ކަރަންޓީނުގައި ތިބި މީހުން ބައި އިލެކްޝަނުގައި ވޯޓުލާން ދާނެ ގަޑި އިއުލާންކޮށްފި

ފެބުރުވަރީ 05 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ބައި އިލެކްޝްންގައި ވޯޓުލުމަށް ރަޖިސްޓްރީ ވެފައިވާ މީހުންގެ ތެރެއިން ކޮވިޑް-19 އަށް ޕޮޒިޓިވްވެފައިވާ މީހުންނާއި ކަރަންޓީނުގައި ތިބި މީހުން ވޯޓުލާން ކަނޑައެޅިފައިވަނީ އެދުވަހުގެ 15:00 އިން 16:00 އަށް ކަމަށް އިލެކްޝަން ކޮމިޝަން (އީސީ) އން ބުނެފިއެވެ.

ފެބްރުއަރީ 5 ގައި ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި، ތ.ވިލުފުށި އަދި ގއ.ގެމަނަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން ކުރިޔަށްދާނެއެވެ. އީސީން ބުނީ މިފަދަ މީހުން ވޯޓުލާ މަރުކަޒަށް ވޯޓުލުމަށް ދާއިރު ހެލްތު ޕްރޮޓެކްޝަން އެޖެންސީއިން ކަނޑައަޅާފައިވާ ރައްކާތެރިކަމުގެ ފިޔަވަޅުތައް އަޅައިގެން އައުމަށް އެދޭކަމަށެވެ.

ޖެނުއަރީ މަހުގެ 23 ވަނަ ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑެމޮލޮޖިސްޓް ޑރ.އިބްރާހިމް އަފްޒަލް ވިދާޅުވީ ކޮވިޑް-19 އާއި ގުޅިގެން އަޅާފައިވާ ފިޔަވަޅުތަކާއެކު ކޮމަންޑޫ ދާއިރާގެ ބައި އިލެކްޝަން ކުރިއަށް ގެންދިއުމާމެދު އެޗްޕީއޭގެ އިއުތިރާޒެއް ނެތް ކަމަށެވެ. އެޗްޕީއޭގެ ވިސްނުމަކީ ގައިޑްލައިނާއި އުސޫލުތަކާއެކު އިންތިޚާބު ކުރިއަށް ގެންދިއުމުގެ ފުރުސަތު ދިނުން ކަމަށެވެ. އެގޮތުން އުސޫލުތަކާ އެއްގޮތަށް އެކަންކަން ކުރިއަށް ދޭތޯ އެޗްޕީއޭއިން ބަލާނެ ކަމަށާއި، އެގޮތަށް އެކަން ކުރިއަށް ނުދާނަމަ ދެން އަޅަންޖެހޭ ފިޔަވަޅުތައްވެސް އަޅުއްވާނެ ކަމަށް ޑރ.އަފްޒަލް ވިދާޅުވިއެވެ.

މިދިޔަ އަހަރުގެ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިޚާބުގައިވެސް ކޮވިޑަށް ޕޮޒިޓިވްވެފައިވާ މީހުންނާއި ކަރަންޓީނުގައި ތިބި މީހުންނަށް ވޯޓުލުމުގެ ފުރުސަތު ދީފައިވެއެވެ.

ކޮމަންޑޫ ދާއިރާގައި ހިމެނޭ ތިން ރަށްކަމަށްވާ ކޮމަންޑޫއާއި، ފޯކައިދޫ އަދި މަރޮށި ހިމެނޭ އެ ދާއިރާގައި 3،316 މީހުންނަށް ވޯޓްލުމުގެ ހައްގު ލިބިގެންވެއެވެ. އަދި 7 ވޯޓް ފޮށްޓެއް އެ އިންތިޚާބުގައި ބަހައްޓަން ނިންމާފައިވެއެވެ.

ވޯޓު ނެގުމަށް ހަމަޖެހިފައިވަނީ ފެބުރުއަރީ 5ވާ ހޮނިހިރު ދުވަހުގެ ހެނދުނު 8:00 އިން ހަވީރު 4:00 އަށެވެ.