އިންތިޚާބު ދިޔަގޮތާމެދު ހިތްހަމަޖެހޭ، 7 ޝަކުވާއެއް ހުށަހެޅުނު: ފުއާދު

ހޮނިހިރު ދުވަހު ކުރިޔަށްދިޔަ ބައި އިލެކްޝަންތައް ކުރިޔަށްދިޔަ ގޮތާމެދު ހިތްހަމަޖެހޭކަމަށް އިލެކްޝަން ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

އިންތިޚާބުގެ ކަންކަން ކުރިޔަށްދިޔަ ގޮތާއި ގުޅޭގޮތުން "ރާއްޖެއެމްވީ"ން ކުރި ސުވާލުތަކަށް ޖަވާބު ދެއްވަމުން ފުއާދު ވިދާޅުވީ, ހުރިހާ ތަނެއްގައިވެސް ގަޑިއަށް ވޯޓުލާން ފެށި 4 ޖެހިއިރު ކިޔުތައް ބަންދުކުރެވުނުކަމަށެވެ. ހޮނިހިރު ދުވަހު ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއި ތ. ވިލުފުށި, އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަން ކުރިޔަށްދިޔައެވެ.

ފުއާދު ވިދާޅުވީ ކޮމަންޑޫ ދާއިރާގެ ބައި އިލެކްޝަންގައި ވޯޓުލާން ނުކުތް މީހުންގެ އަދަދު ރައްޔިތުންގެ މަޖިލީހުގެ އެހެން އިންތިޚާބުތަކުގައިވެސް ވޯޓުލާން ނިކުތް މީހުންނާ ދާދިއެއްވަރެއްކަމަށެވެ. އެގޮތުން ކޮމަންޑޫ ދާއިރާގައި ވޯޓު ލުމުގެ ހައްގު ލިބިފައިވާ މީހުންގެ ތެރެއިން 88 އިންސައްތަ މީހުން ވޯޓުލާން ނުކުތްކަމަށް ފުއާދު ވިދާޅުވިއެވެ.

ނަމަވެސް ހޮނިހިރު ދުވަހު ދެން ކުރިޔަށްދިޔަ ތ. ވިލުފުށި އަދި ގއ. ގެމަނަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވޯޓުލާން ނުކުމެފައިވަނީ ވަރަށް މަދު ބަޔެއްކަމަށް ފުއާދު ވިދާޅުވިއެވެ.

ފުއާދު ވިދާޅުވީ, މިއިންތިޚާބުގައި ޖުމްލަ 7 ޝަކުވާއެއް ހުށަހެޅުނު ކަމަށާއި އެޝަކުވާތައް ކޮމްޕްލެއިންސް ބިޔުރޯއިން ބަލަމުން އަންނަކަމަށެވެ. އަދި އިންތިޚާބުގެ ނަތީޖާއަށް އަސަރުކުރާފަދަ ޝަކުވާއެއް ހުށަހެޅިފައި ނުވާކަމަށާއި, ޝަކުވާތަކަށް 5 ދުވަހުގެ ތެރޭގައި އީސީން ޖަވާބު ދޭނެކަމަށެވެ.

ކޮމަންޑޫ ދާއިރާގެ ވަގުތީ ނަތީޖާތައް އީސީން ހޮނިހިރު ދުވަހުގެ ރޭ އިއުލާނުކުރާނެއެވެ. އިންތިޚާބުގެ ދާއިމީ ނަތީޖާ އިއުލާނުކުރުމަށް ހަމަޖެހިފައިވަނީ މިމަހުގެ 10 ވަނަ ދުވަހުއެވެ.

ކޮމަންޑޫ ދާއިރާގައި 7 ވޯޓު ފޮއްޓެއް ބަހައްޓާފައިވެއެވެ. އެދާއިރާގައި ވޯޓު ދިނުމުގެ ހައްގު ލިބިފައިވަނީ 3309 މީހުންނަށެވެ.