ކޮވިޑްގެ ހާލަތު ގޯސްވަމުން އަންނާތީ އެނދުމަތިކޮށްފައި ތިބޭ ބަލިމީހުންނަށް ޒިޔާރަތް ކުރުން އޭޑީކޭއިން މެދުކަނޑާލައިފިއެވެ.
އެހޮސްޕިޓަލުން ބުނީ، ކޮވިޑް19 އަނެއްކާވެސް ހަލުވިކަމާއެކު ފެތުރެމުން ދާތީ، ޢާންމުންގެ ރައްކާތެރިކަމަށާއި އަދި ސިއްޙީ ޚިދުމަތްދޭ ފަރާތްތަކުގެ ރައްކަލަށްޓަކައި، ބަލިމަޑުކަން ފެތުރެމުންދާ ނިސްބަތަށް ބަލާ އަޅާފައިވާ ފިޔަވަޅުތަކަށް ބަދަލު ގެންނަމުންދާކަމަށެވެ. އެގޮތުން، ކޮވިޑް19 ގެ ހާލާތު ގޯސްވުމާ ގުޅިގެން ހޮނިހިރު ދުވަހުން ފެށިގެން އޭޑިކޭގައި އެނދުމަތިކޮށްގެން ފަރުވާދެމުންދާ މީހުން ކައިރިޔަށް ޒިޔާރަތްކުރުން ހުއްޓާލާނެ ކަމަށެވެ.
އެނދުމަތިކޮށްގެން ފަރުވާދޭ މީހުންގެ އެހީތެރިއެއްގެ ގޮތުގައި މަޑުކުރެވޭނީ އެންމެ މީހަކަށް ކަމަށް އެ ހޮސްޕިޓަލުން ބުނެއެވެ. އަދި އެމީހަކީ ކޮވިޑް19 ގެ އަލާމާތެއް ނެތް މީހަކަށްވާންވާންޖެހޭނެ ކަމަށެވެ.
އޭޑީކޭއިން ވަނީ ކޮންމެހެން ދާން ޖެހިއްޖެ ހާލަތެއްގައި ނޫނީ ހޮސްޕިޓަލަށް ނުދިޔުމަށް އިލްތިމާސްކޮށްފައެވެ.
އަދި ޚިދުމަތް ހޯދަން ހޮސްޕިޓަލަށްދާއިރު، ރަނގަޅަށް މާސް އެޅުމަށްވެސް އިލްތިމާސް ކޮށްފަވެއެވެ.
