ކޮމިއުނިޓީ ސަރވިސްގެ ތެރެއިން ގައިދީންގެ އަދަބު ތަންފީޒުކުރަން ފަށައިފި
މިގޮތަށް އަދަބު ތަންފީޒު ކުރެވޭނެ 3 ގޮތެއް ވޭ
މޯލްޑިވްސް ކަރެކްޝަނަލް ސަރވިސް
ޖަލު ބަންދު ފިޔަވައި ކަނޑައެޅޭ އިތުރު އަދަބުތައް ތަންފީޒު ކުރުމުގައި މޯލްޑިވްސް ކަރެކްޝަނަލް ސަރވިސްއިން އަމަލުކުރާނެ ގޮތުގެ ގަވާއިދު ގެޒެޓްކޮށް އެއަށް އަމަލުކުރަން ފަށައިފިއެވެ.
މިއާއެކު ކޮމިއުނިޓީ ސަރވިސްގެ ތެރެއިން ނުވަތަ މުޖުތަމައަށް ޚިދުމަތް ކުރުމުގެ އަދަބު ތަންފީޒުކުރަން ވަނީ ފަށާފައެވެ. މި ގަވައިދުގައިވާ ގޮތުން މުޖުތަމައަށް ޚިދުމަތް ކުރުމުގެ އަދަބު ތަންފީޒު ކުރެވޭނެ 3 ގޮތެއް ވެއެވެ. އެއް ގޮތަކީ ހަމައެކަނި މުޖުތަމައަށް ޚިދުމަތް ކޮށްގެން އަދަބު ތަންފީޒުކުރުމެވެ. ދެވަނަ ގޮތަކީ ޖަލު އަދަބާއެކު މުޖުތަމައަށް ޚިދުމަތް ކުރުމުގެ އަދަބު ތަންފީޒުކުރުމެވެ. އަދި ތިންވަނަ ގޮތަކީ ގޭބަންދުގެ އަދަބާއެކު މުޖުތަމައަށް ޚިދުމަތް ކުރުމުގެ އަދަބު ތަންފީޒުކުރުމެވެ.
މުޖުތަމައަށް ޚިދުމަތް ކުރުމުގެ އަދަބު ތަންފީޒު ކުރަންވާނީ، ގައިދީއަށް އުޖޫރައެއް ލިބޭގޮތަކަށް ނޫން ކަމަށް މި ގަވައިދުގައި ވެއެވެ. މިގޮތަށް އަދަބު ތަންފީޒުކުރާ ހާލަތުގައި މުޖުތަމައަށް ޚިދުމަތް ކުރުމުގެ އަދަބާއެކު ކަނޑައެޅޭ އެހެން އަދަބަކާ އެކުގައި ނުވަތަ ވަކީން އަދަބު ތަންފީޒު ކުރުމަށް ނިންމިދާނެއެވެ. އެގޮތުން އަދަބު ތަންފީޒު ކުރުމަށް ގައިދީ ބޭނުންވާ ގޮތާއި، ގައިދީގެ ނަފްސާނީ ދުޅަހެޔޮކަމާއި ޖިސްމާނީ ދުޅަހެޔޮކަން ހުރި މިންވަރާއި، ޖަލުގެ ހާލަތަށް ރިއާޔަތް ކުރުމާއި، ގައިދީގެ ދިރިއުޅުމުގެ ހާލަތާއި، އާއިލީ ހާލަތާއި، ގައިދީގެ މާލީ ހާލަތަށް ރިއާޔަތް ކުރުމަށް ގަވައިދުގައި ވެއެވެ.
ޖަލު އަދަބާއެކު މުޖުތަމަޢަށް ޚިދުމަތް ކުރުމުގެ އަދަބު ތަންފީޒު ކުރުމަށް ކޯޓުން ހުކުމް ކުރާ ހާލަތުގައި އެ ގައިދީ ބެހެއްޓުމަށް ކަނޑައަޅައިފައިވާ ޖަލެއްގައި މި އަދަބު ތަންފީޒު ކުރަން ނިންމިދާނެ ކަމަށް ގަވައިދުގައިވެއެވެ. ގޭބަންދުގެ އަދަބާއެކު މުޖުތަމައަށް ޚިދުމަތް ކުރުމުގެ އަދަބު ތަންފީޒު ކުރުމަށް ކޯޓުން ހުކުމް ކުރާ ހާލަތުގައި، އެ ރަށަކީ މި އަދަބު ތަންފީޒު ކުރެވޭ ފަދަ މަސައްކަތެއް ކުރެވޭ ރަށެއް ކަމުގައި ވާނަމަ، އެ ރަށަކުން މި އަދަބު ތަންފީޒުކުރަން ނިންމިދާނެއެވެ.
އެ މީހެއްގެ މައްޗަށް މި އަދަބު ތަންފީޒު ކުރުމަށް ހުކުމްކޮށްފިނަމަ، ހުކުމްކުރާތާ 48 ގަޑިއިރުގެ ތެރޭގައި، އެ މީހެއްގެ މައްޗަށް ކޮށްފައިވާ އަދަބުގެ ބާވަތާއި، ތަބީއަތާއި، އެ މީހެއްގެ އިޖުތިމާއީ ހާލަތާއި އިގްތިސާދީ ހާލަތަށް ރިއާޔަތްކޮށް، އަދި އޭނާގެ ކިބައިގައި ހުރި ހުނަރުތަކާއި އިތުރަށް ތަރައްގީކުރަން ބޭނުންވާ ހުނަރުތައް ދެނެގަނެ، ގައިދީގެ ވަށައިޖެހޭ އެސެސްމަންޓެއް ހަދަންޖެހެއެވެ. އެސެސްމެންޓް ނިމޭތާ 72 ގަޑިއިރުގެ ތެރޭގައި ގައިދީއާއެކު އެއްބަސްވުމެއް ހަދައި، ސޮއިކުރަންޖެހެއެވެ. އަދި 48 ގަޑިއިރުގެ ތެރޭގައި އަދަބު ތަންފީޒުކުރަންޖެހެއެވެ.
މި ހުރިހާ ހާލަތެއްގައިވެސް ގައިދީންގެ ހަރަކާތްތައް މޮނިޓަރ ކުރަމުން ގެންދަންޖެހެއެވެ. އެކަން ކުރުމަށް ގައިދީއާއި މޯލްޑިވްސް ކަރެކްޝަނަލް ސަރވިސްއާ ދެމެދު އެއްބަސްވުމެއް އެކުލަވައިލުމާއި، މިކަމަށް މޮނިޓަރިންގ އޮފިސަރެއް ކަނޑައަޅަން ޖެހެއެވެ.
