ބ. ދަރަވަންދޫއާއި އެއަތޮޅު ކެންދޫގެ ގޮނޑުދޮށް ހިމާޔަތް ކުރުމުގެ މަޝްރޫއުގެ ސަރވޭތައް ނިމިފައިވާ ކަމަށް، މި ދެ މަސައްކަތާ ހަވާލުވެފައިވާ ކުންފުނި މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ހާމަކޮށްފިއެވެ.

އެމްޓީސީސީއިން މައުލޫމާތުދޭ ގޮތުގައި, ނިމިފައިވަނީ ދަރަވަންދޫ ގޮނޑުދޮށް ހިމާޔަތްކުރުމުގެ މަޝްރޫއުގެ މެރިންއާއި ޓްރެސްޓްރިއަލް ސަރވޭ އަދި ކެންދޫ ގޮނޑުދޮށް ހިމާޔަތްކުރުމުގެ މަޝްރޫއުގެ މެރިން ސަރވޭއެވެ.

ބ. ދަރަވަންދޫ ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން, އެރަށުގެ ގިރާ ސަރަހައްދު ހިމާޔަތްކުރުމަށް 490 މީޓަރުގެ 7 ބްރޭކްވޯޓަރއާއި 96 މީޓަރުގެ ރިވެޓްމެންޓް ޖެހުމުގެ މަސައްކަތް ކުރުން ހިމެނެއެވެ. މި މަޝްރޫއު 180 ދުވަހުގެ ތެރޭގައި ނިންމުމަށް ހަމަޖެހިފައިވާއިރު, މިއީ 22.14 މިލިއަން ރުފިޔާގެ މަޝްރޫއެކެވެ.

މީގެ އިތުރުން ކެންދޫ ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން, އެރަށު ގިރާ ސަރަހައްދު ހިމާޔަތްކުރުމަށްޓަކައި 90 މީޓަރުގެ ދެ ގްރޮއިން ގާއިމުކުރުމާއި 803 މީޓަރުގެ 17 ބްރޭކްވޯޓަރ ގާއިމު ކުރުމުގެ މަސައްކަތް ހިމެނެއެވެ. އަދި 80 މީޓަރުގެ ބޮޑުހިލައިގެ ރިވެޓްމެންޓު ޖެހުމާއި 40 މީޓަރު 20 މީޓަރު ސަރަހައްދެއް ފުންކޮށް، މޫދަށް އެރޭ ސަރަހައްދެއް ތަރައްގީ ކުރުން ހިމެނެއެވެ. ޖުމްލަ 39.99 މިލިއަން ރުފިޔާގެ މި މަޝްރޫއަކީ 365 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫއެކެވެ.

މިވަގުތު ރ. އަލިފުށީ ގޮނޑުދޮށް ހިމާޔަތްކުރުމުގެ މަޝްރޫއުގެ މެރިންއާއި ޓްރެސްޓްރިއަލް ސަރވޭ ފަށައިގެން ކުރިއަށްދާ ކަމަށްވެސް އެމްޓީސީސީން މައުލޫމާތުދެއެވެ.