އާޒިމްގެ ލުއިފަރާތުގައި ނަމޫނާ އެތައް ކަމެއް

މިވަގުތު ރާއްޖޭގެ އެކި ސަރަހައްދުތަކުގައި އެންމެ ގިނަ މަޝްރޫއުތައް ހިންގަމުންދާ އެންމެ ކާމިޔާބު އެއް ކުންފުންޏަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އެވެ. މިވަގުތު އެ ކުންފުނީގެ ހުންގާނުގައި ހިއްޕަވައިގެން ހުންނެވީވެސް ހަމަ އެހާމެ ކާމިޔާބު މާލިމީއެކެވެ. އެކުންފުނީގެ ސީއީއޯގެ މަގާމުގައި 21 ޖެނުއަރީ 2020ން ފެށިގެން ހުންނެވީ އާދަމް އާޒިމްއެވެ. އާޒިމްއަކީ ކުންފުނިތައް ހިންގުމުގައި ވަރަށްވެސް ކާމިޔާބު ބޭފުޅެކެވެ. މިގޮތުން އެމްޓީސީސީގެ ހުންގާނާ ހަވާލުވެވަޑައިގެންނެވުމުގެ ކުރިން އާޒިމް ވަނީ އެމްޑަބްލިއުއެސްސީގެ މެނޭޖިން ޑިރެކްޓަރ ކަމާއި، އެސްޓީއޯގެ މެނޭޖިން ޑިރެކްޓަރ ކަމާއި، ބޭންކް އޮފް މޯލްޑިވްސްގެ ނޮން-އެގްޒެކެޓިވް ބޯޑް ޑައިރެކްޓަރކަންވެސް ކުރައްވާފައެވެ. އަދި މީގެ އިތުރުންވެސް މިފަދަ ގިނަ މަގާމުތަކެއް އާޒިމް ވަނީ ފުރުއްވާފައެވެ.

އެހެންނަމަވެސް މިފަހަރު މި ގެނެސްދެނީ އެމަނިކުފާނު މިހާތަނަށް ހޯއްދަވާފައިވާ ގިނަ ކާމިޔާބީތަކުގެ ވާހަކަތަކެއް ނޫނެވެ. މިފަހަރު ކިޔާލަދޭން މި މަސައްކަތްކުރަނީ އެމަނިކުފާނުގެ އާންމު ދިރިއުޅުމުގައި ހުރި ބައެއް ކަންކަމާއި، ލުއި ފަރާތުގެ ބައެއް ވާހަކަތަކެވެ. ރާއްޖެޓީވީގެ "ފަށާއިރު" ޕްރޮގްރާމުގައި ބައިވެރިވެވަޑައިގެން އާޒިމް ވަނީ މިފަދަ ބައެއް ކަންކަން ހިއްސާކުރައްވާފައެވެ.

އެގޮތުން އެމަނިކުފާނު ކޮންމެގޮތަކުންވިޔަސް ކުރައްވަންޖެހިވަޑައިގަންނަވާ ކަމެއް އޮވެއެވެ. އެއީ ކޮންމެ ރެއެއްގެވެސް ފަރިއްކޮޅަށް މަންމަގެ ގާތަށް ވަޑައިގެން, މަންމައާއެކު ފަރިއްކުޅުވުމެވެ. އާޒިމް ވިދާޅުވީ ބައްޕަ ނިޔާވި ފަހުން ކޮންމެ ދުވަހަކުވެސް އެކަން އެގޮތަށް ކުރައްވަމުންގެންދަވާ ކަމަށެވެ. އަދި އެއީ "ކޮމްޕްރޮމައިޒް" ނުކުރައްވާނެ ކަމެއް ކަމަށް އާޒިމް ވިދާޅުވިއެވެ. އެއަށްފަހު ކޮންމެ ރެއަކުވެސް އަނބިކަނބަލުން ގޮވައިގެން ބުރެއް ޖައްސަވާލެއްވުމަކީ ކޮންމެހެން ކުރައްވަންޖެހިވަޑައިގަންނަވާ ކަމެއް ކަމަށް އާޒިމް ވިދާޅުވިއެވެ. އަދި އެ ކަންތައް ނުކޮށްފިނަމަ ރޭގަނޑު އަވަހާރަފުޅުވެސް ނުލެއްޕެވޭނެ ކަމަށް އާޒިމް ވިދާޅުވިއެވެ.

