ދޫނިތައް މަރާލި މައްސަލައިގައި މެމްބަރުންގެ ކަންބޮޑުވުން
ދޫނިތައް މަރާލުމުގެ ބަދަލުގައި ހެދޭނެ އެހެން ގޮތްތައް ހުންނާނެ
އެތެރެކުރުން މަނާ ދޫނިތައް މަރާލާފައި
ރާއްޖެއަށް އެތެރެކުރުން މަނާ ދޫނިތަކެއް މަރާލި މައްސަލައިގައި ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅު ކުރައްވައިފިއެވެ.
މެމްބަރުން ވިދާޅުވީ، މިއީ ބަލައިގަނެވޭނެ އަމަލެއް ނޫން ކަމަށެވެ. ދޫނިތައް މަރާލުމުގެ ބަދަލުގައި ހެދޭނެ އެހެން ގޮތްތައް ހުންނާނެކަން ފާހަގަކުރައްވަމުން މެމްބަރުން ވިދާޅުވީ، ރާއްޖެއަށް އެތެރެކުރުން މަނާ އެއްޗެހި އެތެރެކުރާ މީހުން ހުއްޓުވައި ފިޔަވަޅު އަޅަން ޖެހޭ ކަމަށެވެ.
ކުރީގެ ހެދިފައިވާ ގަވާއިދެއްގައި ނައްތާލަން ޖެހޭ ކަމަށް އޮތް ނަމަވެސް އެއީ ވަރަށް ކުރިން ހެދިފައިވާ ގަވާއިދެއް ކަމަށް މެމްބަރުން ވިދާޅުވިއެވެ. އެހެންކަމުން އެ އަމަލަކީ ބަލައިގަނެވޭނެ ކަމެއް ނޫން ކަމަށް މެމްބަރުން ވިދާޅުވިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ދޫނިތައް މަރާލި މައްސަލައިގެ ކަންބޮޑުވުން މެންބަރުން ފާޅުކުރައްވާނެ ކަމުގެ ޔަގީން އެމަނިކުފާނަށް އޮތް ކަމަށާއި، ދިރޭ ޖަނަވާރު އެތެރެ ކުރުމުގެ ގަވާއިދުގައި އެ ގޮތަށް އަމަލު ކުރަން އޮންނަ ކަމަށެވެ.
މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ، އިންސާނަކު ކުރި ކުށެއްގެ އަދަބު ދޫނިތަކަށް ދޭން ޖެހޭ ކަމަށް ގަބޫލު ނުކުރައްވާ ކަމަށެވެ. އަދި މިހާރު އޮތް ގަވާއިދު އިސްލާހު ކުރަން ޖެހޭ ކަމަށެވެ.
މިއަދުގެ ޖަލްސާގައި ނެތި ދިއުމުގެ ބިރު ހީވެފައިވާ ދިރޭ ތަކެތީގެ ބައިނަލްއަގްވާމީ ވިޔަފާރި ކުރުމުގެ ބިލަށް ބަހުސް ކުރެއްވި ހުރިހާ މެމްބަރުންވެސް ވަނީ އެކަމުގެ ކަންބޮޑުވުން ފާޅުކުރައްވާފައެވެ.
ދޫނިތައް މަރާލާފައިވަނީ ވެލާނާ އިންޓަނޭޝަނަލް އެއާޕޯޓުގެ ޕްލާންޓް އެންޑް އެނިމަލް ޔުނިޓުގައެވެ. މައުލޫމާތު ލިބިފައިވާ ގޮތުގައި ދޫނިތައް މަރާލީ އިންޖެކްޝަން ޖަހައިގެންނެވެ. އެއީ 120 ދޫނި ކަމަށާއި، އޭގެ އަގު 800،000 ރުފިޔާއަށް އަރާ ކަމަށް މައުލޫމާތު ލިބެއެވެ.
