2018 ގެ ރިޔާސީ އިންތިޚާބާގުޅޭ މައްސަލަތަކެއް ޕީޕީއެމްއިން 4 މުއައްސަސާއަކަށް ހުށައަޅައިފި
މައްސަލަތައް އިދިކޮޅުން ވަނީ މައިގަނޑު 4 މުއައްސަސާއަކަށް ހުށައަޅާފައި
ޕީޕިއެމްގެ ލީޑަރު ކުރީގެ ރައީސް އަބްދުﷲ ޔާމީން- ރައީސް ޔާމީނުވެސް ވަނީ އިންތިޚާބު އޮޅުވާލާފައިވާކަމަށް ތަކުރާރުކޮށް ވިދާޅުވެފައި
2018 ގެ ރިޔާސީ އިންތިޚާބާގުޅޭ މައްސަލަތަކެއް ޕީޕީއެމްއިން 4 މުއައްސަސާއަކަށް ހުށައަޅައިފިއެވެ.
އެކަން ހާމަ ކުރައްވާފައިވަނީ ޕީޕީއެމްގެ ޤާނޫނީ ވަކީލުންގެ ޓީމުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. އެގޮތުން މި ބައްދަލުވުމުގައި ޕީޕީއެމްގެ ޤާނޫނީ ޓީމުން ބުނީ، 2018 ގެ ރިޔާސީ އިންތިޚާބު އޮޅުވާލާފައިވާކަމަށް ބުނެ ޕީޕީއެމް އިން ހުށައަޅާފައިވާ މައްސަލަތައް މިހާތަނަށްވެސް ބެލިފައިނުވާ ކަމަށާއި، އެކަމަށް ދައުލަތުގެ މުއައްސަސާތަކުން ހުރަސް އަޅާފައިވާ ކަމަށެވެ.
ނަމަވެސް އެންމެ ފަހުން ބޭއްވި ރިޔާސީ އިންތިޚާބު ރައީސް ޔާމީނަށް ކާމިޔާބު ނުވީ އިންތިޚާބު އޮޅުވާލައިގެން ނޫން ކަމަށާއި، އެމަނިކުފާނު އިންތިޚާބުގައި ނާކާމިޔާބުވީ ވޯޓު ނުލިބުމުން ކަމަށް އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފް ވަނީ ވިދާޅުވެފައެވެ. މިކަމަށްވެސް ޕީޕީއެމްގެ ޤާނޫނީ ޓީމުން ވަނީ ޝަރީފަށް ބަހުގެ ހޫނު ޙަމަލާތަކެއް ދީފައެވެ.
އިންތިޚާބާއި ގުޅޭ މައްސަލަތައް އިދިކޮޅުން ވަނީ މައިގަނޑު 4 މުއައްސަސާއަކަށް ހުށައަޅާފައެވެ. އެގޮތުން ފުލުހުންނަށް އިންތިޚާބާއި ގުޅޭ ޖިނާއީ މައްސަލަތަކެއް ހުށައަޅާފައިވާއިރު، އެ މައްސަލަތައް ހުށައަޅާފައިވަނީ މައިގަނޑު 25 ނުކުތާއެއްގެ މައްޗަށެވެ. އަދި އޭސީސީއަށްވެސް މައްސަލަތަކެއް ހުށައަޅާފައިވާއިރު، އޭގެ ތެރޭގައި އިންތިޚާބުގެ ވޯޓު ކަރުދާސް ޕްރިންޓު ކުރުމުގެ މަސައްކަތް ޙަވާލު ކުރުމުގައި މަޤާމުގެ ނުފޫޒު ބޭނުންކޮށް ނާޖާއިޒް ފައިދާ ހޯއްދަވާފައިވާކަމަށް ތުހުމަތުކޮށް ހުށައަޅާފައިވާ މައްސަލަތަކެއްވެސް ހިމެނެއެވެ.
