ކޮމަންޑޫ ދާއިރާގެ ބައި-އިލެކްޝަން ގައި މޮނީޓަރަކަށްވުމުގެ ފުރުސަތު ހުޅުވާލައިފި
ފެބުރުއަރީ 01 ވާ އަންގާރަ ދުވަހުގެ 14:00 އާއި ހަމަޔަށް ފުރުސަތު ވަނީ ހުޅުވާލާފައި
ލޯކަލް ކައުންސިލް އިންތިޚާބުގެ ތެރެއިން
ފެބްރުއަރީ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި-އިލެކްޝަން މޮނީޓަރު ކުރުމަށް ޝައުޤުވެރިވާ ފަރާތްތަކަށް އެކަމަށް އެދި ހުށަހެޅުމަށް އިތުރު ފުރުޞަތެއް ދިނުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އީސީން ބުނީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި އެދާއިރާގެ ރައްޔިތުން މާލޭގައި ވޯޓުލުމަށް އިތުރު ވޯޓު ފޮށްޓެއް ބަހައްޓަން ކޮމިޝަނުން ނިންމާފައިވާތީ އާއި، ޑިޕާރޓްމަންޓް އޮފް ނޭޝަނަލް ރަޖިސްޓްރޭޝަންގެ އިޢުލާނަކުން އައިޑީކާޑުތައް ބަލައިގަންނަ ގޮތަށް ނިންމާފައިވާތީ އާއި، ގިނަ އަދަދެއްގެ މީޑިއާތަކުން މޮނީޓަރުންގެ ގޮތުގައި ހަރަކާތްތެރިވުމަށް ބޭނުންވާކަމަށް މިހާރުވެސް އެދެމުންދާތީ، ބައި-އިލެކްޝަންގައި ވޯޓު ނެގުމާއި، ވޯޓު ގުނުމުގެ ކަންތައްތައް މޮނީޓަރު ކުރުމަށް އިތުރު ފުރުޞަތެއް ދިނުމަށް އެކޮމިޝަނުން ނިންމީކަމަށެވެ.
އެގޮތުން މޮނީޓަރުންގެ ގޮތުގައި ކުރިމަތިލުމަށް އެދި ފޯމު ހުށަހަޅާނީ ޖަނަވަރީ 31 ވާ ހޯމަ ދުވަހުން ފެށިގެން، ފެބުރުއަރީ 01 ވާ އަންގާރަ ދުވަހުގެ 14:00 އާއި ހަމަޔަށް ކަމަށް އީސީން ބުނެއެވެ.
ބައި-އިލެކްޝަން މޮނީޓަރުކުރުމުގެ ހުއްދަ ދެވޭނީ އެކަމަށް ޝަރުޠުތައް ފުރިހަމަވާ ފަރާތްތަކަށް ކަމަށް އީސީން ބުނެއެވެ. އެގޮތުން އުމުރުން 18 އަހަރު ފުރިފައިވާ ދިވެއްސެއް ކަމުގައިވެފައި ޖިނާއީ ކުށެއްގައި ޙުކުމް ތަންފީޒު ކުރެވެމުންދާ މީހެއްކަމުގައި ނުވުން ޝަރުތުތަކުގައި ހިމެނެއެވެ. މީގެއިތުރުން މޯލްޑިވްސް ބްރޯޑްކާސްޓިންގ ކޮމިޝަންގައި ރަޖިސްޓަރީ ކޮށްފައިވާ ރޭޑިއޯ/ޓީވީ ސްޓޭޝަނެއްގައި މަސައްކަތް ކުރާ މީހެއްކަން އިލެކްޝަންސް ކޮމިޝަނަށް ކަށަވަރުވާ މީހެއްކަމުގައިވުން، ނުވަތަ، ނޫސް މަޖައްލާފަދަ ތަކެތީގެ ޤާނޫނުގެ ދަށުން ރަޖިސްޓަރީކޮށްފައިވާ ނޫހެއް ނޫނީ މަޖައްލާއެއްގައި މަސައްކަތް ކުރާ މީހެއްކަން އިލެކްޝަންސް ކޮމިޝަނަށް ކަށަވަރުވާ މީހެއްކަމުގައިވުން ނުވަތަ ބައިނަލްއަޤުވާމީ މީޑިއާއެއްގައި މަސައްކަތްކުރާ މީހެއްކަން އިލެކްޝަންސް ކޮމިޝަނަށް ކަށަވަރުވާ މީހެއްކަމުގައިވުން ހިމެނެއެވެ. އަދި ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި ބެހޭ މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި ނުވުންވެސް ބައި-އިލެކްޝަން މޮނީޓަރުކުރުމުގެ ހުއްދަ ދެވޭ ޝަރުޠުތަކުގެ ތެރޭގައި ހިމެނޭކަމުގައި އީސީން ބުނެއެވެ.
މޮނީޓަރުންގެ ގޮތުގައި ކުރިމަތިލުމަށް އެދޭ ފަރާތްތަކުގެ ފޯމު ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށެވެ. އަދި މޮނީޓަރުންގެ ގޮތުގައި ކުރިމަތިލުމަށް އެދޭ ފަރާތްތަކުން ހުށަހަޅަންޖެހޭ އެޕްލިކޭޝަން ފޯމު އެކޮމިޝަންގެ ވެބްސައިޓުން ލިބެން ހުންނާނެކަމަށް ވެސް ވަނީ ބުނެފައެވެ.
ކޮމަންޑޫ ދާއިރާއަށް ތިން ކެނޑިޑޭޓެއް ވާދަކުރެއެވެ. އެއީ ވެރިކަންކުރާ މައި ޕާޓީ އެމްޑީޕީގެ ފަރާތުން މުހައްމަދު ރަޝީދާއި، އިދިކޮޅު ޕީޕީއެމްގެ ފަރާތުން މޫސާ ފަތުހީ އާދަމާއި، ދާދި ފަހުން އުފެއްދި ސިޔާސީ ޕާޓީ އެމްއެންޕީގެ ފަރާތުން ވާދަކުރާ އަބްދުލްހަންނާން އިދުރީސްއެވެ.
ކޮމަންޑޫ ދާއިރާގައި ހިމެނޭ ތިން ރަށްކަމަށްވާ ކޮމަންޑޫއާއި، ފޯކައިދޫ އަދި މަރޮށި ހިމެނޭ އެ ދާއިރާގައި 3،316 މީހުންނަށް ވޯޓްލުމުގެ ހައްގު ލިބިގެންވެއެވެ.
ބައި އިލެކްޝަންތަކުގައި ވޯޓް ފޮށި ބެހެއްޓުމަށް ނިންމާފައިވަނީ އެ ދާއިރާތަކުގެ ރަށްތަކުގެ އިތުރުން މާލޭގައި އިސްކަންދަރު ސްކޫލުގައެވެ. އިސްކަންދަރު ސްކޫލުގައި ދެ ފޮއްޓެއް ބެހެއްޓުމަށް މިހާރު ވަނީ ނިންމާފައެވެ. މިއާއެކު ކޮމަންޑޫ ދާއިރާގެ ބައި އިލެކްޝަންގައި ޖުމްލަ 7 ވޯޓު ފޮއްޓެއް ބަހައްޓާނެއެވެ.
