ކ.ތިލަފުށީގައި ގާއިމްކުރާ ވޭސްޓް-ޓު-އެނާރޖީ ޕްލާންޓްގެ އަމަލީ މަސައްކަތް ވަރަށް އަވަހަށް ފަށާނެ ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
ކުނި މޭނޭޖްކުރުމަށް ކުރަމުންދާ މަސައްކަތްތަކާއި ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު ޝައުނާ ވިދާޅުވީ ކުނީގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ އެންމެ ބޮޑު އެއް ޕްރޮޖެކްޓްކަމުގައިވާ ތިލަފުށީ ވޭސްޓް މެނޭޖްމަންޓުގެ ބޮޑު ޕޮރޮޖެކްޓްގެ މަސައްކަތްތަކުގެ ފުރަތަމަ ފިޔަވަހީގެ އުމްރާނީ ބައި އެއްކޮށް ނިމިފައިވާ ކަމަށެވެ. އެގޮތުން ތިލަފުށީގައި ފެންނަ ބޮޑު ގޮނޑު އެއްފަރާތްކޮށް އެތަނުގެ ހާބަރު ހަދައި, މުސްތަގުބަލުގައި ކުނި ގެނެސް ބާލާނެ ސަރަހައްދު ވަނީ ތަރައްގީކޮށް ނިމިފައިވާކަން މިނިސްޓަރު ޝައުނާ ފާހަގަކުރެއްވިއެވެ. އަދި ކުނި ގެނެސް, ކިރައި, ބައިބައި ވަކިކޮށް, ޝްރެޑް ކުރުމަށްފަހު އިންސިނެރޭޓް ކުރުމަށް ބޭލް ކުރެވޭއިރު ޒަމާންތަކެއްވަންދެން ތިލަފުށީ ގޮނޑުގައި ރޯވެފައިވާ އަލިފާންގަނޑު ނިއްވާލާފައިވާ ކަމަށެވެ.
ދެވަނަ ފިޔަވަހީގެ މަސައްކަތްތަކާއި ބެހޭ ގޮތުން މިނިސްޓަރު ޝައުނާ ވިދާޅުވީ ވޭސްޓް-ޓު-އެނާރޖީ ޕްލާންޓު ގާއިމުކުރުމަށް ސްޕެއިންގެ މަޝްހޫރު ކުންފުންޏެއް ކަމުގައިވާ އުރްބާސާއާ އެކު ޑިޒައިން، ބިލްޑް އެންޑް އޮޕަރޭޓް ކޮންޓްރެކްޓެއްގައި ސޮއިކޮށްފައިވާ ކަމަށާއި، އެމަސައްކަތުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށެވެ.
ވޭސްޓް-ޓު-އެނާޖީ ޕްލާންޓް ގާއިމްކުރުމަށް އެގްރްމެންޓްގައި މިހާރު މިވަނީ ސޮއިކޮށްފައި. ސްޕެއިންގެ ކުންފުންޏަކާއެކު ފެސިލިޓީ ގާއިމްކުރުމުގެ އަމަލީ މަސައްކަތް ވަރަށް އަވަހަށް ފެށިގެން ދާނެ. މިއީ ދުނިޔޭގެ އެންމެފަހުގެ ނެކްނޮކޮޖީ. ދުވާލަކު 500 ޓަނުގެ ކުނި އެފެސިލިޓީން ޕްރޮސެސް ކުރާނެ. އަދި ކުނި ޕްރޮސެސް ކުރުމާއެކު ގާތްގަނޑަކަށް 8 ނުވަތަ 10 މެގަވޯޓާ ގާތަށް ކަރަންޓް އުފައްދާނެ. އަދި އެފައްދާ ކަރަންޓް ވިއްކައިގެން ލިބޭ ފައިސާއިން އެ ފެސިލިޓީ އޮޕަރޭޓް ކުރާނީ އެހެންވީމަ އަޅުގަނޑުމެންނަށް މުޅި ރާއްޖޭގެ ތާރީހުގައި ވެސް އަލަށް މިގާއިމް ކުރެވެނީ މިނިޒާމު ރޭވިގެން ކުނި މޭނޭޖްކުރާނެ ފެސިލިޓީއެއް އަދި ވަށާޖެހޭ ގޮތަށް އަޅުގަނޑުމެންނަށް އެފެސިލިޓީގައި ހަރަދު ވެސް ބަލަހައްޓާނީ.މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ
މި ފެސިލިޓީ އޮޕަރޭޓްކުރުމުގައި ހިންގުމަށްދާ ޚަރަދު ހޯދުމަށް ހަމަޖެހިފައިވަނީ މިފެސިލިޓީން އުފައްދާ ކަރަންޓާއި އަދި ކުނި އަންދައިގެން ލިބޭ އަޅި ބޮޓޮމް އޭޝް (އަޅި) ރިސައިކަލްކޮށް ވިއްކައިގެންނާއި އެހެނިހެން ގޮތްގޮތުން ލިބޭ ފައިސާއިންނެވެ. މި މަސައްކަތް 2023 ވަނަ އަހަރު ނިމިގެންދާއިރު، ރާއްޖޭގައި އުފައްދާ ކުނީގެ ގާތްގަނޑަކަށް 60 އިންސައްތަ ކުނީގެ މައްސަލައަށް ހައްލެއް ލިބިގެންދާނެއެވެ.
ތިލަފުއްޓަކީ ކުނިވަޅުލައިގެން ހިއްކާފައިވާ ރަށެކެވެ. ރާއްޖޭގެ ރަށެއް ގޮތުގައި ތިލަފުށި ހަމަޖެއްސީ 1992 ވަނަ އަހަރުއެވެ. ވޭސްޓްމެނޭޖްމަންޓް އުސޫލުން މާލެއިން އެންމެ ފުރަތަމަ ތިލަފުއްޓަށް ކުނި ގެންދަން ފެށީ 1992 ވަނަ އަހަރު ޖުލައި މަހުގެ 2 ވަނަ ދުވަހުއެވެ. ތިލަފުށީގައި ވޭސްޓްމެނޭޖްމަންޓްގެ މަސައްކަތް ފެށީ 1 ލޭންޑިންގ ކްރާފްޓާއި، 4 ހެވީލޯޑް ޓްރަކާއި، 2 އެކްސްކަވޭޓަރާއި އެއް ލޯޑަރުންނެވެ. މާލޭގެ ކުނީގެ މައްސަލައަށް ހައްލެއް ހޯދުމަށް ކުރެވުނު މި ބޮޑު މަސައްކަތުން، ތިލަފުށި 4.6 މިލިއަން ފޫޓަށް ވަނީ ބޮޑުކޮށްފައެވެ.
