ޔޫކްރެއިންގައި ތިބި އެމެރިކާ ރައްޔިތުން އެގައުމު ދޫކޮށްދިޔުމަށް އަންގައިފި

ޔޫކްރެއިންގައި ދިރިއުޅެމުން އަންނަ އެމެރިކާ ރައްޔިތުން ވީއެންމެ އަވަހަކަށް އެގައުމު ދޫކޮށް ދިޔުމަށް ޔޫކްރެއިންގައި ހުންނަ އެމެރިކާގެ އެމްބަސީން އަންގައިފިއެވެ.

އެމްބަސީގެ ވެބްސައިޓްގައި ބުނެފައިވަނީ ޔޫކްރެއިންގެ ސަލާމަތީ ކަންކަން ބަދަލުވަމުން އަންނަނީ އަންދާޒާކުރަން ނޭންގޭ ގޮތަކަށް ކަމަށެވެ. ރަޝިޔާގެ އަސްކަރިއްޔާގެ އަމަލުތައް ހުރިގޮތުން ޔޫކްރެއިންގެ ސަލާމަތީ ކަންކަން ބަދަލުވާން ނަގާނީ ކުޑަ ވަގުތުކޮޅެއްކަމަށް އެމްބަސީން ބުނެފައިވެއެވެ.

އެމެރިކާގެ ސެކެރެޓަރީ އޮފް ސްޓޭޓް އެންތަނީ ބްލިންކެން ވިދާޅުވީ ޔޫކްރެއިންގައި ހުރި އެމެރިކާގެ އެމްބަސީ ހުންނާނީ ހުޅުވާފައިކަމަށެވެ. ނަމަވެސް އެގައުމުގައި ތިބި އެމެރިކާ ރައްޔިތުން ވީއެންމެ އަވަހަށް އެގައުމު ދޫކޮށްދިޔުމަށް ވަނީ އެދިވަޑައިގަންނަވާފައެވެ.

އެމެރިކާއިން ވަނީ މިހަފްތާގެ ކުރީކޮޅު އެމެރިކާ ރައްޔިތުން ޔޫކްރެއިން އަށް ދަތުރުނުކުރުމަށް އިލްތިމާސްކޮށްފައެވެ.

ޔޫކްރެއިންގެ ބޯޑަރު ސަރަހައްދުގައި ރަޝީޔާގެ އަސްކަރިއްޔާގެ ފައުޖުތައް ތިބިއިރު އެސަރަހައްދުގައި ހަނގުރާމައެއް ފެށިދާނެ ކަމުގެ ބިރު ވަނީ ހީވެފައެވެ. ރަޝިޔާއިން ވަނީ ޔޫކްރެއިންގެ ކަނޑާއި އެއްގަމާއި ކައިރި ސަރަހައްދުގައި އަސްކަރީ ތަމްރީނުތަކެއްވެސް ކުރިޔަށް ގެންގޮސްފައެވެ.

އަންގާރަ ދުވަހު އެމެރިކާގެ ރައީސް ޖޯ ބައިޑަން ވަނީ ޔޫކްރެއިންއަށް ރަޝިޔާއިން އަރައިފިނަމަ ރަޝިޔާގެ ރައީސް ވްލަޑްމިއަރ ޕުޓިންއާ ދެކޮޅަށް ދަތިކުރުމުގެ ފިޔަވަޅު އަޅުއްވާނެކަމަށް ވިދާޅުވެފައެވެ. އެކަމަށް ރަޝިޔާއިން ޖަވާބުދެމުން ބުނެފައިވަނީ ޕުޓިން އާ ދެކޮޅަށް އަޅާ ފިޔަވަޅެއްގެ ސަބަބުން ޕުޓިންއަށް ގެއްލުމެއް ނުވާނެކަމަށާއި ނަމަވެސް އެކަން ވެގެންދާނީ ސިޔާސީ ގޮތުން ވާ ވަރަށް ބޮޑު ގެއްލުމަކަށްކަމަށެވެ.

ރަޝިޔާއިން އެތައް ހާސް ފައުޖުތަކެއް ޔޫކްރެއިން ބޯޑަރު ސަރަހައްދަށް ޖަމާކޮށްފައިވީ ނަމަވެސް ރަޝިޔާއިން ބުނަމުން އަންނަނީ ޔޫކްރެއިން އަށް އެރުމުގެ ވިސްނުމެއް ނުގެންގުޅޭކަމަށެވެ.

އެމެރިކާއިން ވަނީ ހަފްތާއެއްހާ ދުވަސްވަންދެން ޔޫރަޕިއަން ޔޫނިއަންގެ ގައުމުތަކާއެކު ރަޝިޔާއިން ޔޫކްރެއިންއަށް އަރައިފިނަމަ ކަންކަންކުރާނެ ގޮތާމެދު އެއްބަސްވުމެއް އެކުލަވާލުމަށް މަސައްކަތްކޮށްފައެވެ.