ދިގުރަށުން ބަންޑާރަ ގޯއްޗަށް އެދުމުގެ ފުރުސަތު ހުޅުވާލައިފި
މިފަހަރު ދޫކުރުމަށް ކަނޑައަޅާފައިވަނީ 2000 އަކަފޫޓުގެ 77 ގޯތި
އދ. ދިގުރަށް
އދ.ދިގުރަށުން ދޫކުރާ ބަންޑާރަ ގޯއްޗަށް އެދި ފޯމު ހުށަހެޅުމުގެ ފުރުސަތު އެރަށު ކައުންސިލުން ހުޅުވާލައިފިއެވެ.
ގޯއްޗަށް އެދި ހުށަހެޅުމުގެ ފުރުސަތު ހުޅުވާލަމުން ދިގުރަށު ކައުންސިލުން ހުކުރުދުވަހު ކުރި އިއުލާނެއްގައި ވަނީ، އެރަށުން ގޯއްޗަށް އެދޭ ފަރާތްތަކުން ފޯމު ހުށަހެޅުމުގެ ފުރުސަތު، 2 ޑިސެންބަރ 2021ން ފެށިގެން 2 ޖަނަވަރީ 2022 ވާ އާދީއްތަ ދުވަހު މެންދުރުފަހު 13:00 އާއި ހަމައަށް ހުޅުވާލެވިފައިވާ ކަމަށެވެ. މިގޮތުން މިފަހަރު ދޫކުރުމަށް ކަނޑައަޅާފައިވަނީ 2000 އަކަފޫޓުގެ 77 ގޯއްޗެވެ.
އެރަށު ކައުންސިލުން ބުނީ ގޯއްޗަށް އެދޭ ފޯމު، ރަސްމީ ކޮންމެ ދުވަހެއްގެ ހެނދުނު 10:00ން މެންދުރު 12:00ށް އެ ކައުންސިލުން ލިބެން ހުންނާނެކަމަށާއި، ފޯމު ބަލައިގަތުން ކުރިޔަށްދާނީ ރަސްމީ ކޮންމެ ދުވަހެއްގެ މެންދުރު 12:00ން 14:00ށް ކަމަށެވެ.
ދިގުރަށުން ގޯއްޗަށް އެދޭ މީހުންގެ ކިބައިގައި ހުންނަންޖެހޭ ޝަރުތުތައްވެސް ކައުންސިލްގެ އިއުލާނާއިއެކު ވަނީ އާންމުކޮށްފައެވެ. އޭގެ ތެރޭގައި، ދިވެހި ރައްޔިތަކުކަމުގައި ވުމާއި، އުމުރުން 18 އަހަރު ވެފައިވާ މީހަކު ކަމަށް ވުމުގެ އިތުރުން، އަމިއްލަ ނަމުގައި ރަޖިސްޓްރީކޮށްފައިވާ ގޯއްޗެއް ނެތުމާއި، އަމިއްލަ ނަމުގައި ރަޖިސްޓްރީކޮށްފައިވާ ފުލެޓެއް ނުވަތަ އެއްމެދު އިމާރާތެއް އޮތްނަމަ އެތަން ދޫކޮށްލިތާ ނުވަތަ ވިއްކާފައިވާތާ 2 އަހަރަށްވުރެ ގިނަދުވަސްވެފައިވުން ފަދަ ޝަރުތުތައް ހިމެނެއެވެ.
މީގެ އިތުރުން، ގޯއްޗަށް އެދޭ ފަރާތްތަކަށް ޕޮއިންޓް ދިނުމުގެ އުސޫލުވެސް ދިގުރަށު ކައުންސިލުން ވަނީ އާންމުކޮށްފައެވެ. ޕޮއިންޓު ދިނުމުގެ އުސޫލުގައިވާ ގޮތުން އެންމެ ގިނަ ޕޮއިންޓް ލިބެނީ މީހަކާ އިނދެގެން އުޅޭނަމައެވެ. މިގޮތުން، މީހަކާއި އިނދެގެން އުޅޭނަމަ އެ ފަރާތަކަށް 30 ޕޮއިންޓް ލިބެއެވެ. އަދި ގޯއްޗަށް އެދޭ ފަރާތަކީ ރަށުގެ ރަށްވެއްސަކަށް ނުވާނަމަ 30 ޕޮއިންޓް އުނިކުރެވޭނެ ކަމަށްވެސް މި އުސޫލުގައި ވެއެވެ.
