ލަންކާގައި މަރާލާފައި އޮއްވާ ފެނުނު އަފްހަމްގެ ޕޯސްޓްމޯޓަމް ހަދައިފި
10 ފެބުރުއަރީ 2022 | ބުރާސްފަތި 02:02އަފްހަމް މަރުވެފައި އޮއްވާ ފެނުނީ ފެބްރުއަރީ 5 ވަނަ ދުވަހު
ލަންކާއިން ގެއްލިގެން ހޯދަމުންދިޔަ ދިވެހި ދަރިވަރު އަފްހަމް ނަސީރު
ސްރީލަންކާގައި މަރާލާފައި އޮއްވާ ފެނުނު ދިވެހި ޒުވާނާ އަފްހަމް ނަސީރުގެ ޕޯސްޓްމޯޓަމް ހަދާފައިވާކަމަށް ފުލުހުން ބުނެފިއެވެ.
ޒަޚަމްތަކަކާއެކު އަފްހަމް މަރާލާފައި އޮއްވާ ފެނިފައިވަނީ ފެބްރުއަރީ 5 ވީ ހޮނިހިރު ދުވަހުއެވެ. އޭނާ ގެއްލިގެން ރިޕޯޓްކޮށްފައިވަނީ ފެބްރުއަރީ 4 ވީ ހުކުރު ދުވަހުގެ ރެއެވެ. އޭނާ ގެއްލުނުއިރު ދިރިއުޅެމުން އައީ ލަންކާގެ ދެހިވެލާގައެވެ.
އަފްހާމްގެ މަރާ ގުޅިގެން ދިވެހި ފުލުހުންގެ ޓީމެއް ގެންދަނީ ލަންކާގައި ހަރަކާތްތެރިވަމުންނެވެ. ފުލުހުން ބުނީ އަފްހަމްގެ ޕޯސްޓްމޯޓަމް ބުދަ ދުވަހު ހަދާފައިވާކަމަށެވެ. އަދި ލަންކާގައި ހަރަކާތްތެރިވަމުންދާ ދިވެހި ފުލުހުންގެ ޓީމަށް ލަންކާގެ ފުލުހުން މައުލޫމާތު ހިއްސާކޮށް އެހީތެރިކަން ފޯރުކޮށްދެމުންދާކަމަށް ފުލުހުން ބުނެފައިވެއެވެ. މި މައްސަލައިގެ ތަހުގީގަށް ފުލުހުންގެ ސީނިއަރ އޮފިސަރަކާއި ކްރައިމް އިންވެސްޓިގޭޝަން ކޮމާންޑްގެ އިންވެސްޓިގޭޓަރެއް ހޯމަ ދުވަހު ވަނީ ކޮަލަމްބޯއަސް ގޮސްފައެވެ.
މި ހާދިސާ އާއި ގުޅޭ ވީޑިއޯ ވަނީ އާންމުކޮށްފައެވެ. އެގޮތުން ލަންކާގެ ޓީވީއަކުން މި ހާދިސާއާގުޅޭ ބައެއް މަންޒަރުތައް ގެނެސްދީފައިވާއިރު، އެ ސަރަހައްދުން ދެމީހެއްގެ ހަށިގަނޑު ފެނިގެންދެއެވެ. ލަންކާ ފުލުހުންވެސް އެ ސަރަހައްދުގައި ހަރަކާތްތެރިވާ މަންޒަރު ފެންނައިރު، ފެނުނު 2 ހަށިގަނޑުގެ ދެމެދުގައި ގާތްގަނޑަކަށް 300 މީޓަރުގެ ދުރުމިނެއް ހުންނާނެކަމަށް ރިޕޯޓު ކޮށްފައިވެއެވެ. ދެވަނަ މީހާގެ ހަށިގަނޑު ފެނުނު ސަރަހައްދުން ވަޅިއެއްވެސް ފެނިފައިވާކަމަށް ވަނީ ރިޕޯޓު ކޮށްފައެވެ.
ވީޑިއޯއިންވެސް ފެންނަ ގޮތުގައި އެމީހުންގެ ހަށިގަނޑުގައި ގިނަ ޒަޚަމްތަކެއް ހުއްޓެވެ.
އުމުރުން 23 އަހަރުގެ އަފްހަމް ނަސީރު މަރާލާފައި އޮއްވާ ފެނުނު ބީޗް ސަރަހައްދުން، އަފްހަމްގެ ބައެއް ތަކެތިކަމަށް ބެލެވޭ ސާމާނުވެސް ފެނިފައިވެއެވެ. އަފްހަމަކީ 2019 ގައި ލަންކާއަށް ބަދަލުވެ، ބިޒްނަސް މެނޭޖްމަންޓުން މަތީ ތައުލީމު ހާސިލުކުރަމުންދިޔަ ދަރިވަރެކެވެ.
