ސްޓްރިޓް ސްކޭޕިން މަސައްކަތާއެކު, މާލޭގެ މަގުތަކުގައި ފެން ބޮޑުވާ މައްސަލައަށް ހައްލު ލިބެމުންދާތަން ފެންނަމުންދާކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހު ވިދާޅުވެއްޖެއެވެ.
ފެނާއި ނަރުދަމާގެ މަސައްކަތްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝާހު ވިދާޅުވީ, ކުރާ މަސައްކަތެއް ތަކުރާރުކޮށް ކުރަން ނުޖެހޭނެ ގޮތަކަށް އެކަމެއް ކުރުމަކީ މި ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެވެ. އެގޮތުން ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ)އިން ކުރިއަށްގެންދާ މާލޭގެ ސްޓްރީޓް ސްކޭޕިން ޕްރޮޖެކްޓުގެ ތެރެއިން މިހާރު ނިންމާފައިވާ މަގުތަކަށް ބަލާއިރު އެކަން ފެނިގެންދާކަމަށް ޝާހު ވިދާޅުވިއެވެ.
ޝާހު ވިދާޅުވީ މި ޕްރޮޖެކްޓުގެ ތެރެއިން މިހާރު މަސައްކަތް ނިންމާފައިވާ ސަރަހައްދުތަކަށް ބަލާއިރު މި މަސައްކަތް ނިންމާފައިވަނީ ވަރަށް ފުރިހަމައަށްކަން ފާހަގަވާ ކަމަށެވެ. މިގޮތުން ބޯކޮށް ވަރޭ ވެހޭ ދުވަސްތަކުގައި މީގެ ކުރިން ފެން ބޮޑުވިހެން މިހާރު ފެން ބޮޑު ނުވާކަން ފާހަގަކުރެވިފައިވާކަމަށެވެ. ސްޓްރީޓް ސްކޭޕިންގެ މަސައްކަތުގެ ތެރެއިން, ސްޓޯމްވޯޓަރ މެނޭޖްމެންޓް ސިސްޓަމެއް ގާއިމުކުރުމަކީ މުހިންމު ކަމެއް ކަމަށާއި، އެކަން މި މަސައްކަތުގެ ތެރެއިން ކޮށްފައިވާކަމަށް ޝާހު ވިދާޅުވިއެވެ.
ޝާހު ވިދާޅުވީ ސްޓްރީޓް ސްކޭޕިންގެ މަސައްކަތް މީގެ ކުރިން ވަރަށް ބާރު ސްޕީޑެއްގައި ކުރިއަށްގޮސްފައިވާކަމަށެވެ. އެހެންނަމަވެސް މިހާރު މި މަސައްކަތަށްވެސް މަޑުޖެހުމެއް އައިސްފައިވާކަން ފާހަގަކުރެވޭކަމަށެވެ.
ބޯކޮށް ވާރޭވެހޭ ކޮންމެ ފަހަރަކު މާލޭގެ މަގުތަކުގައި ފެންބޮޑުވާ މައްސަލައަށް އިޝާރާތްކުރައްވައި ވާހަކަދައްކަވަމުން މީގެ ކުރިން ޝާހު ވިދާޅުވީ, މާލޭގެ ފެން ހިންދާ ނިޒާމު ގާއިމުކޮށްފައިވަނީ މަގުތަކުގައި ފެން ބޮޑުވާ މައްސަލައަށް ވަގުތީ ހައްލެއް ހޯދައިދިނުމަށް ކަމަށެވެ. އަދި މި މައްސަލައަށް އެދެވޭ ހައްލެއް ހޯދޭނީ ފެން ބޮޑުވާ ހުރިހާ ސަރަހައްދެއްގައިވެސް ޕަމްޕު ބަހައްޓައިގެން ކަމަށް ޝާހު ވިދާޅުވިއެވެ.
