އޮގަސްޓުގެ ކުރިން ހިތްފަސޭހަ ބަހުގެ ޚިދުމަތެއް އެމްޓީސީސީން ފޯރުކޮށްދޭނެ: އާޒިމް
ރަނގަޅު ބަހުގެ ނިޒާމެއް ހުޅުމާލެ ފޭސް 2 ހިމެނޭ ގޮތަށް ގާއިމުކުރުމުގެ މަސައްކަތް އަންނަނީ ކުރަމުން
އެމްޓީސީސީގެ ސީއީއޯ އާދަމް އާޒިމް
މިއަހަރުގެ އޮގަސްޓް މަސް އައުމުގެ ކުރިން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބަހުގެ ޚިދުމަތް ފޯރުކޮށްދެމުންދާ ތަންތަނުން ހިތްފަސޭހަ ބަހުގެ ޚިދުމަތެއް ލިބިގެންދާނެކަމަށް އެކުންފުނީގެ ޗީފް އެގްޒެކެޓިވް އޮފިސަރ (ސީއީއޯ) އާދަމް އާޒިމް ވިދާޅުވެއްޖެއެވެ.
އެމްޓީސީސީން ދެމުންގެންދާ ބަހުގެ ޚިދުމަތާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ އެމްޓީސީސީއަށް ބަހުގެ ޚިދުމަތްދިނުމަށް ލާޒިމްކޮށްފައިވަނީ މާލެ ސިޓީގެ އިތުރުން އައްޑޫ ސިޓީ އާއި ފުވައްމުލަކު ސިޓީ އަދި ލ އަތޮޅަށްކަމަށެވެ. މިތަންތަނުގައި ރަނގަޅަށް އިންތިޒާމުކުރެވިފައިވާ ބަހުގެ ޚިދުމަތެއް ދިނުމަށް އެމްޓީސީސީން މަސައްކަތްކުރާ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެމްޓީސީސީ އާ ބަހުގެ ޚިދުމަތް ހަވާލުވެގެންދިޔައީ 2021 ވަނަ އަހަރުގެ ޖުލައި މަހުގެ 31 ވަނަ ދުވަހުކަމަށެވެ. އެމްޓީސީސީއަކީ ހަމައެކަނި ފެރީ ދުއްވަމުން އައި ކުންފުންޏެއްކަމަށާއި އެހެންކަމުން ބަހުގެ ޚިދުމަތް ދިނުމަށް މާގިނަ ވަސީލަތްތަކެއް ނެތްކަމަށެވެ. ނަމަވެސް ސަރުކާރުގެ ވަރަށް ބޮޑު އެހީތެރިކަމަކާއެކު މިހާރު ދަތުރުފަތުރުގެ ނިޒާމު ޚަރަދަނާކުރުމަށް ކުންފުންޏާ ހަވާލުކޮށްފައިވާކަމަށް އާޒިމް ވިދާޅުވިއެވެ.
ހުޅުމާލެ ފޭސް 2 ގައި މީހުން އާބާދުކުރަން ކުރީގެ ސަރުކާރުން ވިސްނިއިރު އެތަނުގައި ދަތުރުފަތުރުގެ ނިޒާމު ގެންނާނެ ގޮތެއް ވިސްނާފައި ނެތްކަމަށް އާޒިމް ވިދާޅުވިއެވެ. ނަމަވެސް މިސަރުކާރުން ހުޅުމާލެ ފޭސް 2 ގައި މީހުން އާބާދުކުރުމުގެ މަސައްކަތްކުރަމުން ދާއިރު އެތަނުގައި ދަތުރުފަތުރުގެ ނިޒާމެއްވެސް ގާއިމުކުރަން މަސައްކަތްކުރަމުންދާ ކަމަށް އާޒިމް ވިދާޅުވިއެވެ.
އެއްފަހަރާ އެކަންކަން ކުރުމަކީ ފަސޭހަ ކަމެއް ނޫންކަމަށް އާޒިމް ވިދާޅުވިއެވެ. ނަމަވެސް ރަނގަޅު ބަހުގެ ނިޒާމެއް ހުޅުމާލެ ފޭސް 2 ހިމެނޭ ގޮތަށް ގާއިމުކުރުމަށް މަސައްކަތްތަކެއް ކުރެވެމުންދާކަން ފާހަގަކުރައްވާ އާޒިމް ވިދާޅުވީ ރެޕެއަރ ސެންޓަރެއް ގާއިމުކުރުމުގެ މަސައްކަތްވެސް ކުރަމުންދާކަމަށެވެ.
އާޒިމް ވިދާޅުވީ މިއަހަރުގެ އޮގަސްޓް މަސް އައުމުގެ ކުރިން ފޭސް 2ން މާލެ އަށް ރަނގަޅަށް ދަތުރުތައް ކުރެވޭނެކަމަށެވެ.
މީގެއިތުރުން އެމްޓީސީސީން ބަހުގެ ޚިދުމަތް ދެމުންގެންދާ އައްޑޫ ސިޓީ އާއި ފުވައްމުލަކު ސިޓީއަށްވެސް މުޅިން އައު ބަސް ފޯރުކޮށްދޭނެކަމަށް އާޒިމް ވިދާޅުވިއެވެ. އައްޑުއަށް ގެންނާނީ މިނީ ބަސްކަމަށް އާޒިމް ވިދާޅުވިއެވެ. މީގެއިތުރުން ލ އަތޮޅުގައިވެސް ބަހުގެ ޚިދުމަތް ރަނގަޅަށް ދެމުންގެންދާނެކަމަށް އާޒިމް ވިދާޅުވިއެވެ.
