ޒިގްޒެގް އިންޓަ އޮފީސް ފުޓްސަލް މުބާރާތުގައި 14 ޓީމަކުން ބައިވެރިވެއްޖެ
17 ޖެނުއަރީ 2022 | ހޯމަ 20:27މުބާރާތް ފަށާނީ ފެބްރުއަރިީ މަހުގެ އެކެއްގައި
ޒިގްޒެގް އޮފީސް މުބާރާތެއްގެ ތެރެއިން
ކުޅުދުއްފުށީ ޒިގްޒެގް ފޯ ޔޫތު ލިންކޭޖުން އިންތިޒާމުކޮށްގެން އަންނަ ފެބުރުއަރީ މަހުގެ އެއްވަނަ ދުވަހު ފެށުމަށް ހަމަޖެހިފައިވާ، ޒިގްޒެގް އިންޓަ އޮފީސް ފުޓްސަލް މުބާރާތުގައި 14 ޓީމެއް ބައިވެރިވެއްޖެއެވެ.
ޒިގްޒެގުން ބުނީ މި މުބާރާތަކީ ކުޅުދުއްފުށީގައި ހުރި ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫހު އާލާކުރުމާއެކު، ފުޓުސަލްއަށް ޝައުގުވެރިކުރުމުގެ ގޮތުން ބާއްވަމުން އަންނަ މުބާރާތެއް ކަމަށެވެ. އަދި މުބާރާތެއްގައި ވާދަކުރުމުގެ ފުރުސަތު ސަރުކާރުގެ އޮފީސް އަދި ކުންފުނިތަކުގެ މުވައްޒަފުންނަށް ހޯދައިދިނުމާއި، ސަރުކާރުގެ އޮފީސް ނުވަތަ ކުންފުނިތަކުގެ މުވައްޒަފުން އެއްތަނަކުން ބައްދަލުވެ، ގުޅުން ބަދަހިކުރުމަކީވެސް މި މުބާރާތުގެ މަގްސަދެއް ކަމަށް ޒިގްޒެގުން ބުނެއެވެ.
މި މުބާރާތަކީ ކުޅުދުއްފުށީގައި ބޭއްވޭ އެންމެ ބޮޑު އެއް ފުޓްސަލް މުބާރާތް ކަމަށްވާއިރު، މި މުބާރާތަށް ބޮޑު ހޭދައެއްކޮށް ދުރާލާ ޓީމުތަކުން ތައްޔާރުވާކަން ޒިގްޒެގުން ވަނީ ހާމަކޮށްފައެވެ. މި މުބާރާތުގެ ގަވާއިދަށް މުބާރާތުގައި ބައިވެރިވާ ހުރިހާ ފަރާތްތަކުންވެސް، ކުޅިވަރުގެ ރޫހާ ޚިލާފު ނުވާގޮތުގެ މަތިން ވަރަށް ފޯރިއާއެކު މުބާރާތް ނިންމާލުމަކީ ވަރަށް ބޮޑު އެދުމެއްް ކަމަށްވެސް ޒިގްޒެގުން ވަނީ ބުނެފައެވެ.
އަންނަ ފެބުރުއަރީ މަހު ޒިގްޒެގް އިންޓަ އޮފީސް ފުޓްސަލް މުބާރާތް ބާއްވާއިރު، މިއީ ޒިގްޒެގުން މި މުބާރާތް ބާއްވާ އަށްވަނަ ފަހަރެވެ. އެންމެފަހުން 2019 ވަނަ އަހަރު މި މުބާރާތް ބޭއްވިއިރު، އެ މުބާރާތުގެ ޗެމްޕިއަންކަން ހޯދާފައިވަނީ ދިރާގުންނެވެ.
