ރައީސް ދެއްވި ރިޔާސީ ބަޔާނަށް އެމްޓީޑީގެ ތައުރީފް
ހިތާމަޔަކީ މިއަދު އަޑުއެހުމާއި ހަޖަމުކުރުމުގެ ޤާބިލްކަންހުރި ހަރުދަނާ އިދިކޮޅު ސިޔާސީ ޕާޓީއެއް ނެތުން
އެމްޓީޑީގެ ޖަލްސާއެއްގެ ތެރެއިން
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އިއްވެވި ރިޔާސީ ބަޔާނަކީ އުންމީދުން ފުރިފައިވާ ބަޔާނެއް މޯލްޑިވްސް ތަރޑް ވޭ ޑިމޮކްރަޓްސް (އެމްޓީޑީ) އިން ބުނެފިއެވެ.
އެމްޓީޑީއިން ކޮށްފައިވާ ޓުވީޓެއްގައި ބުނީ ރައީސް ސާލިހު އިއްވެވި އުންމީދުން ފުރިގެންވާ ރިޔާސީ ބަޔާނެއް ކަމަށާއި، އެޕާޓީން އެބާޔަން ބަލައިގަންނަ ކަމަށެވެ. އަދި ރައްޔިތުންނަށް ދެއްވި އުފާވެރި ޚަބަރުތަކަށްވެސް އެޕާޓީން ޝުކުރު އަދާކުރިއެވެ. ނަމަވެސް ހިތާމަޔަކީ މިއަދު އަޑުއެހުމާއި ހަޖަމުކުރުމުގެ ޤާބިލްކަންހުރި ހަރުދަނާ އިދިކޮޅު ސިޔާސީ ޕާޓީއެއް ނެތުން ކަަމަށް އެމްޓީޑީއިން ބުނެއެވެ.
ބުރާސްފަތި ދުވަހު ރައީސް ސާލިހު ރިޔާސީ ބަޔާން އިއްވެވި ޖަލްސާ އިދިކޮޅުން ވަނީ ބޮއިކޮޓްކޮށްފައެވެ.
އިދިކޮޅުން ބުނީ ސަރުކާރުގެ ނުފޫޒާއި ބާރުގެ ބޭނުންކޮށްގެން ޖުޑިޝަރީއަށް އަތްބާނައި, ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތް ސަރުކާރުން ބޭނުންވާ ގޮތަކަށް ގެންދިއުމަށް ސަރުކާރުން މަސައްކަތް ކުރާ ކަމަށެވެ. އިދިކޮޅުން ވަނީ ރައީސް ޔާމީނަށް "ޓާގެޓްކޮށް" ސަރުކާރުން ކަންކަން ކުރަމުންދާކަަމަށް ތުހުމަތު ކޮށްފައެވެ. އޭގެ އިތުރުންވެސް ގިނަ ސަބަބުތަކެއް ފާހަގަކޮށްފައިވާއިރު، ރައީސް ޔާމީން އިސްވެ ހުންނަވައި އިންޑިޔާ ސިފައިން މިޤައުމުން ބޭލުމަށް ގޮވާލައި ހިންގާ އިންޑިއާ އައުޓް ކެޕްމެއިނާއި ދެކޮޅަށް ސަރުކާރުން ރައްޔިތުންގެ މަޖިލީހަށް ބިލެއް ހުށައެޅުމަށް ކުރަމުންދާ މަސައްކަތްވެސް ސަބަބެއްގެ ގޮތުގައި ފާހަގަކޮށްފައިވެއެވެ. އިދިކޮޅުން ބުނާ ގޮތުގައި ރިޔާސީ ބަޔާން އިއްވާ ޖަލްސާގައި އިދިކޮޅުގެ މެމްބަރުން ބައިވެރިވެވަޑައި ނުގަތުމަކީ އެބޭފުޅުން ކުރައްވާ އިހުތިޖާޖެކެވެ.
ބުރާސްފަތި ދުވަހު ރައީސް ސާލިހު އިއްވެވި ރިޔާސީ ބަޔާނުގައި ރާއްޖޭގެ އެކިއެކި ސިނާއަތްތައް ކުރިއެރުވުމާއި، އަތޮޅުތެރެ ތަރައްި ކުރުމުގެ އިތުރުން ޓީޗަރުންގެ މުސާރަ ބޮޑު ކުރުމަށް ނިންމާފައިވާކަން އިއުލާން ކުރައްވާފައިވެއެވެ. އަދި ޤައުމުގެ ހުރި މައްސަލަތަކަށް އިޝާރަތްކުރައްވައި އެމައްސަލަތައް ހައްލު ކުރުމާއި ގުޅޭގޮތުން ވާހަކަފުޅު ދައްކަވާފައިވެއެވެ.
