ދިގުރަށުން ގޯތި ދިނުމުގެ އެންމެހައި ކަންކަން ހުއްޓާލުމަށް ކޯޓުން ވަގުތީ އަމުރެއް ނެރެފި

އދ. ދިގުރަށުން ގޯތި ދިނުމުގެ އެންމެހައި ކަންކަން ހުއްޓާލުމަށް ދިގުރަށު މެޖިސްޓްރޭޓް ކޯޓުން ވަގުތީ އަމުރެއް ނެރެފިއެވެ.

ދިގުރަށުން ގޯތި ދޫކުރުން މެދުކަނޑާލުމަށް ކޯޓުން ނެރެފައިވާ ވަގުތީ އަމުރުގައި ވިދާޅުވެފައިވަނީ ދިގުރަށުން ގޯތި ދޫކުރުމުގެ އުސޫލުގެ މައްސަލައިގައި ޝަރީއަތުން ހުކުމެއް ކޮށް ނިމެންދެން ނުވަތަ ކޯޓުން ވަކި ގޮތަކަށް އަންގަންދެން ގޯތި ދޫކުރުމަށްޓަކައި ކުރަމުންދާ އެންމެހައި ކަންކަން ހުއްޓާލުމަށް އދ. ދިގުރަށު ކައުންސިލް އިދާރާގެ މައްޗަައްށާއި މިކަމުގައި ޝާމިލްވާ އެންމެހައި ފަރާތަކުގެ މައްޗައް އަމުރު ނެރޭކަމަށެވެ.

މިއަމުރުގައި ބުނެފައިވާ ގޮތުގައި މި މައްސަލަ އަކީ އދ.ދިގުރަށުން ބަންޑާރަ ގޯތި ދޫކުރުމަށްޓަކައި، އދ.ދިގުރަށު ކައުންސިލް އިދާރާއިން ފާސްކޮށް، އެ އިދާރާގެ އިޢުލާނެއްގެ ދަށުން ނެރެފައިވާ، ގޯއްޗަށް އެދޭ މީހުންނަށް ޕޮއިންޓް ދޭ އުޞޫލުގެ ޕޮއިންޓު އުނިކުރެވޭ ބައިތަކުގެ ސުރުޙީގެ ދަށުން ގޯއްޗަށް އެދިފައިވާ މީހާ ނުވަތަ ގޯއްޗަށް އެދިފައިވާ މީހާގެ އަނބިމީހާ ނުވަތަ ފިރިމީހާ ގޯއްޗެއް ވިއްކާލައި ނުވަތަ މީހަކަށް ދިންތާ 10 އަހަރު ނުވާނަމަ، 20 ޕޮއިންޓު އުނިކުރެވޭނެ ކަމަށް ބަޔާކޮށްފައިވާ ބައި، އުނިކުރުމަށް އެދި މައްސަލަ ހުށަހަޅައި، އެ މައްސަލަ ހިނގަމުން ދަނިކޮށް، އދ.ދިގުރަށުން ބަންޑާރަ ގޯތި ދޫކުރުމަށްޓަކައި އިޢުލާންކޮށްފައި ވާތީ ކުރިއަށްދާ މައްސަލައެއް ކަމަށެވެ. އަދި ޕޮއިންޓު ދިނުމުގެ އުޞޫލު މުރާޖަޢާކޮށް، އަލުން އެކުލަވާލުމަށް އެދި ހުށަހަޅާފައިވާ އެކޯޓުގެ ޤަޟިއްޔާ ހިންގައި ނިންމާއިރު، ބަޔާންވެ ދިޔަ އިޢުލާނުގެ ދަށުން ގޯތި ދިނުމުގެ މަރުޙަލާ ނިމިފައިވާނަމަ، ޕޮއިންޓު ދިނުމުގެ އުޞޫލުގައި ހިމަނާފައިވާ ޤާނޫނާއި ޚިލާފު މާއްދާ އާއި ގުޅިގެން ގޯތި ލިބުން މަޙްރޫމްވި ފަރާތްތަކަށް އިޢާދަ ނުކުރެވޭނެ ގެއްލުމެއް ލިބިދާނެ ކަމަށްޓަކައި، ވަގުތީ އަމުރަކަށް އެދި އަމިއްލަ ފަރާތަކުން ހުށަހެޅުމުން ބެލިފައިވާ މައްސަލައެއް ކަމަށެވެ.

އދ. ދިގުރަށުން ގޯތި ދޫކުރުމަށް އެރަށުން ގޯއްޗަށް އެދޭ ފަރާތްތަކުން ފޯމު ހުށަހެޅުމުގެ ފުރުޞަޠު ހުޅުވާލީ 2 ޑިސެމްބަރ 2021 އިން ފެށިގެން 2 ޖަނަވަރީ 2022 ވާ އާދީއްތަ ދުވަހު މެންދުރުފަހު 13:00 އާއި ހަމައަށެވެ. އެރަށުން މިފަހަރު ދޫކުރުމަށް ކަނޑައަޅާފައިވަނީ 2000 އަކަފޫޓުގެ 77 ގޯއްޗެވެ.