ވަކި ނަސްލަކާއި ދެކޮޅަށް ކުރީގެ ރައީސް އަބްދުﷲ ޔާމީނު ފަށްޓަވާފައިވާ ނުރައްކާތެރި ރޭސިސްޓް ހޭޓް ކެމްޕޭން ހުއްޓުވުމަކީ މިގައުމުގެ އަދުގެ ހާލަތާއި ދިވެހި ގައުމުގެ މުސްތަގުބަލަށް އެޅުއްވި ހަރުދަނާ ފިޔަވަޅެއް ކަމަށް ކުރީގެ ރައީސް ޔާމީންގެ ނައިބްރައީސް އަހުމަދު އަދީބުގެ، މޯލްޑިވްސް ތާޑްވޭ ޑިމޮކްރެޓްސް ޕާޓީން ބުނެފިއެވެ.

އެ ޕާޓީން ނެރުނު ނޫސް ބަޔާނެއްގައި ބުނެފައިވަނީ ރައީސް ޔާމީނު ގެންގުޅުއްވާ ނަސްލީތަފާތުކުރުމުގެ ސިޔާސީ ހައްދުފަހަނައެޅި ފިކުރުގެ "އިންޑިއާ އައުޓް" ކެމްޕޭނަކީ އިންޑިއާއާއި އަދި އިންޑިއާ ދަރިފަސްކޮޅުގެ ނަސްލާއިމެދު ދިވެހިންގެ ހިތްތަކުގައި ނަފްރަތު އުފައްދާ އޭގެ ސަބަބުން މިގައުމު ހަމަނުޖެހުމަކަށް ވައްޓާލާ ފަތުރުވެރިކަމަށް ބަރޯސާވެފައި އޮތް މިރީތި ގައުމު އިގްތިސާދީ ގޮތުން ބޮޑު އަނދަވަޅަކަށްކުރާ މަސައްކަތެއް ކަމަށެވެ. މިކަން ހުއްޓުވަން ގައުމީ ސަލާމަތާބެހޭ ކޮމިޓީއިން ނިންމާ ރައީސް ސާލިހުގެ ގަރާރަކުން ކަނޑައެޅުމަކީ ދިވެހި ގައުމުގެ ދިފާޢުގައި ރައީސް ސާލިހު ކުރެއްވި ހިތްވަރުގަދަ މަސައްކަތްޕުޅެއް ކަމަށެވެ.

ކޮވިޑާއި ހަނގުރާމައިގެ ވިލާތަކެއްގެ ދަށުގައި ދުނިޔޭގެ ގައުމުތައް އިނދަޖެހި އެތައް ދަތިތަކެއްގައި އުޅެމުންދާއިރު އަދި އެންމެ ކައިރިން އަވައްޓެރި ސްރީލަންކާ ރައްޔިތުން އުޅެމުންދާ ހާލާއި ދިވެހި ގައުމުގެ އަދުގެ އާންމު ހާލަތު އަޅާމިނެކިރާލާއިރު އަޅުގަނޑުމެން މާތް ﷲ އަށް ޙަމްދާއި ޝުކުރުކުރަން ޖެހޭ ކަމަށެވެ. ނަމަވެސް ދިވެހި ގައުމުގެ ހާލަތު ނުރައްކަލުގެ ތެރެއަށް ވައްޓާލަން ރައީސް ޔާމީނާއި މަދުބަޔަކު ހުއްޓާނުލާ ކުރާ މަސައްކަތަށް ފުރުސަތު ދީގެން ބަލަންތިބެގެން ނުވާނެކަން އެ ޕާޓީއިން ދެކޭ ކަމަށެވެ.

