އެމްޓީސީސީގެ ތާރީޚުގައިވެސް ނުލިބޭ ވަރުގެ ބޮޑު ފައިދާއެއް މިދިޔަ އަހަރު ލިބިއްޖެ
ޓެކުހަށް ކެނޑުމުގެ ކުރިން 264 މިލިއަން ރުފިޔާގެ ފައިދާއެއް ވަނީ ލިބިފައި
އެމްޓީސީސީ
މޯލްޑިްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ 41 އަހަރުގެ ދިގު ތާރީޚުގައިވެސް ލިބިފައި ނުވާވަރުގެ ބޮޑު ފައިދާއެއް 2021 ވަނަ އަހަރުގެ ފަހު ކުއާޓަރުގައި އެކުންފުންޏަށް ލިބިއްޖެއެވެ.
އެމްޓީސީސީން އާންމުކޮށްފައިވާ އެކުންފުނީގެ ހަތަރުވަނަ ކުއާޓަރުގެ މާލީ ރިޕޯޓުން ދައްކާގޮތުން ޓެކުހަށް ކެނޑުމުގެ ކުރިން 264 މިލިއަން ރުފިޔާގެ ފައިދާއެއް އެމްޓީސީސީއަށް ވަނީ ލިބިފައެވެ. 2020 ވަނަ އަހަރުގެ ހަތަރުވަނަ ކުއާޓަރު ނިމުނުއިރު ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި އެކުންފުންޏަށް ލިބިފައިވަނީ 220.75 މިލިއަން ރުފިޔާއެވެ.
މިދިޔަ އަހަރުގެ ހަތަރުވަނަ ކުއާޓަރުގައި ސާފު ފައިދާގެ ގޮތުގައި އެމްޓީސީސީއަށް ލިބިފައިވަނީ 224.6 މިލިއަން ރުފިޔާއެވެ. 2020 ވަނަ އަަހަރު ސާފު ފައިދާގެ ގޮތުގައި އެކުންފުންޏަށް ލިބިފައިވަނީ 190.6 މިލިއަން ރުފިޔާއެވެ. 2020 ވަނަ އަހަރާ އަޅާ ބަލާއިރު، 2021 ވަނަ އަހަރުގެ ސާފު ފައިދާ ވަނީ 15 އިންސައްތައިން އިތުރުވެފައެވެ.
އެމްޓީސީސީގެ މާލި ރިޕޯޓުގައިވާ ގޮތުން 2021 ވަނަ އަހަރުގެ ހަތަރުވަނަ ކުއާޓަރުގެ ނިޔަލަށް އެކުންފުނިން ވަނީ ޖުމްލަ 1.96 ބިލިއަން ރުފިޔާގެ ވިޔަފާރި ކޮށްފައެވެ. 2020 ވަނަ އަހަރުގެ ހަތަރުވަނަ ކުއާޓަރުގެ ނިޔަލަށް ވިޔަފާރިކޮށްގެން އެ ކުންފުންޏަށް ލިބިފައިވަނީ 1.36 ބިލިއަން ރުފިޔާއެވެ.
މީގެ އިތުރުން އެމްޓީސީސީން ވަނީ 2021 ވަނަ އަހަރުގެ ހަތަރުވަނަ ކުއާޓަރުގައި 10 މަޝްރޫއެއްގެ މަސައްކަތް ނިންމާލާފައެވެ. އަދި 8 މަޝްރޫއެއްގެ މަސައްކަތް މި ކުއާޓަރުގައި ފަށާފައިވާއިރު، 18 މަޝްރޫއެއްގެ މަސައްކަތް އެމްޓީސީސީއާއި ވަނީ ހަވާލުކޮށްފައެވެ.
އެމްޓީސީސީން ބުނީ 2021 ވަނަ އަހަރަކީ އެ ކުންފުނީގެ 41 އަހަރުގެ ދިގު ތާރީޚުގައިވެސް މާލީ ގޮތުން އެންމެ ރަނގަޅު ނަތީޖާ ހާސިލްކުރެވުނު އަހަރު ކަމަށެވެ.
