ރައީސް ޔާމީނަށް ރައްޔިތުންގެ ތާއީދު ނެތްކަން ހާމަވެއްޖެ: އެމްޓީޑީ
2015ގެ ފަހުން އޮތް ކޮންމެ އިންތިޚާބަކުން ޕީޕީއެމް ވަނީ ބަލި
މޯލްޑިވްސް ތަރޑް-ވޭ ޑިމޮކްރެޓްސް
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ނަތީޖާއިން ރަމްޒުކޮށްދެނީ ރައީސް ޔާމީނަށް ރައްޔިތުންގެ ތާއީދު ނެތް މިންވަރު ކަމަށް މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ)ން ބުނެފިއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަން ހޮނިހިރު ދުވަހު ކުރިއަށްގެންގޮސްފައިވާއިރު، އެ ދާއިރާގެ ގޮނޑި ކާމިޔާބުކޮށްފައިވަނީ އެމްޑީޕީން ވާދަކުރެއްވި ކެންޑިޑޭޓު މުހައްމަދު ރާޝިދެވެ.
މިކަމާގުޅިގެން އެމްޓީޑީން ކުރި ޓްވީޓެއްގައި ވަނީ ކޮމަންޑޫ ދާއިރާގެ ގޮނޑި ޕީޕީއެމަށް ކަމިޔާބުނުކުރެވުމުން ރައީސް ޔާމީނަށް ރައްޔިތުންގެ ތާއީދު ނެތްކަން ހާމަވެގެންގޮސްފައިވާކަމަށެވެ. 2015ގެ ފަހުން އޮތް ކޮންމެ އިންތިޚާބަކުން ޕީޕީއެމް ވަނީ ބަލި ކަމަށާއި، ޕީޕީއެމްއަކީ މިހާރު ފިތުނަ ފަސާދަ އުފައްދަމުން އަންނަ ހަރުކަށި ފިކުރުގެ ކުޑަ ޖަމާއަތެއް ކަމަށް އެމްޓީޑީން ބުނެފައިވެއެވެ. އަދި އެމްޓީޑީން ވަނީ ޕީޕީއެމް ރިފޯމް ކުރުމަށްވެސް ގޮވާލާފައެވެ.
ކޮމަންޑޫ ދާއިރާގެ ބައި އިލެކްޝަންގެ ގޮނޑި އެމްޑީޕީން ކާމިޔާބުކޮށްފައިވާއިރު، އިންތިޚާބުގެ ވަގުތީ ނަތީޖާ ދައްކާގޮތުން އެމްޑީޕީގެ ކެންޑިޑޭޓް ރާޝިދަށް ވަނީ 1398 ވޯޓު ލިބިވަޑައިގެންފައެވެ. ޕީޕީއެމްގެ ކެންޑިޑޭޓް މޫސާ ފަތުހީއަށް ލިބިވަޑައިގަތީ 1160 ވޯޓެވެ. އެމްއެންޕީ ކެންޑިޑޭޓް އަބްދުލްހަންނާން އިދުރީސަށް ލިބިވަޑައިގަތީ 324 ވޯޓެވެ.
ކޮމަންޑޫ ދާއިރާގެ ބައިއިލެކްޝަން ބާއްވާފައިމިވަނީ އެދާއިރާގެ މެމްބަަރަކަށް ހުންނެވި ހުސައިން ވަހީދު އަވަހާރަވުމުންނެވެ. މީގެ ކުރީގެ އިންތިޚާބުތަކުގައި ވެސް ކޮމަންޑޫ ދާއިރާގެ ގޮނޑި ފުރުއްވާފައިވަނީ އެމްޑީޕީގެ ކެންޑިޑޭޓުންނެވެ. ހުސައިން ވަހީދުގެ ކުރިން އެ ދާއިރާގެ މެމްބަރަކަށް ހުންނެވީ އަހުމަދު ނާޝިދު (އޭޑީކޭ ނާޝިދު)އެވެ.
