އެމްޑީޕީގެ ވެރިކަން ދެމެހެއްޓުމަށް ކުރަން ޖެހުނު ކޮންމެ ކަމެއް ކުރާނަން - ރައީސް ނަޝީދު
ދެވަނަ ދައުރެއް އެމްޑީޕީއަށް މުހިއްމު
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް
އެމްޑީޕީގެ ވެރިކަން ދެމެހެއްޓުމަށް ކުރައްވަން ޖެހި ވަޑައިގެންނެވި ކޮންމެ ކަމެއް ކުރައްވާނެ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ސްރީލަންކާގެ ނޭޝަނަލް ޔޫތް ޕާލަމެންޓް ޝަރުފުވެރިކޮށްދެއްވުމަށް ލަންކާގައި ހުންނަވާ އިންޑިއާގެ އޮންލައިން ނޫސް " ދަ ހިންދޫ"އަށް ދެއްވި އިންޓަރވިއުއެއްގައެވެ. އެމަނކުފާނު ވިދާޅުވީ އެމްޑީޕީ އިތުރު ދައުރެއްގައި ވެރިކަމުގައި އޮތުމަކީ މިހާރުގެ ހާލަތަށް ބަލައި މުހިއްމު ކަމެއް ކަމަށެވެ. ގައުމު ހަލަބޮލި ކޮށްލުމަށް ރައީސް ޔާމީން ގެންގުޅުއްވާ ސިޔާސަތުގެ ސަބަބުން ރައްޔިތުންގެ މެދުގައި ނުތަނަވަސްކަން އުފެދެމުންދާކަމަށް ވިދާޅުވިއެވެ.
ޗައިނާގެ ފޮރިން މިނިސްޓަރ ރާއްޖެއަށް ދާދި ފަހުން ކުރެއްވި ދަތުރުފުޅުންވެސް އެނގުނު ކަމަކީ، ދިވެހިރާއްޖެއަށް އެއްގައުމު އަނެއްގައުމާ ޖައްސާލައިގެން ނޫޅެވޭނެ ކަން ކަމުގައެވެ. އެކުވެރި ގައުމުތަކަށް ދިވެހިން އަބަދުވެސް ކަމޭހިތާނެ ކަމަށާއި، އިންޑިއާއަކީ ދިވެހިންނާ އެންމެ ގާތް ގައުމުކަމަށް ރައީސް ނަޝީދު ވިދާޅުވިއެވެ. ކޮންމެ ކަމެއްގައިވެސް ފުރަތަމަ ދިވެހިންނަށް އެހީތެރެިކަން ފޯރުކޮށްދޭ ބަޔަކީ އިންޑިއާކަމުގައި ރައީސް ނަޝީދު ވިދާޅުވިއެވެ.
ޑިމޮކްރެސީ ދެމެހެއްޓުމަށް އެމްޑީޕީ ވެރިކަމުގައި ދެމިއޮތުމަކީ ކޮންމެހެން މުހިއްމު ކަމެއްކަމުގައި ރައީސް ނަޝީދު ތަކުރާރުކޮށް ވިދާޅުވިއެވެ. ކުރިއަށް އޮތް ރިޔާސީ އިންތިޚާބުގައި ވާދަކުރެއްވުމާ ގުޅޭ ގޮތުން ކުރެވުނު ސުވާލަށް ޖަވާބު ދެއްވަމުން ވިދާޅުވީ، އިންތިޚާބުގައި ވާދަކުރެއްވުމުގެ ވިސްނުން އަބަދުވެސް ގެންގުޅުއްވާ ކަމަށާއި، އެ ކަމަށް ބަދަލެއް ނާންނަ ކަމަށެވެ.
ރާއްޖެއަށް ކުރިމަތިވެފައިވާ ގޮންޖެހުންތަކާއި އެކަންތައް ހައްލު ކުރައްވަން ރައީސް ސޯލިހު ކުރައްވާ މަސައްކަތްޕުޅަށް ރައީސް ނަޝީދު ތައުރީފު ކުރެއްވިއެވެ. ކުރިއަށް އޮތް އިންތިޚާބުގައި ވާދަކުރައްވާނެ ކެންޑިޑޭޓެއް އަދި ނިންމާފައި ނުވާ ކަމަށާއި، ރައީސް ސާލިހާ ދެ ބޭފުޅުން އިންތިޚާބުގައި ވާދަ ކުރައްވާ މަންޒަރު އެމަނިކުފާނަށް ފެނިވަޑައި ނުގަންނަވާ ކަމަށް ވިދާޅުވިއެވެ. އެހެންނަމަވެސް އެމްޑިޕީން ވެރިކަމުގައި ދެމި އޮންނަން ކުރަން ޖެހުނު ކޮންމެ ކަމެއް އެމަނިކުފާނު ކުރައްވާނެ ކަމަށް ވިދާޅުވިއެވެ. އަދި ދެވަނަ ދައުރެއް މުހިއްމު ކަމަށް ވިދާޅުވިއެވެ.
