މި މަހު ޗައިނާގެ ވެރިރަށް ބެއިޖިންގައި ފަށާ ފިނި މޫސުމުގެ އޮލިމްޕިކް ގޭމްސްގެ ޓޯޗާއެކު އދ. އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ދުވެވަޑައިގެންފިއެވެ.

ހުކުރު ދުވަހު ޝާހިދު އޮލިމްޕިކް ޓޯޗާއެކު ދުވެވަޑައިގެންއިރު، އޮލިމްޕިކް ޓޯޗު ޝާހިދާ ހަވާލުކުރެއްވީ އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ގެ ރައީސް ތޯމަސް ބާކެވެ.

އޮލިމްޕިކްސް ޓޯޗާއެކު ދުވެވަޑައިގަތުމަށްފަހު ކުރެއްވި ޓްވީޓެއްގައި ޝާހިދު ވިދާޅުވީ، އޮލިމްޕިކް ގޭމްސްއަކީ ދުނިޔޭގެ އެކި ގައުމުތަކުގެ މީހުން ސުލްހަވެރި އަމާންކަމާއެކު އެކުވެރިކަން ފާޅުކުރާ މުނާސަބަތެއް ކަމަށެވެ. އަދި އޮލިމްޕިކް ގޭމްސްގެ ޓޯޗާއެކު ދުވެވަޑައިގަންނަވަން ލިބުން އެއީ ލިބިވަޑައިގެންނެވި ޝަރަފެއް ކަމަށް ޝާހިދު ވިދާޅުވިއެވެ.

މީގެ އިތުރުން ޝާހިދު ވިދާޅުވީ އޮލިމްޕިކް ޓޯޗުން ދައްކުވައިދެނީ އެކުވެރިކަމާއި އެއްބައިވަންތަކަމުގެ އިތުރުން އުއްމީދު ކަމަށެވެ.

އޮލިމްޕިކް ޓޯޗު ރިލޭގައި 1200 އަށް ވުރެ ގިނަ މީހުން ބައިވެރިވެފައިވާއިރު، މި ރިލޭގައި ގައުމުތަކުގެ ރައީސުންނާއި، ކުރީގެ އެތުލީޓުން ބައިވެރިވެފައިވެއެވެ.