ދިވެހި ޕްރިމިއާ ލީގު ފެށުން މި މަހު 16 އަށް ފަސްކޮށްފި

މީގެ ކުރިން އަންނަ ހަފުތާގައި ފަށަން ނިންމާފައި އޮތް ދިވެހި ޕްރިމިއާ ލީގު މި މަހު 16 ވަނަ ދުވަހު ފަށާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބަދަލުކޮށްފިއެވެ.

އެފްއޭއެމުން އެންމެ ފުރަތަމަ ނިންމާފައި އޮތީ މި މަހުގެ 12 ވަނަ ދުވަހު ދިވެހި ޕްރިމިއާ ލީގު ފަށާގޮތަށެވެ. އެކަމަކު ބުދަ ދުވަހު އެފްއޭއެމުން ބޭއްވި ބައްދަލުވުމަށް ފަހު މި މަހު 16 ވަނަ ދުވަހަށް ލީގު ފެށުން ފަސްކޮށްފައިވާ ކަމަށް މިހާރު ކުލަބުތަކަށް ވަނީ އަންގާފައެވެ. ލީގު ފެށުން އެފްއޭއެމުން ފަސްކުރިއިރު، މި މަހު 13 ވަނަ ދުވަހު ކުޅެން ހަމަޖެހައިފައިވާ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް މެޗު ފ. ނިލަންދޫ ޓާފް ދަނޑުގައި ކުޅެން އެފްއޭއެމުން އަންނަނީ މަސައްކަތްކުރަމުންނެވެ.

މިދިޔަ ސީޒަނުގެ ލީގުގައިވެސް ކުޅުނު އަށް ޓީމާއެކު މި ސީޒަނުގެ ދިވެހި ޕްރިމިއާ ލީގު ކުރިއަށްދާއިރު، މި ފަހަރުގެ ލީގުގައިވެސް ތިން ބުރު ކުޅުމަށް ވަނީ ނިންމާފައެވެ. ނިމިދިޔަ ސީޒަނުގައިވެސް ލީގުގައި ތިން ބުރެއް ކުޅެން އެންމެ ފުރަތަމަ ނިންމި ނަމަވެސް، އެ ފަހަރު ދެވަނަ ބުރާ ހަމައިން ލީގު ވަނީ ނިންމާލާފައެވެ. އެގޮތުން ރާއްޖޭގެ ކޮވިޑް-19 ގެ ހާލަތާ ގުޅިގެން މިދިޔަ މެއި މަހުގެ ތެރޭގައި ތިންވަނަ ބުރު ނުކުޅެ މިދިޔަ ސީޒަނުގެ ދިވެހި ޕްރިމިއާ ލީގު ކުރުކޮށްލުމަށް އެފްއޭއެމުގެ ހިންގާ ކޮމިޓީން ނިންމީ ކުލަބުތަކާއެކު މަޝްވަރާކުރުމަށްފަހުއެވެ.

އެއާއެކު މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ނުވަ ޕޮއިންޓުގެ ލީޑަކާއެކު މިދިޔަ ސީޒަނުގެ ލީގު ޗެމްޕިއަންކަން ދިފާއުކޮށްފައެވެ. މާޒިޔާއަށް ކުޅުނު 14 މެޗުން 34 ޕޮއިންޓް ލިބުނުއިރު، ދެވަނައިގައި އޮތް ކުލަބު ވެލެންސިއާއަށް 14 މެޗުން ލިބުނީ 25 ޕޮއިންޓެވެ.

މި ސީޒަނުގައިވެސް މި އަށް ޓީމު ދިވެހި ޕްރިމިއާ ލީގުގައި ވާދަކުރާއިރު، މި ފަހަރު އެއްވެސް ޓީމެއް ރެލިގޭޓުވެފައި ނުވަނީ މިދިޔަ ސީޒަނުގައި ދެވަނަ ޑިވިޝަން ބާއްވާފައި ނުވާތީއެވެ. އެކަމަކު މި ސީޒަނުގައި ދެވަނަ ޑިވިޝަން އަނެއްކާވެސް ބާއްވާއިރު، އެފްއޭއެމުން ނެރެފައިވާ ކަލަންޑަރުގައިވާ ގޮތުން އެ މުބާރާތް ކުރިއަށްދާނީ މި އަހަރު ޖޫން މަހުގެ 27 ވަނަ ދުވަހުން ފެށިގެން ޖުލައި މަހުގެ 28 ވަނަ ދުވަހުގެ ނިޔަލަށެވެ. އަދި އޭގެ ފަހުން ދިވެހި ޕްރިމިއާ ލީގުގެ ކޮލިފިކޭޝަން މެޗުތައް ކުޅުމަށް ތާވަލުކޮށްފައި ވަނީ އޮގަސްޓް މަހުގެ ތެރޭގައެވެ.