ރައީސް ޔާމީނު އަމިއްލަ އާއިލާ ދިރިއުޅުއްވާ ގެކޮޅުވެސް ނަފުރަތުގެ ރަމްޒަކަށް ހައްދަވާ ފެއްޓެވި "އިންޑިއާ އައުޓް" ބެނަރ ކެމްޕޭން ފުލުހުން ކޯޓް އަމުރާއި އެކީގައި ހުއްޓުވުމަކީ އެއްވެސް ފަރާތަކަށް ގާނޫނުން މަތީގައި އުޅުމުގެ ފުރުސަތު ނުދޭނެ ކަމުގެ ފުރިހަމަ އިންޒާރެއް ކަމަށް ބުނެފައިވެއެވެ. މިގައުމަކީ ގާނޫނު ނުހިނގާ ގައުމަކަށް ބަދަލުވާން ދޫކޮށްލެވޭނެ ގައުމެއްނޫން ކަމަށާއި އަޅަންޖެހުނު ކޮންމެ ފިޔަވަޅެއް އަޅައިގެން ކޮވިޑާއި އިގްތިސާދު ހަމަޔަކަށް ރައީސް ސާލިހު އެޅުއްވިގޮތަށް، އެމަނިކުފާނު އިސްނަންގަވައިގެން ވަކި ނަސްލަކާއި ދެކޮޅަށް ރައީސް ޔާމީނު ފަށްޓަވާފައިވާ ނުރައްކާތެރި ރޭސިސްޓް ހޭޓް ކެމްޕޭން ހުއްޓުވުމަކީ މިގައުމުގެ އަދުގެ ހާލަތާއި ދިވެހި ގައުމުގެ މުސްތަގުބަލަށް އެޅުއްވި ހަރުދަނާ ފިޔަވަޅެއް ގޮތުގައި ދެކޭ ކަމަށް ބުނެފައިވެއެވެ.

ބޮޑުތަކުރުފާނު މަގުގައި ހުންނަ, ކުރީގެ ރައީސް އަބްދުﷲ ޔާމީންގެ ގެކޮޅުގައި ހަރުކޮށްފައިވާ އިންޑިއާ އައުޓް ބޮޑު ބެނަރ ފުލުހުން ނަގާފައިވަނީ ބުރާސްފަތި ދުވަހުއެވެ. ކޯޓު އަމުރެއްގެ ދަށުން, ބުރާސްފަތި ދުވަހު ފުލުހުން ވަނީ ޕީޕީއެމް އޮފީހުގައި ހަރުކޮށްފައިވާ ބެނަރވެސް ނަގާފައެވެ.

ސިޔާސީ ބޭނުމެއްގައި, ވަކި ގައުމަކާއި ދެކޮޅަށް ރާވައިގެން ހިންގާ ކެމްޕޭނުތަކަކީ ގައުމީ ސަލާމަތާ ގުޅުން ހުރި, އަދި ނުރައްކާ އޮތް ކަމެއް ކަމަށްވާތީ އެފަދަ ހަރަކާތްތައް ހުއްޓުވުމަށް ކަނޑައަޅައި, ތަންފީޒުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ ބުރާސްފަތި ދުވަހު ގަރާރެއް ނެރުއްވާފައެވެ.

މި ގަރާރުގައި ބުނެފައިވަނީ އިންޑިޔާއާ މެދު ނަފުރަތު އުފެއްދުމަށް ހިންގާ ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމުގައި، ގައުމީ ސަލާމަތާބެހޭ މަޖިލީހުގެ މިއަހަރުގެ 3 ވަނަ ބައްދަލުވުމުގައި ކަނޑައަޅާފައިވާ ކަމަށެވެ.

ދިވެހި ސަރުކާރުގެ ސިޔާސަތަކީ، ޤާނޫނު އަސާސީން ކަށަވަރުކޮށްދީފައިވާ ޚިޔާލު ފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމަށް ދެވޭނެ އެންމެ ފުޅާމިނެއްގައި ޖާގަދީ، ދީމިޤްރާޠީ މުޖުތަމަޢުތަކުގައި ޢަމަލުކުރަމުންދާ އަސާސްތައް ދެމެހެއްޓުން ކަމަށާއި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ލިބިދީފައިވާ ޚިޔާލު ފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމުގެ ނާޖާއިޒު ފައިދާ ނަގައި، އިންޑިޔާއާ ދެކޮޅަށް ހިންގާ ކެމްޕޭނަކީ، ދިވެހިރާއްޖޭގެ ޞުލްޙަ މަސަލަސްކަން ނަގައިލުމުގެ ނިޔަތުގައި، ދިވެހިރާއްޖެއާ އިންޑިޔާއާއެކު އޮތް ޒަމާންވީ ބަދަހި ގުޅުމަށާއި، ރާއްޖޭގެ ތަރައްޤީއަށާއި މި ސަރަޙައްދުގެ ސަލާމަތާއި ހަމަޖެހުމާއި އަމަންއަމާންކަން ދެމެހެއްޓުމަށް ބައިނަލްއަޤްވާމީ ފެންވަރުގައި ކުރަމުންދާ މުހިންމު ރާވައިގެން ހިންގަމުންގެންދާ ކެމްޕޭނެއް ކަމަށް މިގަރާރުގައި ބުނެފައިވެއެވެ.

