ސުޕްރީމް ކޯޓުން ގޮތް ނިންމާފައި އޮއްވައި، އިންތިޚާބުގެ މައްސަލަ އަލުން ބެލޭނެކަމަށް އީސީން ނުދެކޭ
17 ޖެނުއަރީ 2022 | ހޯމަ 11:05މައްސަލަތައް އިދިކޮޅުން ވަނީ މައިގަނޑު 4 މުއައްސަސާއަކަށް ހުށައަޅާފައި
އިލެކްޝަންސް ކޮމިޝަންގެ ރައީސް ފުއާދު ތައުފީޤު
ސުޕްރީމް ކޯޓުން ގޮތް ނިންމާފައި އޮތް އިންތިޚާބެއްގެ މައްސަލަ އަލުން ބެލޭނެ ޤާނޫނީ ހަމައެއް އޮތްކަމަށް ނުދެކޭ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
2018 ގެ ރިޔާސީ އިންތިޚާބާގުޅޭ މައްސަލަތަކެއް އާދިއްތަ ދުވަހު ޕީޕީއެމްއިން 4 މުއައްސަސާއަކަށް ހުށައަޅާފައިވާއިރު، އޭގެ ތެރޭގައި ފުލުހުންނާއި، އޭސީސީއާއި، އެޗްއާރްސީއެމްގެ އިތުރުން، އޮމްބަޑްސްޕަރސަން އޮފީސް ހިމެނެއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަފުޅުދައްކަވަމުން އިލެކްޝަންސް ކޮމިޝަންގެ ރައީސް ފުއާދު ތައުފީޤު ވިދާޅުވީ، ޤާނޫނުގައި އޮންނަ ގޮތުން ނަތީޖާ ފާޅުކޮށް، ވަކި މުއްދަތެއްގެ ތެރޭގައި އިންތިޚާބާއި ގުޅޭ ޝަކުވާތައް ހުށައަޅަން ޖެހެއެވެ. އަދި އެކަމަށް ވަކި އުސޫލުތަކެއް ހެދިފައިވާއިރު، އިންތިޚާބާއި ގުޅިގެން ސުޕްރީމް ކޯޓަށް ހުށައެޅުނު މައްސަލައިގައިވެސް ވަކި ގޮތަކަށް ނިމިފައިވާކަން ފުއާދު ފާހަގަ ކުރެއްވިއެވެ.
ފުއާދު ވިދާޅުވީ އެ ހުރިހާ ކަމެއް އެހެން އޮއްވައި، އިންތިޚާބު ނިމި 3 އަހަރު ފަހުން އިންތިޚާބާއި ގުޅޭ މައްސަލަތަކެއް ތަހުގީގުކޮށް، އިންތިޚާބާއި ގުޅޭ ޝަކުވާތަކެއް އަލުން ހުށައަޅައިގެން ބެލުމުގެ ޤާނޫނީ ހަމައެއް އޮތްކަމަށް ދެކިވަޑައިނުގަންނަވާ ކަމަށެވެ.
އިންތިޚާބާއި ގުޅޭ މައްސަލަތައް އިދިކޮޅުން ވަނީ މައިގަނޑު 4 މުއައްސަސާއަކަށް ހުށައަޅާފައެވެ. އެގޮތުން ފުލުހުންނަށް އިންތިޚާބާއި ގުޅޭ ޖިނާއީ މައްސަލަތަކެއް ހުށައަޅާފައިވާއިރު، އެ މައްސަލަތައް ހުށައަޅާފައިވަނީ މައިގަނޑު 25 ނުކުތާއެއްގެ މައްޗަށެވެ. އަދި އޭސީސީއަށްވެސް މައްސަލަތަކެއް ހުށައަޅާފައިވާއިރު، އޭގެ ތެރޭގައި އިންތިޚާބުގެ ވޯޓު ކަރުދާސް ޕްރިންޓު ކުރުމުގެ މަސައްކަތް ޙަވާލު ކުރުމުގައި މަޤާމުގެ ނުފޫޒު ބޭނުންކޮށް ނާޖާއިޒް ފައިދާ ހޯއްދަވާފައިވާކަމަށް ތުހުމަތުކޮށް ހުށައަޅާފައިވާ މައްސަލަތަކެއްވެސް ހިމެނެއެވެ.
އޭގެ އިތުރުން، މި ސަރުކާރުން ޤާއިމުކޮށްފައިވާ އިންތިޤާލީ އިންސާފުގެ އޮމްބަޑްސްޕަރސަން އޮފީހަށްވެސް ވަނީ އިންތިޚާބާއި ގުޅޭ މައްސަލަތަކެއް ހުށައަޅާފައެވެ. އެގޮތުން އިންތިޚާބު އޮޅުވާލުމަކީ ދުރާލާ ރާވައިގެން، ކަނޑައެޅިގެން ވަކި ސިޔާސީ ފިކުރަކަށް ގެއްލުން ދިނުމުގެ މަޤްސަދުގައި ކޮށްފައިވާ ކަމެއްކަމަށް ބުނެ ވަނީ އެކަމާއި ގުޅޭ މައްސަލަތަކެއް ހުށައަޅާފައެވެ.
ހަތަރުވަނަ މުއައްސަސާއެއްގެ ގޮތުން ހިއުމަން ރައިޓްސް ކޮމިޝަން (އެޗްއާރްސީއެމް) އަށް މައްސަލަ ހުށައަޅާފައިވާއިރު، ޤާނޫނު އަސާސީން ލިއްބައިދީފައިވާ ޙައްޤުތަކެއް ގެއްލިގެން ގޮސްފައިވާކަމަށް މައްސަލައިގައި ބުނެފައިވެއެވެ. މި ހަތަރު މުއައްސަސާއަށްވެސް މައްސަލަ ހުށައަޅާފައިވަނީ އާދިއްތަ ދުވަހުއެވެ.