އޭގެ އިތުރުން، މި ސަރުކާރުން ޤާއިމުކޮށްފައިވާ އިންތިޤާލީ އިންސާފުގެ އޮމްބަޑްސްޕަރސަން އޮފީހަށްވެސް ވަނީ އިންތިޚާބާއި ގުޅޭ މައްސަލަތަކެއް ހުށައަޅާފައެވެ. އެގޮތުން އިންތިޚާބު އޮޅުވާލުމަކީ ދުރާލާ ރާވައިގެން، ކަނޑައެޅިގެން ވަކި ސިޔާސީ ފިކުރަކަށް ގެއްލުން ދިނުމުގެ މަޤްސަދުގައި ކޮށްފައިވާ ކަމެއްކަމަށް ބުނެ ވަނީ އެކަމާއި ގުޅޭ މައްސަލަތަކެއް ހުށައަޅާފައެވެ.
ހަތަރުވަނަ މުއައްސަސާއެއްގެ ގޮތުން ހިއުމަން ރައިޓްސް ކޮމިޝަން (އެޗްއާރްސީއެމް) އަށް މައްސަލަ ހުށައަޅާފައިވާއިރު، ޤާނޫނު އަސާސީން ލިއްބައިދީފައިވާ ޙައްޤުތަކެއް ގެއްލިގެން ގޮސްފައިވާކަމަށް މައްސަލައިގައި ބުނެފައިވެއެވެ. މި ހަތަރު މުއައްސަސާއަށްވެސް މައްސަލަ ހުށައަޅާފައިވަނީ އާދިއްތަ ދުވަހުއެވެ. އެހެންނަމަވެސް، މި މައްސަލަތައް އެ މުއައްސަސާތަކުން ބަލައިގެންފައިވާކަން މިހާތަނަށް ކަށަވަރުވެފައެއް ނުވެއެވެ.
އިދިކޮޅުގެ ޤާނޫނީ ވަކީލުންގެ ޓީމުން ވަނީ ދައުލަތުގެ މުއައްސަސާތައް "ޕެރެލައިޒްކޮށް" މުއައްސަސާތަކުގެ ބާރު ކަނޑުވާލާފައިވާކަމަށް ތުހުމަތުކޮށްފައެވެ. އަދި 2018 ގެ ރިޔާސީ އިންތިޚާބަށް ވީ ގޮތް ބަލާނެ ކަމަށާއި، މިފަހަރު އެ މައްސަލަތައް ކޮޅެއްގައި ޖައްސާނެ ކަމަށް ޤާނޫނީ ވަކީލުންގެ ޓީމުން ވިދާޅުވެއެވެ. ވަކިން ޚާއްސަކޮށް މިހާރު ކުރިއަށްދާ ކޮމަންޑޫ ބައި އިލެކްޝަންގައި އެއްވެސް އޮޅުވާލުމެއް ހިނގުމުގެ ފުރުސަތު އިދިކޮޅުން ނުދޭނެކަމަށް ވަކީލުން ފާހަގަ ކުރައްވައެވެ.
އެހެންނަމަވެސް، މުއައްސަސާތަކަށް އިތުބާރު ނުކުރާއިރު މައްސަލަ ހުށައެޅުއްވީ ކީއްވެތޯ ނޫސްވެރިން ސުވާލު ކުރުމުން ޤާނޫނީ ޓީމުން ވަނީ، މައްސަލަ ހުށައެޅުއްވީ ހަމައެކަނި ރެކޯޑަށްޓަކައި ކަމަށް ވިދާޅުވެފައެވެ. އެގޮތުން ވެރިކަން ބަދަލުވުމުންވެސް އެ މައްސަލަތަކަށް އިންސާފު ހޯދޭނީ އޭރުންކަމަށް ވަކީލުން ވިދާޅުވެއެވެ.
އެންމެ ފަހުން 2018ވަނަ އަހަރު ބޭއްވި ރިޔާސީ އިންތިޚާބުގައި ވޯޓު އޮޅުވާލާފައިވާކަމަށް ބުނެ، އިދިކޮޅުން އަންނަނީ އަނެއްކާވެސް އިލެކްޝަންސް ކޮމިޝަންގެ ކުރީގެ ރައީސް ޝަރީފަށްވެސް ތުހުމަތުކުރަމުންނެވެ. 2018ވަނަ އަހަރުގައި އޮތް ރިޔާސީ އިންތިޚާބުގެ ރަސްމީ ނަތީޖާ ދައްކާގޮތުން ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމަށް ލިބިވަޑައިގެންފައިވަނީ 96،052 ވޯޓެވެ. އަދި އެމްޑީޕީގެ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންފައިވަނީ 134،705 ވޯޓެވެ.
