ޓެކްސީ ސެންޓަރުތަކަށް ޓްރާންސްޕޯޓް މިނިސްޓްރީގެ އެއްބާރުލުން ނުލިބޭކަމަށް ބުނާ ވާހަކައަކީ ކަނޑައެޅިގެން ދޮގެއް ކަމަށް ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީ ވިދާޅުވެއްޖެއެވެ.

ޓެކްސީ ޑްރައިވަރުންގެ ކަންބޮޑުވުންތަކަށް މިސަރުކާރުން ހައްލު ހޯދައިނުދޭ ކަމަށާއި، ޓްރާންސްޕޯޓު މިނިސްޓްރީގެ ފަރާތުން އެއްވެސް އެއްބާރުލުމެއް ނުލިބޭ ކަމަށް ޓެކްސީ ޑްރައިވަރުންގެ ޖަމިއްޔާއިން ވަނީ ބުނެފައެވެ. މިކަމާއި ގުޅިގެން ރާއްޖެއެމްވީއަށް މައުލޫމާތުދެއްވަމުން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް ވިދާޅުވީ ޓެކްސީ ސެންޓަރުތަކުން ހުށަހަޅާފައިވާ އެއްވެސް މައްސަލައެއް މިހާތަނަށް ދޫކޮށްލާފައިނުވާނެ ކަމަށެވެ.

ޓެކްސީ ސެންޓަރުތަކުގެ ހުރި ކަންބޮޑުވުންތައް ހައްލުކުރުމަށް އެފަރާތްތަކާއެކު މަޝްވަރާކުރުމަށް ބައްދަލުވުންތަކެއްވެސް ބާއްވާފައިވާނެކަމަށްވެސް ޝިމާޒް ވިދާޅުވިއެވެ. އެހެންނަމަވެސް ޓެކްސީ ޑްރައިވަރުންގެ ޖަމިއްޔާއިން ބުނެފައިވަނީ މިނިސްޓްރީ އާއި މަޝްވަރާކޮށްގެން މައްސަލަތައް ހައްލުކުރުމަށް ކުރި މަސައްކަތް ނާކާމިޔާބު ވެފައިވާކަމަށެވެ.

މީގެ އިތުރުން ޓެކްސީތަކުގެ އަގުތައް ކަނޑައެޅުމުގައި ޓްރާންސްޕޯޓް މިނިސްޓްރީން ޓެކްސީ ސެންޓަރުތަކާއި މަޝްވަރާކޮށްފައި ނުވާކަމަށް ޓެކްސީ ޑްރައިވަރުންގެ ޖަމިއްޔާއިން ބުނެފައިވާ ބުނުމަށް އިޝާރާތްކުރައްވައި ޝިމާޒް ވިދާޅުވީ އެއީ ކަނޑައެޅިގެން ދޮގެއް ކަމަށެވެ. ޓެކްސީތަކުގެ އަގު ކަނޑައެޅީ ޓެކްސީ ސެންޓަރުތަކާއި މަޝްވަރާކޮށް، އެފަރާތްތަކުންވެސް އެގޮތަށް އެއްބަސްވުމުން ކަމަށް ޝިމާޒް ވިދާޅުވިއެވެ.

ޓެކްސީ ޑްރައިވަރުން މާލޭގެ އެތެރޭގެ ދަތުރުތައް ނަގަން އިންކާރު ކުރާ މައްސަލަ ބޮޑުވުމުގެ ސަބަބުން ޓްރާންސްޕޯޓް މިނިސްޓްރީން މިހާރު ވަނީ އެމިނިސްޓްރީއަށް ޝަކުވާ ހުށަހެޅޭނެ ނިޒާމެއް ޤާއިމްކޮށްފައެވެ. އެހެންނަމަވެސް މިކަމާ ގުޅޭ ގޮތުންވެސް ޓެކްސީ ޑްރައިވަރުންގެ ޖަމިއްޔާއިން ބުނީ ގިނަ ޑްރައިވަރުން މާލެއިން ދަތުރު ނަގަން އިންކާރު ނުކުރާ ކަމަށެވެ. މާލޭއިން ހުޅުމާލޭގެ ދެވަނަ ފިޔަވައްސަށް ދިޔުމަށް އެތައް ވަގުތެއް ނަގާއިރު، ލިބެނީ 90 ރުފިޔާ ކަމަށް އެ ޖަމިއްޔާއިން ބުނެފައިވެއެވެ. އަދި މާލޭގެ އެތެރެއިން 25 ރުފިޔާ ދަތުރަށް ނަގާއިރު ދެވަނަ ފިޔަވައްސަށް ދިއުމަށް ނަގާ ވަގުތާ އަޅާބަލާއިރު ނުބައްދަލު ކަމަށް އެ ޖަމިއްޔާއިން ބުނެފައިވެއެވެ.

މާލެ ތެރޭގައި އާންމުކޮށް ޓެކްސީ ދަތުރުތައް ކޮށްދެނީ 25 ރުފިޔާއަށެވެ. ނަމަވެސް މާލެ އާއި ހުޅުމާލޭގެ އެއްވަނަ ފިޔަވައްސާ ދެމެދުގެ ދަތުރުތައް ކުރަނީ 75 ރުފިޔާއަށެވެ. ދަންވަރު 12ގެ ފަހުން މި ދަތުރުތައް ކުރަނީ އިތުރަށް ފަސް ރުފިޔާ ޗާޖުކޮށްފައެވެ.

މާލެ އާއި ހުޅުމާލޭގެ ދެވަނަ ފިޔަވައްސާއި ދެމެދު ކުރާ ދަތުރުތަކަށް އާންމުކޮށް ނަގަނީ 90 ރުފިޔާއެވެ. އަދި މާލެ އާއި އެއާރޕޯޓާއި ދެމެދު ދަތުރުކޮށްދޭ އާންމު އަގަކީ 65 ރުފިޔާއެވެ. ދަންވަރު 12 ގެ ފަހުން މި ދަތުރުތައް ކުރާނަމަ އިތުރަށް 10 ރުފިޔާ ޗާޖުކުރެއެވެ.