ޒިގްޒެގް އިންޓަ އޮފީސް ފުޓްސަލް މުބާރާތް ފަސްކޮށްފި

ކުޅުދުއްފުށި ސިޓީ މޮނިޓަރިންއަށް ލުމާއި ގުޅިގެން އެ ސިޓީގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ޒިގްޒެގް އިންޓަ އޮފީސް ފުޓްސަލް މުބާރާތް ފަސްކޮށްފިއެވެ.

އަށްވަނަ އޮފީސް ފުޓްސަލް މުބާރާތް ފަށަން މީގެ ކުރިން ހަމަޖެހިފައި އޮތީ އަންނަ ފެބްރުއަރީ މަހުގެ އެއްވަނަ ދުވަހުއެވެ. އެހެންނަމަވެސް އެ ސިޓީގައި ކޮވިޑް-19 ގެ ކޭސްތައް އިތުރުވަމުންދާތީ، އެ ސިޓީ މޮނިޓަރިންއަށް ލުމާއި ގުޅިގެން، އެ ތާރީޚުގައި އެ މުބާރާތް ނުފެށޭނެކަމަށް ޒިގްޒެގުން ވަނީ ބުނެފައެވެ.

ޒިގްޒެގުން ހާމަކުރި ގޮތުގައި މޮނިޓަރިން ހާލަތުން ނެގުމާއެކު މުބާރާތް ފެށޭނެ ތާރީޚެއް ޓީމުތަކަށް އަންގާނެއެވެ. ރަށު ތެރޭ ކޮވިޑް ކޭސްތައް ގިނަވުމުގެ ސަބަބުން ފަރިތަކުރުންތައްވެސް ކެންސަލްކުރަން ޖެހުމާއެކު، މޮނިޓަރިން ނެގޭ ހިސާބުން ޓީމުތަކަށް ފަރިތަކުރަން މަދުވެގެން ފަސް ދުވަހާއި 10 ދުވަހާއި ދެމެދުގެ މުއްދަތެއް ދެވޭނެ ކަމަށްވެސް ޒިގްޒެގުން ވަނީ ބުނެފައެވެ.

ޒިގްޒެގުން ބުނީ މި މުބާރާތަކީ ކުޅުދުއްފުށީގައި ހުރި ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫހު އާލާކުރުމާއެކު، ފުޓުސަލްއަށް ޝައުގުވެރިކުރުމުގެ ގޮތުން ބާއްވަމުން އަންނަ މުބާރާތެއް ކަމަށެވެ. އަދި މުބާރާތެއްގައި ވާދަކުރުމުގެ ފުރުސަތު ސަރުކާރުގެ އޮފީސް އަދި ކުންފުނިތަކުގެ މުވައްޒަފުންނަށް ހޯދައިދިނުމާއި، ސަރުކާރުގެ އޮފީސް ނުވަތަ ކުންފުނިތަކުގެ މުވައްޒަފުން އެއްތަނަކުން ބައްދަލުވެ، ގުޅުން ބަދަހިކުރުމަކީވެސް މި މުބާރާތުގެ މަގްސަދެއް ކަމަށް ޒިގްޒެގުން ބުނެއެވެ.

މިއީ ޒިގްޒެގުން މި މުބާރާތް ބާއްވާ އަށްވަނަ ފަހަރެވެ. އެންމެފަހުން 2019 ވަނަ އަހަރު މި މުބާރާތް ބޭއްވިއިރު، އެ މުބާރާތުގެ ޗެމްޕިއަންކަން ހޯދާފައިވަނީ ދިރާގުންނެވެ.