލް ބަލިވި މެޗުގައި ވެސް ބެންޒެމާ ކުޅެފައެއް ނުވެއެވެ.

މީގެ ކުރިން ބެލެވުނީ އަންނަ އަންގާރަ ދުވަހުގެރޭ ޗެމްޕިއަންސް ލީގުގައި ޕީއެސްޖީއާ ދެކޮޅަށް ރެއާލުން ކުޅޭ މެޗުގައި ބެންޒެމާ ފިޓްވާނެ ކަމަށެވެ. އެކަމަކު އެ ފުރުސަތު މިހާރު ހަނިކަމަށް ރިޕޯޓުތައް ބުނެއެވެ. ރިޕޯޓްތައް ބުނާ ގޮތުން ބެންޒެމާގެ ރިކަވަރީ ލަސްވާތީ ރެއާލުގެ މެޑިކަލް ޓީމުން ވަނީ އެޓީމުގެ ކޯޗު ކާލޯ އަންޗެލޮޓީގެ ސަމާލުކަމަށްވެސް ގެނަސްފައެވެ.

މި ފަހުން ބެންޒެމާ ރެއާލްގެ ފަރިތަކުރުންތަކުގައި ބައިވެރިވާން ފެށިނަމަވެސް ކުރިއަށް ގެންދަނީ އިންޑިވިޖުއަލް ތަމްރީންތަކެވެ. ރެއާލްގެ މެޑިކަލް ޓީމުން ބުނީ ބެންޒެމާއަށް ޓީމް ޓްރެއިނިންގައި ބައިވެރިވާން އަދި މުއްދަތު ނަގާނެ ކަމަށެވެ.

ބެންޒެމާ ވަނީ މި ސީޒަނުގައި މިހާތަނަށް ކުޅުނު 28 މެޗުގައި 24 ލަނޑު ޖަހައިފައެވެ. އަދި ނުވަ ލަނޑު ޖަހަން ފުރުސަތު ތަނަވަސްކޮށްދީފައިވެއެވެ.

ބެންޒެމާއަކީ މި ސީޒަނުގައި ރެއާލްގެ އެންމެ ފޯމުގައި ހުރި އެއް ކުޅުންތެރިޔާއެވެ. އެހެންވެ ޕީއެސްޖީއާ ދެކޮޅަށް ރެއާލުން ނުކުންނައިރު، ބެންޒެމާއަށް ނުކުޅެވުން ވެގެންދާނީ އެ ޓީމުގެ ކޯޗު އަންޗެލޮޓީއަށް ބޮލުގެ ރިހުމަކަށެވެ.