އައްޑޫސިޓީ ހިތަދޫގެ ސްޓޭޑިއަމް ކައިރީގައި އަލިފާނުގެ ހާދިސާއެއް ހިނގައިފި
އަލިފާންގަނޑު ރޯވެފައިވަނީ ހޯމަ ދުވަހުގެ ހަވީރު 16:20 ހާއިރު
އައްޑޫސިޓީ ހިތަދޫގައި ރޯވެފައިވާ އަލިފާންގަނޑު
އައްޑޫސިޓީ ހިތަދޫގެ ސްޓޭޑިއަމް ބިތްދޮށުގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުން މައުލޫމާތުދޭ ގޮތުގައި މި އަލިފާންގަނޑު ރޯވެފައިވަނީ ހޯމަ ދުވަހުގެ ހަވީރު 16:20 ހާއިރުއެވެ. ހިތަދޫ ސްޓޭޑިއަމްގެ ބިތްދޮށުގައި އޮންނަ ޗަސްބިމުގެ ވަށައިގެން ހެދިފައިވާ ވިނަގަނޑުގައި ރޯވެފައިވާ މި އަލިފާންގަނޑު މިހާރު ވަނީ އެސަރަހައްދުގެ ވަރަށް ބޮޑު ސަރަހައްދަކަށް ފެތުރިފައިކަމަށް އެމްއެންޑީއެފުން މައުލޫމާތުދެއެވެ.
އަދި މިވަގުތު ހިތަދޫގައި ކަަރަންޓުވެސް ވަނީ ކެނޑިފައެވެ. ނަމަވެސް ކަރަންޓު ކެނޑިފައިވަނީ އަލިފާނުގެ ހާދިސާގެ ސަބަބުން ނޫންކަމަށާއި، އައްޑުއާއި ގުޅިފައިވާ ގިނަ ރަށްތަކުގައިވެސް މިވަގުތު ކަރަންޓު ނެތްކަމަށް އެމްއެންޑީއެފުން މައުލޫމާތުދެއެވެ.
އައްޑޫސިޓީގެ މޭޔަރު އަލީ ނިޒާރު "ރާއްޖެއެމްވީ" އަށް މައުލޫމާތުދެއްވަމުން ވިދާޅުވީ އަލިފާންގަނޑު ރޯވެފައިވަނީ އެރަށުގެ މާކިޅި ސަރަހައްދުގައި ކަމަށެވެ. ހަވީރުން ފެށިގެން ރޯވެފައިވާ މި އަލިފާންގަނޑު ނިއްވުމުގެ މަސައްކަތް މިހާރު ކުރަމުން އަންނަކަން ފާހަގަކޮށް ނިޒާރު ވިދާޅުވީ މިހާރު އަލިފާންގަނޑު ވަރަށް ބޮޑަށް ކޮންޓްރޯލް ކުރެވިފައިވާ ކަމަށެވެ.
އަލިފާން ރޯވެފައިވާ ސަރަހައްދުގައި މީހުން ދިރިއުޅޭ ގެތަށް ކޮންމެވެސް ވަރަކަށް ހުރި ނަމަވެސް މިހާތަނަށް އެއްވެސް މީހަކަށް ގެއްލުމެއް ލިބިފައިނުވާކަމަށް ނިޒާރު ވިދާޅުވިއެވެ.