އަދި ދިވެހިރާއްޖެއިން ބައިވެރިވެފައިވާ ބައިނަލްއަޤްވާމީ މުޢާހަދާތައް ކަމުގައިވާ ވިއެނާ ކޮންވެންޝަން އޮން ޑިޕްލޮމެޓިކް ރިލޭޝަންސް (1961) އާއި، ވިއެނާ ކޮންވެންޝަން އޮން ކޮންސިއުލަރ ރިލޭޝަންސް (1963) ގެ ދަށުން، ރާއްޖޭގައި ޤާއިމުކޮށްފައިވާ ބޭރުގެ ޑިޕްލޮމެޓިކް މިޝަންތަކާއި އެ ތަންތަނުގައި މަސައްކަތްކުރާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކޮށްދިނުމަކީ ހޯސްޓް ނޭޝަންގެ ހައިސިއްޔަތުން ދިވެހި ދައުލަތުގެ ޒިންމާއެއް ކަމުގައެވެ.

މި ނުރައްކާތަކުން ދިވެހިރާއްޖެ ސަލާމަތް ނުކުރެވިއްޖެނަމަ، އެކި ގޮތްގޮތުން ދިވެހި ރައްޔިތުން ތަޙައްމަލުކުރަން ޖެހޭނެ ބުރަޔަކީ މިން ނުކުރެވޭނެ އަދި ފޫނުބެއްދޭނެ ބުރަތަކެއް ކަމުގައި ގަބޫލުކުރެވޭތީއާއި، ދިވެހިރާއްޖެ މިނިވަން ދައުލަތެއްގެ ގޮތުގައި ދެމެހެއްޓުމަށާއި، ބޭރު ޤައުމުތަކުގައި ދިރިއުޅޭ ދިވެހީންނާއި ބޭރު ޤައުމުތަކަށް ޒިޔާރަތްކުރާ ދިވެހީންނަށް ރައްކާތެރިކަން ކަށަވަރު ކޮށްދިނުމަށާއި، ދިވެހި ރައްޔިތުންނާއި ދިވެހި ދައުލަތުގެ ރައްކާތެރިކަމުގައި ތިބި ބިދޭސީންނަށް ފޯރުކޮށްދޭންޖެހޭ ރައްކާތެރިކަމާއި ޙިމާޔަތް ޔަގީންކޮށްދިނުމަށް ދަތިވާނެ ކަމެއް ކަމުގައި ވެސް ގަބޫލުކުރެވޭ ކަމަށެވެ.

މީގެ އިތުރުން ޤައުމީ ސަލާމަތަށް ނުރައްކާވާ ފަދަ ކޮންމެ ހަރަކާތަކީ ދިވެހި ސަރުކާރުން އެ ކަމެއް ހުއްޓުވަންޖެހޭނެ ކަމެއް ކަމުގައި ވާތީ، ދިވެހި ދައުލަތުގެ ފުދުންތެރިކަމާއި ފާގަތިކަމަށާއި ރާއްޖޭގެ ޤައުމީ ސަލާމަތަށް ކުރާ ނޭދެވޭ ކޮންމެ އަސަރަކީ، ދިވެހި ކޮންމެ ރައްޔިތަކަށް ލިބިގެންދާނެ އަނިޔާއެއް ކަމުގައި ފާހަގަކޮށް، އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ޤައުމަކާ ދެކޮޅަށް ރާވައިގެން ހިންގާ ކެމްޕޭނުތަކަކީ ޤައުމީ ސަލާމަތާ ގުޅުންހުރި އަދި ނުރައްކާ އޮތް ކަމެއްކަމަށެވެ.

އަދި ވަކިވަކި ޤައުމުތަކާ ދެކޮޅަށް ނަފުރަތު އުފެއްދުމަށް ހިންގޭ މިފަދަ ހަރަކާތްތަކަކީ ޤާނޫނު ތަންފީޛުކުރާ އިދާރާތަކުން ހުއްޓުވަން ޖެހޭނެ ހަރަކާތްތަކެއް ކަމުގައި ކަނޑައެޅުމަށް މަޖިލީހުން ނިންމައިފައިވީ ހިނދު ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ (ނ) އާއި، (ރ) އާއި (މ) އިން ރައީސުލްޖުމްހޫރިއްޔާއާ މަތިކޮށްފައިވާ ބާރުތަކާއި މަސްއޫލިއްޔަތުތަކުގެ ދަށުން، މި ފަދަ ހަރަކާތްތައް ހުއްޓުވުމަށް ކަނޑައަޅައި، މިކަން މިގޮތުގެ މަތީން ތަންފީޛުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ޤަރާރު އެކަށައެޅީ ކަމަށެވެ.