މީގެ އިތުރުން ކޮންމެ ދުވަހަކުވެސް ގަޑިން ގަޑިއަށް ފަރިއްކުޅުވާކަން އާޒިމް ފާހަގަކުރެއްވިއެވެ. އޮފީހަށް ވަޑައިގަތުމުގެ ކުރިން ހެނދުނުގެ ނާސްތާ ކުރައްވާ ކަމަށާއި، މަސައްކަތުގައި އުޅުއްވަމުންވެސް މެންދުރުގެ ފަރިއްކޮޅަށް މަދުވެގެން 45 މިނެޓަށް މަސައްކަތާ ދުރަށް ޖެހިވަޑައިގަންނަވާކަމަށް އާޒިމް ވިދާޅުވިއެވެ. އަދި ކާ އެއްޗެހީގެ ތެރެއިން އެންމެ މީރުފުޅީ ރިހާކުރު ދިޔައާއި ގަރުދިޔައާއި ބަތް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ އަނބިކަނބަލުންނާއެކު އަދިވެސް އުޅުއްވަނީ ކުރިން އުޅުއްވި ގޮތަށް ކަމަށާއި، ހަދިޔާ ދެއްވުމާއި މިނޫން ކަންކަން އަދިވެސް އޮންނަ ކަން ފާހަގަކުރެއްވިއެވެ. އެންމެ ރީތި ލަވައަކީ "ޕަލް ދޯ ޕަލް ކާ ޝާޔަރް ހޫނ" ކަމަށް އާޒިމް ވިދާޅުވިއެވެ. އެލަވަ އެންމެ ރީތިވަނީ އެއީ ވަރަށް މާނަ ފުން ލަވައަކަށް ވާތީ ކަމަށާއި، އެ ލަވައިން ދިރިއުޅުމުގެ އެތައް ފިލާވަޅެއް ލިބިވަޑައިގަންނަވާތީކަމަށް އާޒިމް ވިދާޅުވިއެވެ.

މީގެ އިތުރުން އާޒިމް ވިދާޅުވީ ސްކޫލް ދައުރުގެ އެކުވެރިންނާއެކު އެ އޮތް ގުޅުން އަދިވެސް ކެނޑިގެންނުދާ ކަމަށެވެ. ހުރިހާ އެކުވެރިންވެސް އުޅެނީ ވަރަށް ބިޒީކޮށް ކަމުން, ބައްދަލުކޮށްލަން ވަރަށް ވަގުތު ލިބިވަޑަަަިނުގަންނަވާކަމަށް އާޒިމް ވިދާޅުވިއެވެ. އެހެންނަމަވެސް ދޭތެރެއަކުން ހުސް ގަޑިއެއް ހޯއްދަވައިގެން, ހަފްތާ ބަންދުގައި ސައިތައްޓެއް ނޫނީ ކޮފީތައްޓެއް ހިއްޕަވަން ވަޑައިގަންނަވާކަން އާޒިމް ފާހަގަކުރެއްވިއެވެ.

މީގެ ތަންކޮޅެއްކުރިން ފުޓުބޯޅަ ކުޅުމުގައިވެސް އާޒިމް ވަނީ ހަރަކާތްތެރިވެވަޑައިގެންފައެވެ. އާޒިމް ވިދާޅުވީ ކެރިއަރެއްގެ ގޮތުގައި ފުޓުބޯޅަ ކުޅުއްވަން ބޭނުންފުޅުވި ކަމަށެވެ. އެހެންނަމަވެސް 1993 ވަނަ އަހަރުން ފެށިގެން ފުޓުބޯޅަކުޅުން ހުއްޓަވާލައްވާފައިވާކަމަށެވެ. އެއީ ފައިންޕުޅު ބިނދުމުން ކަމަށާއި، އެހިސާބުން ފުޓުބޯޅައިން ވަޑައިގެންނެވެން އޮތް ހިސާބަކަށް ވަޑައިގެންނެވުނީކަމަށް ނިންމެވީކަމަށް އާޒިމް ވިދާޅުވިއެވެ.

މިއީ އާޒިމްގެ ލުއި ފަރާތުގެ ވަރަށް ކުޑަ މިންވަރެކެވެ. އެހެންނަމަވެސް މި ކުޑަ މިންވަރުންވެސް އެނގިގެންދާ އެއް ކަމަކީ އެމަނިކުފާނަކީ މަސައްކަތުގައިވެސް އަދި ޒާތީ ދިރިއުޅުއްވުމުގެ ކަންކަމުގައިވެސް ނަމޫނާ ބޭފުޅެއްކަމެވެ.