ތައްޔާރީތައް ހުރީ ނިމިފައި، އަމާންކަމާއެކު އިންތިޚާބު ކުރިޔަށްގެންދަން ހުރިހާ ފަރާތްތަކުގެ އެއްބާރުލުން ބޭނުން: އީސީ
ވޯޓުލުން ކުރިޔަށްދާއިރު ޝަކުވާ ހުށަހެޅުމުގެ ފުރުސަތު ވަނީ ހުޅުވާލާފައި
އީސީގެ ރައީސް ފުއާދު ތައުފީގް
ހޮނިހިރު ދުވަހު ބޭއްވުމަށް ހަމަޖެހިފައިވާ އިންތިޚާބުތަކަށް ވާންޖެހޭ ތައްޔާރީތައް ވަނީ ވެނިމިފައި ކަމަށް އިލެކްޝަން ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
ހޮނިހިރު ދުވަހު ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއި ތ.ވިލުފުށި އަދި ގއ.ގެމަނަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން ކުރިޔަށްދާނެއެވެ. އިންތިޚާބަށް އީސީން ވަމުންދާ އެންމެ ފަހުގެ ތައްޔާރީތަކާ ގުޅޭގޮތުން "ރާއްޖެއެމްވީ" އަށް މައުލޫމާތުދެއްވަމުން ފުއާދު ވިދާޅުވީ ވޯޓުލާ މަރުކަޒުތައް ތައްޔާރުކުރުމުގެ މަސައްކަތް ހުކުރު ދުވަހު ހަވީރު ފަށާފައިވާކަމަށެވެ. އަދި ވޯޓުލުން އޮންނަ ރަށްރަށަށް ވޯޓު ފޮއްޓާއި ވޯޓު ކަރުދާސް ފޮނުވާފައިވާކަމަށް ފުއާދު ވިދާޅުވިއެވެ.
މީގެއިތުރުން ފުއާދު ވިދާޅުވީ ކޮމަންޑޫ ދާއިރާގެ ތިން ރަށް ކަމުގައިވާ ކޮމަންޑޫ، ފޯކައިދޫ އަދި މަރޮށީގެ ވޯޓު ފޮށިތަކުގައި ހަރަކާތްތެރިވާނީ އީސީގެ މުވައްޒަފުންކަމަށެވެ. އެފޮށިތަކުގެ ކައިރީގައި ހަރަކާތްތެރިވާ ހުރިހާ އޮފިޝަލުންވެސް ގޮސްފައިވަނީ މާލެއިންކަމަށް ފުއާދު ވިދާޅުވިއެވެ. އަދި އިންތިޚާބުގެ ކަންކަން ޕްލޭންކުރެވިފައިވާ ގޮތަށް ކުރިޔަށްދާކަމަށް ފުއާދު ވިދާޅުވިއެވެ.
މީގެއިތުރުން ވޯޓުލުން ކުރިޔަށްދާއިރުވެސް ޝަކުވާ ހުށަހެޅުމުގެ ފުރުސަތު ހުޅުވާލާފައިވާކަމަށް ފުއާދު ވިދާޅުވިއެވެ. އެގޮތުން ކޮންމެ ވޯޓު ފޮއްޓެއްގެ ކައިރީގައި ހުންނަ ފޮށީގެ ވެރިޔާ އާއި ފޯކަލް ޕޮއިންޓް އަދި ކޮމްޕްލެއިންސް ބިޔުރޯއަށްވެސް އިންތިޚާބު ކުރިޔަށްދާއިރު ޝަކުވާ ހުށަހެޅޭނެކަމަށް ފުއާދު ވިދާޅުވިއެވެ. މިހާތަނަށް 3 ޝަކުވާއެއް ހުށަހެޅުނުއިރު އެ 3 ޝަކުވާއަށްވެސް ޖަވާބުދީފައިވާ ކަމަށް ފުއާދު ވިދާޅުވިއެވެ.
