މާލެ ހިޔާ ފުލެޓް ފުރަގަހުގައި ކުރިން ފްލޫކްލިނިކްގެ ހިންގި ތަނުގައި ރޯވެ ތަން ބޭނުން ނުކުރެވޭވަރަށް ހަލާކުވެއްޖެއެވެ.
އަލިފާން ރޯވިކަމުގެ މައުލޫމާތު އެމްއެންޑީއެފަށް ލިބުނީ 2:47 ގައި ކަމަށް އެމްއެންޑީއެފުން މައުލޫމާތުދެއެވެ. އެމްއެންޑީއެފުން ބުނީ، މިހާރު އަލިފާން ނިއްވަލާފައިވާކަމަށެވެ. އަލިފާން ނިއްވާލެވުނީ 3:14 ގައިކަމަށާއި، މިހާދިސާގައި އެއްވެސް މީހަކަށް ގެއްލުމެއް ލިބިފައި ނުވާކަމަށެވެ.
މި ސަރަހައްދުގައި ފުލުހުންނާއި އެމްއެންޑިއެފްގެ ފަޔަރ އެންޑް ރެސްކިއުއިން ވަނީ ހަރަކާތްތެރިވެފައެވެ. މިތަނަކީ ޑެލްޓާ ވޭރިއަންޓް ފެތުރެމުންދިޔަ އިރު އެޗްޕީއޭއިން ފްލޫ ކްލިނިކެއްގެ ގޮތުގައި ބޭނުންކުރަމުން ދިޔަތަނެކެވެ. އަދި އެތަން ބަންދު ކުރީ އޭރު ކޮވިޑްގެ ހާލަތު ރަނގަޅުވުމުންނެވެ. އޭގެ ކުރިން ޕީޕީއެމްގެ ސިޔާސީ ހަރަކާތްތައް ހިންގަން އެތަނުގައި ރުމާލު 2 ގެ ނަމަމުގައި ޖަގަހައެއް ހިންގިއެވެ.
މިތަނުގައި ރޯވެފައިވަނީ އެތަނުގައި މަސްތުވާތަކެތި ބޭނުންކުރާތަނެއްގެ ގޮތުގައި މީޑިއާތަކުގައި ރިޕޯޓްކުރިތާ 24 ގަޑި އިރު ނުވަނީސްއެވެ. ގިނަ އަދަދަކަށް ކުނި އިމާރާތުގެ އެރޭގައި ހުރިއިރު، މަސްތުވާތަކެތި ބޭނުންކުރާ ކަމަށް ތުހުމަތު ކުރެވޭ ޒުވާނުންތަކެއް އެތަނުގައި ދަނީ ދިރިއުޅެމުންނެވެ. ދެ ފަންގިފިލާއަށް ހަދާފައި ހުރި އެއިމާރާތުގައި ގިނަ އަދަދެއްގެ ގޮދަނޑި އަޅާފައި ހުއްޓެވެ.
