ކޮމަންޑޫ ދާއިރާގެ ބައި-އިލެކްޝަންސްގެ ކަންތައްތައް އިންތިޒާމުކުރުމަށް ށ.ފޯކައިދޫގައި ތިބި އިލެކްޝަންސް ކޮމިޝަން (އީސީ)ގެ މެމްބަރުންނާއި އެމްޑީޕީގެ މެމްބަރުން ބައްދަލުކޮށްފައި ނުވާކަން ހާމަވެއްޖެއެވެ.
ފޯކައިދޫގައި ތިބި އީސީގެ މެމްބަރުންނާއި އެމްޑީޕީގެ މެމްބަރުން ބައްދަލުކޮށް އިންތިޚާބަށް ނުފޫޒުފޯރުވަން އުޅެކަމަށް އިދިކޮޅުން ވަނީ ބުރާސްފަތި ދުވަހުގެރޭ ތުހުއްމަތުކޮށްފައެވެ. އަދި މި ތުހުއްމަތުތަކާއެކު އިދިކޮޅުން ވަނީ އެސަރަހައްދުގައި ހަމަނުޖެހުން ހިންގާފައެވެ. އިދިކޮޅުން ތުހުއްމަތުކުރާ ގޮތުގައި ރ.އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) ހިމެނޭހެން އެމްޑީޕީގެ ބައެއް މެމްބަރުން ވަނީ ފޯކައިދޫގެ ސަންސެޓް ރެސްޓޯރެންޓުގައި އީސީގެ މެމްބަރުންނާއި ބައްދަލުކޮށްފައެވެ.
މިކަމާއި ގުޅޭގޮތުން ރާއްޖެޓީވީއަށް މައުލޫމާތުދެއްވަމުން ފޯކައިދޫގައި ހުރި މީހަކު ބުނީ އެފަދަ އެއްވެސް އަމަލެއް ހިނގާފައިނުވާ ކަމަށެވެ. އަދި މި ތުހުއްމަތުތަކާއެކު އިދިކޮޅަށް ނިސްބަތްވާ ބައެއް ފަރާތްތަކުން އެރެސްޓޯރެންޓަށް ވަދެ އެތަން ބެލިއިރު އެތަނުގައި ބިގޭވެސް ނެތްކަމަށެވެ.
ފޯކައިދޫގައިތިބި އީސީގެ މެމްބަރުންގެ ކެއިންބުއިމުގެ ކަންތައްތައް ހަމަޖައްސާފައިވަނީ ސަންސެޓް ރެސްޓޯރެންޓުގައެއް ނޫނެވެ. އެމެމްބަރުންގެ ކެއިންބުއިމުގެ ކަންތައްތައް އެހެން ތަނެއްގައި ހަމަޖައްސާފައި ވާއިރު، އީސީގެ މެމްބަރުން އެރެސްޓޯރެންޓުގައިވެސް އެވަގުތު ނެތްކަމަށް ފޯކައިދޫން ރާއްޖެޓީވީއަށް މައުލޫމާތުދިން މީހަކު ބުންޏެވެ.
މިކަމާއި ގުޅިގެން ރާއްޖެޓީވީއަށް މައުލޫމާތުދެއްވަމުން އިލެކްޝަންސް ކޮމިޝަނުގެ ރައީސް ފުއާދު ތައުފީޤު ވިދާޅުވީ އީސީގެ މެމްބަރުން ފޯކައިދޫގައި ހުންނަ ގެސްޓުހައުސްއަކީ އެމްޑީޕީގެ މެނޭޖުމެންޓެއް އޮންނަ ތަނެއްކަން ކުރީން އެނގިފައިނުވާ ކަމަށެވެ. ނަމަވެސް އިދިކޮޅުން މިގޮތަށް ތުހުއްމަތުކުރަން ފެށުމުން، އެމެމްބަރުން އެހެން ތަނަކަށް ބަދަލުކުރުމުގެ މަސައްކަތް ކުރައްވަމުން ގެންދަވާ ކަމަށެވެ.
ފުއާދު އިތުރަށް ވިދާޅުވީ ފޯކައިދޫގައި އީސީގެ މެމްބަރުން ހުންނާނެ ތަނެއް ހަމަޖެއްސީ ފޯކަލް ޕޮއިންޓުތައް މެދުވެރިކޮށް ހުރިހާ ޕާޓީއަކާއި މަޝްވަރާ ކުރުމަށްފަހުގައި ކަމަށެވެ. އަދި ތުހުއްމަތު ކުރާފަދަ އަމަލެއް އީސީގެ އެއްވެސް މެމްބަރަކު ނުކުރާނެކަމުގެ ޔަގީންކަންވެސް ފުއާދު ދެއްވިއެވެ.
އީސީގެ މެމްބަރުން ފޯކައިދޫގައި މިހާރު ތިބެނީ ސަންސެޓް ރެސްޓޯރެންޓާއި އިންވެގެން ހުންނަ ގެސްޓު ހައުސްގައެވެ.
