މިއަހަރުގެ ތެރޭގައި ދެ އެއާޕޯޓެއްގެ މަސައްކަތް ނިންމައި ސަރުކާރާއި ހަވާލުކުރުމަށް އަމާޒު ހިފާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި އެމްޓީސީސީގެ ޗީފް އެގްޒެކެޓިވް އޮފިސަރ (ސީއީއޯ) އާދަމް އާޒިމް ވިދާޅުވީ ރާއްޖޭގެ ހުރިހާ ސަރަޙައްދެއްގައި އެމްޓީސީސީގެ މަޝްރޫއުތަކުގެ މަސައްކަތްތައް ކުރިއަށްދާ ކަމަށާއި، ކޮވިޑް-19 ގެ ޕެންޑަމިކްގައި ވަރަށް ގިނަ ދަތިތައް ކުރިމަތިވަމުންދާ ކަމަށެވެ. ރާއްޖެއިން ބޭރުން ބައެއް ސާމާނު ގެނައުމަށް ވެސް ލަސްތަކެއް ކުރިމަތިވި ނަމަވެސް މަސައްކަތްތައް ނުހުއްޓި ކުރިއަށްދާ ކަމަށް އާޒިމް ވިދާޅުވިއެވެ.

އެއާޕޯޓުގެ މަޝްރޫއުތަކަށް އިޝާރާތް ކުރައްވައި އާޒިމް ވިދާޅުވީ މިއަހަރުގެ ތެރޭގައި ދެއެއާޕޯޓެއްގެ މަސައްކަތް ނިންމައި ސަރުކާރާއި ހަވާލުކުރުމަށް އަމާޒު ހިފައިވާ ކަމަށެވެ. އެގޮތުން ގދ. ފަރެސްމާތޮޑާ އެއާޕޯޓުގެ މަސައްކަތް ނިންމައި ޖުލައި 26 ގައި ސަރުކާރާއި ހަވާލު ކުރަން ނިންމާފައިވާ ކަމަށް އޭނާ ވިދާޅުވިއެވެ.

އެތެރޭގެ އުދުހުންތަކަށް ޚާއްސަކޮށްގެން ހަދާ ފަރެސްމާތޮޑާ އެއަރޕޯޓްގައި، 1200 މީޓަރުގެ ރަންވޭއެއް ތަރައްޤީކުރުމަށާއި ޓެކްސީ ވޭއަކާއި އޭޕްރަން ވޭއަކާއި އޭޕްރަންއަކާއި ސަރވިސް ރޯޑު އިމާރާތްކުރުމަށް ނިންމާފައިވެއެވެ. އަދި ރަންވޭގެ އިތުރަށް ޓާރމިނަލާއި އެއަރޕޯޓަށް ބޭނުންވާ އިތުރު ވަސީލަތްތައް ޤާއިމުކުރުމަށް ވެސް އެމްޓީސީސީއާއި ވަނީ ހަވާލުކޮށްފައެވެ. އެއަރޕޯޓް ތަރައްޤީކުރުމުގެ މި މަޝްރޫއު އަކީ 144.88 މިލިއަން ރުފިޔާގެ މަޝްރޫއެކެވެ.

މީގެއިތުރުން އާޒިމް ވިދާޅުވީ މ. މުލީ އެއަރޕޯޓްގެ މަސައްކަތް ވެސް މިއަހަރުގެ ތެރޭގައި ނިންމުމަށް އަމާޒުހިފާފައިވާ ކަމަށެވެ.

މިމަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1812 މީޓަރުގެ ސަރަޙައްދެއްގެ ގޮނޑުދޮށް ހިމާޔަތް ކުރުމާއި 1200 މީޓަރު ދިގު 30 މީޓަރު ފުޅާ ރަންވޭއެއް ޤާއިމުކުރުމާއި ޓެކްސީވޭއަކާއި އޭޕްރަންއެއް އެޅުމުގެ މަސައްކަތް ކުރާނެ އެވެ. މިމަޝްރޫއަކީ 221.733 މިލިއަން ރުފިޔާގެ މަޝްރޫއެކެވެ.

ރ. އަލިފުށީ އެއާޕޯޓަށް އަލިއަޅުއްވާލައްވައި އާޒިމް ވިދާޅުވީ އެންވަޔަރަމެންޓް އިމްޕެކްޓް އެސެސްމެންޓް (އީއައިއޭ) މަސައްކަތްތައް ކުރިއަށްދާ ކަމަށާއި، އެމަސައްކަތް ވަރަށް އަވަހަށް ނިމެނޭ ކަމަށެވެ. އަދި އެއާޕޯޓުގެ މަސައްކަތް ވެސް އަންނަ އަހަރުގެ ތެރޭގައި ނިމެނޭ ކަމަށް އާޒިމް ވިދާޅުވިއެވެ.

އެއަރޕޯޓް މަޝްރޫއުގެ ދަށުން ރ. އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްޤީކުރުމަށް ހިއްކޭ ބިމެކެވެ. މި މަޝްރޫއުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ އެމްޓީސީސީއާއި ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ޤާއިމުކުރެވިގެންދާނެއެވެ. މިއީ 451.61 މިލިއަން ރުފިޔާ ގެ މަޝްރޫއެކެވެ.

ރާއްޖޭގެ ކޮންމެ ރަށަކުން 30 މިނެޓުގެ ދަތުރަކުން ދަތުރު ކުރެވޭ ސަރަޙައްދުގައި އެއަރޕޯޓް އެޅުމަކީ މި ސަރުކާރުގެ ރިޔާސީ ވައުދެކެވެ.