ކަރަންޓީނުގައި ތިބި މީހުންނާއި ކޮވިޑަށް ޕޮޒިޓިވްވެފައިވާ މީހުންނަށް ވޯޓުލުމަށް ހޮނިހިރު ދުވަހުގެ 3ން 4ށް ހުޅުވާލާފައިވާއިރު ފުއާދު ވަނީ ރައްކާތެރިކަމުގެ ފިޔަވަޅުތަކާއެކު ވޯޓުލުމަށް އައުމަށް އިލްތިމާސްކުރައްވާފައެވެ. އަދި އެނޫން މީހުން ވީއެންމެ އަވަހަކަށް ވޯޓުލުމަށް ދިޔުމަށާއި 3 ގެ ކުރިން ވޯޓުގެ ކަންކަން ނިންމުމަށް ފުއާދު އިލްތިމާސްކުރެއްވިއެވެ. ނަމަވެސް 4 ޖަހަންވާއިރަށް ކިޔުއަށް އަރައިފިނަމަ ވޯޓުލެވޭނެކަމަށް ފުއާދު ވިދާޅުވިއެވެ.
ވޯޓުލާން ވީހާވެސް ގިނަ ބަޔަކު ނިކުމެ އިންތިޚާބީ ހައްގު އަދާކުރުމަށް ފުއާދު އެދިވަޑައިގެންނެވިއެވެ. އަދި ޔުނިފޯމް ބޮޑީސް އާއި ކެންޑިޑޭޓުންނަށް ކިޔުއަށް ނާރާ ވޯޓުލެވޭނެކަމަށް ފުއާދު ވިދާޅުވިއެވެ. ފުއާދު ވަނީ ކެންޑިޑޭޓުން ވޯޓުލުމަށްފަހު އެސަރަހައްދުގައި މަޑުނުކޮށް ދިޔުމަށް އިލްތިމާސްކުރައްވާފައެވެ. މަސްލަހަތު ފުށުއަރާކަމަކަށް އެކަން ވާނެތީ އެކަމަށް ސަމާލުވުމަށް ފުއާދު އިލްތިމާސްކުރެއްވިއެވެ.
މީގެއިތުރުން އިންސާފުވެރިކަމާއި އަމާން ކަމާ އޮމާންކަމާއެކު އިންތިޚާބުގެ ކަންކަން ކުރިޔަށްގެންދިޔުމަށް ހުރިހާ ޕާޓީތަކާއި ރައްޔިތުންގެ ފަރާތުން އެއްބާރުލުން ބޭނުންވާކަމަށް ފުއާދު ވިދާޅުވިއެވެ.
ވޯޓުގެ ނަތީޖާ ވޯޓު ފޮށި ބަހައްޓާފައި ހުރިތަނަކުން އިއުލާންކުރުމަށް ހަމަޖެހިފައިވާއިރު ފުއާދު ވިދާޅުވީ ވޯޓު ގުނަން ފަށާތާ ގަޑިއިރެއްގެ ތެރޭގައި ނަތީޖާ އިއުލާންކުރެވޭނެކަމަށް ބެލެވޭކަމަށެވެ. އެންމެ ލަސްވެގެންވެސް ހޮނިހިރު ދުވަހުގެ ރޭ 8 ޖަހާއިރު ވަގުތީ ނަތީޖާ އިއުލާންކޮށް ނިމޭނެކަމަށް ބެލެވޭކަމަށް ފުއާދު ވިދާޅުވިއެވެ.
ކޮމަންޑޫ ދާއިރާގައި ހިމެނޭ ތިން ރަށްކަމަށްވާ ކޮމަންޑޫއާއި، ފޯކައިދޫ އަދި މަރޮށި ހިމެނޭ އެ ދާއިރާގައި 3،316 މީހުންނަށް ވޯޓްލުމުގެ ހައްގު ލިބިގެންވެއެވެ. އަދި 7 ވޯޓް ފޮށްޓެއް އެ އިންތިޚާބުގައި ބަހައްޓަން ނިންމާފައިވެއެވެ. މާލޭގައި ދެ ވޯޓު ފޮއްޓެއް ބަހައްޓާއިރު މާލޭގެ ފޮށިތައް ބަހައްޓަން ހަމަޖެހިފައިވަނީ އިސްކަންދަރު ސްކޫލްގައެވެ.
ވޯޓު ނެގުމަށް ހަމަޖެހިފައިވަނީ ހޮނިހިރު ދުވަހުގެ ހެނދުނު 8:00 އިން ހަވީރު 4:00 އަށެވެ.
