ހުޅުމާލެ ތަރައްގީކުރުމުގެ ޕްރޮޖެކްޓަކީ ދުނިޔޭގެ ނިސްބަތުންވެސް ފާހަގަކޮށްލެވޭ ޕްރޮޖެކްޓެއް ކަމަށް ގްލޯބަލް ސެންޓަރ އޮން އެޑަޕްޓޭޝަންގެ ސީއީއޯ، ޕްރޮފެސަރ ޑރ. ޕެޓްރިކް ވަރކޮއިޖަން ވިދާޅުވެއްޖެއެވެ.
އާދިއްތަ ދުވަހު ރައްޔިތުންގެ މަޖިލީހުގައި ދެއްވި ތަގުރީރުގައި ޑރ. ޕެޓްރިކް ވިދާޅުވީ, ދިވެހިރާއްޖެއަކީ އަބަދުވެސް މޫސުމީ ކާރިސާތަކާމެދު ހޭލުންތެރިކުރުވުމަށް އެންމެ ފުރިހަމަ ނަމޫނާ ދައްކައިދިނުމުގެ ގޮތުން އަބަދުވެސް ފުރަތަމަ ސަފުގައި މަސައްކަތްކުރާ ގައުމެއް ކަމަށެވެ. އަދި މޫސުމީ ބަދަލުތަކާ ގުޅިގެން ރާއްޖެއަށް ކުރާ އަސަރުގެ ސަބަބުން އެކަމަށް އާންމުންގެ ހޭލުންތެރިކަން އިތުރުކުރަން ރާއްޖެއަށް މަޖުބޫރުވެފައިވާކަމަށް ޑރ. ޕެޓްރިކް ވިދާޅުވިއެވެ.
މޫސުމީ ބަދަލުތަކުން ކުރާ ނޭދެވޭ އަސަރުތަކުން ހައްލު ހޯދުމަށް ރާއްޖެއިން ދަނީ ވަރަށް ކާމިޔާބު މަސައްކަތްތަކެއްވެސް ކުރަމުން ކަމަށް ޑރ. ޕެޓްރިކް ވިދާޅުވިއެވެ. އޭނާ ވިދާޅުވީ ރާއްޖޭގެ ތަރައްގީގެ ބޮޑުބައެއް ހިއްސާކުރާ އެއް މަޝްރޫއު ކަމަށްވާ ހުޅުމާލޭގެ ބްރިޖް ހުރަސްކޮށް ހުޅުމާލޭގެ ފުރަތަމަ ފިޔަވައްސަށާއި ދެވަނަފިޔަވައްސަށް ޒިޔާރަތްކުރުމުގެ ފުރުސަތު ލިބިވަޑައިގެންފައިވާކަމަށެވެ. އަދި މި ޒިޔާރާތުން އެނގިވަޑައިގަތް އެއް ކަމަކީ, ހުޅުމާލެއަކީ ސީދާ މޫސުމީ ބަދަލުތަކަށް ވަރަށް ބޮޑަށް ތައްޔާރުކުރެވިފައިވާ ޕްރޮޖެކްޓެއްކަން ކަމަށް އޭނާ ވިދާޅުވިއެވެ.
އެގޮތުން ހުޅުމާލެއަކީ ރާއްޖޭގެ އާބާދީގެ ދެބައިކުޅައެއްބައި ކަމަށްވާ ދެ ލައްކައެއްހާ މީހުންނަށް ބޯހިޔާވަހިކަން ފޯރުކޮށްދޭ ތަނަކަށްވެފައި, އެތަނަކީ ކަނޑުގެ ލޮނުގަނޑު އުފުލުމުގެ ނުރައްކަލުން ސަލާމަތް ކުރެވިފައިވާ ތަނެއް ކަމަށް ޑރ. ޕެޓްރިކް ވިދާޅުވިއެވެ. ހުޅުމާލޭގެ ފެން ލޮނުވުމުން ވެސް ރައްކާތެރިކުރެވިފައިވާކަމަށާއި، މިއީ މުޅި ދުނިޔޭގެ ނިސްބަތުންވެސް، ބަދަލުތަކާއެކު ދިރިއުޅުމަށް ފަހިކޮށްދޭ އެންމެ ބޮޑު އަދި އެންމެ ފާހަގަކޮށްލެވޭ މަސައްކަތްތަކެއް ކުރެވިފައިވާ ހަމައެކަނި ޕްރޮޖެކްޓު ކަމަށް ޑރ. ޕެޓްރިކް ވިދާޅުވިއެވެ.
އެމަނިކުފާނު ނިސްބަތްވެވަޑައިގަންނަވާ ނެދަރލޭންޑްސްގައި ގިނަ ގުނަ ވަސީލަތްތަކެއް ގާއިމުވެ، ހުނަރުވެރި ސިވިލް އިންޖިނިއަރުން ތިބިކަމުގައިވީނަމަވެސް، އެގައުމުގެ ތިންބައިކުޅަ އެއްބައި މީހުން ދިރިއުޅުމަށް މިފަދަ ތަނެއް ތައްޔާރުކުރުމަށް އެތައް ސަތޭކައަހަރެއް ވަނީ ހޭދަވެފައި ކަމަށް ޑރ. ޕެޓްރިކް ވިދާޅުވިއެވެ. އެހެންނަމަވެސް ރާއްޖޭގައި ހުޅުމާލޭގެ ދެވަނަ ފިޔަވަހީގެ މަސައްކަތްތައް މަދު ހަފްތާތަކެއްގެތެރޭގައި ފަށާފައިވާކަން އޭނާ ވަނީ ފާހަގަކުރައްވާފައެވެ.
އެހެންނަމަވެސް މިއީ ރާއްޖޭގެ މުސްތަގުބަލު ބިނާކުރުމަށް އެންމެ އެކަށޭނަ މިންވަރެއް ނޫން ކަމަށް އޭނާ ވިދާޅުވިއެވެ. މިގޮތަށް އިތުރު މަސައްކަތްތަކެއްވެސް ކުރަންޖެހޭކަމަށާއި، ބައެއް ރަށްތައް އެއީ ރައްކާތެރި ރަށްތަކެއްގެ ގޮތުގައި އަލުން ތަރައްގީކުރެވިދާނެ ކަމަށް ޑރ. ޕެޓްރިކް ވަނީ ވިދާޅުވެފައެވެ. އެހެންނަމަވެސް މިގޮތަށް ހިމާޔަތްނުކުރެވި ހުރި ރަށްތައް ގެއްލިގެންދިއުމަކީ އެކަށީގެންވާކަމެއް ކަމަށް ވިދާޅުވިއެވެ.
ޑރ. ޕެޓްރިކް އިތުރަށް ވިދާޅުވީ މޫސުމީ ބަދަލުތަކާ ދެކޮޅަށް ކުރާ ހަނގުރާމައިގައި ވަށައިގެންވާ ގުދުރަތީ ވެށި ހިމާޔަތްކުރުމަށް މަސައްކަތްކުރަންޖެހޭ ކަމަށެވެ. މިގޮތުން ކުޅިތަކާއި ފަރުތައް ނެތި ދިޔަ ނުދިނުމަށް މަސައްކަތްކުރުމަކީ އެންމެ މައި މަސައްކަތަށް ވާންޖެހޭނެ ކަމަށް ޑރ. ޕެޓްރިކް ވިދާޅުވިއެވެ.
